Vafilipiya

4 Kutani vamakwerhu n’wina ni mi rhandzaka ni tlhela ni mi xuva, n’wina mi nga ku tsaka ni harhi* ya mina,+ tiyani mi ku ndee+ aHosini, n’wina varhandziwa.

2 Ni khongotela Evhodiya na Sintika leswaku va twanana aHosini.+ 3 Na wena mutirhi wa ku tshembeka hi tirhaka xikan’we, na ku kombela swaku u tama u pfuna vavasati lava. Hikusa va tirhe hintamu na mina ka ntirho wa ku chumayela mahungu ya ku tsakisa, na Klemente ni van’wani hinkwavu lava hi tirhaka xikan’we, lava mavito ya vona ma nga tsaliwa ka buku ya wutomi.+

4 Tshamani na mi tsakile Hosini. Ni tlhela ni ku: Tsakani!+ 5 Vanhu hinkwavu va fanele va swi vona swaku ma va pimisela van’wani.+ Hosi yi le kusuhi. 6 Mi nga vileli hi nchumu,+ kambe ka hinkwaswu kombelani Xikwembu hi xikhongelo swaku xi mi pfuna, mi kombela na mi khensa;+ 7 kutani ku rhula+ ka Xikwembu loku tlulaka ku twisisa hinkwaku, ku ta vonelela timbilu ta n’wina+ ni mimpimiso ya n’wina hi ku tirhisa Kreste Yesu.

8 Xa wugamu vamakwerhu, swilo hinkwaswu leswi nga ntiyiso, swilo hinkwaswu leswi nga swa lisima, swilo hinkwaswu swa ku lulama, swilo hinkwaswu leswi nga tenga, swilo hinkwaswu swa ku rhandzeka, swilo hinkwaswu leswi ku vulavuliwaka kahle hi swona, swilo hinkwaswu leswi nga swinene ni swilo hinkwaswu leswi dzunekaka, tamani mi pimisa hi swona.+ 9 Hanyani hi leswi mi nga swi djondza, mi nga swi yamukela, mi nga swi twa ni ku swi vona ka mina,+ kutani Xikwembu xa ku rhula xi ta va na n’wina.

10 Na tsaka swinene aHosini hileswi mi nga tlhela mi ni khumbuka.+ Hambileswi a mi karhateka hi mina, a mi yi kumanga ndlela ya ku ni pfuna. 11 A ni vuli leswo hi mhaka ya leswi ni pfumalaka, hikusa ni djondze ku tsaka ka leswi ni tikumaka na ni li ka swona.+ 12 Na swi kota ku hanya hi swaswitsongo+ ni ku va ni swa swinyingi. Ka hinkwaswu, ni ka swiyimu hinkwaswu, ni djondze xihundla xa ku xurha ni xa ku twa ndlala, ku va ni swa swinyingi ni ku pfumala. 13 Ka hinkwaswu ni ni matimba hi mhaka ya lweyi a ni nyikaka matimba.+

14 Kambe mi yendle kahle hi ku ni pfuna nkama a ni li ku hluphekeni. 15 Phela n’wina Vafilipiya ma swi tiva swaku loko mi twe mahungu ya ku tsakisa hi khambi la ku sungula, nkama ni nga suka Makedoniya, a ku na bandla leli nga ni pfuna, kambe hi n’wina ntsena;+ 16 hikusa nkama a ni li Tesalonika mi ni rhumele swilo leswi a ni swi pfumala makhambi mambirhi. 17 A ni vuli swaku ni lava ku nyikiwa minchumu, kambe ni lava swaku mi yendla minchumu yayinene leyi nga ta mi pfuna swinene. 18 Ni na yona minchumu hinkwayu leyi ni yi lavaka naswona i yinyingi. Hikusa ni swi yamukelile hinkwaswu leswi mi nga nyiketa Epafrodito+ swaku a ta ni nyika. Swi fana ni gandzelo leli yamukelekaka,+ swa nun’hwela naswona swa tsakisa swinene ka Xikwembu. 19 Se Xikwembu lexi nga ni swilo swa swinyingi xi ta mi nyika hinkwaswu leswi mi swi pfumalaka+ hi ku tirhisa Kreste Yesu. 20 Kutani ku dzuneka a ku ve ka Xikwembu ni Papayi wa hina hi masiku ni masiku. Amen.

21 Rungulani vakwetsimi hinkwavu lava nga vadjondzisiwa va Kreste Yesu. Vamakwerhu lava nga na mina va mi rungula. 22 Naswona vakwetsimi hinkwavu va mi rungula, ngopfungopfu va ndjangu wa Khezari.+

23 Timpsalu tatikulu ta Hosi Yesu Kreste a ti ve ni mbilu leyi mi nga na yona.