Nhlawutelo ya Yohani

15 Ni tlhele ni vona singita la ku hlamalisa atilweni, la 7 wa tintsumi+ leti nga khoma 7 wa makhombo. Makhombo lawa i ya wugamu hikusa loko ma ta hundza ku kwata ka Xikwembu ku ta va ku helile.+

2 Ni vone ni nchumu wa ku fana ni lwandle la vhidru+ lowu a wu patsiwe ni ndzilu naswona lava nga kota ku hlula+ xiharhi xa ku chavisa hintamu,* xifaniso xa xona+ ni numeru ya vito la xona,+ a va nyime kusuhi ni lwandle la vhidru na va khome tiharipa ta Xikwembu. 3 A va yimbelela lisimu la Moxe+ mutirheli wa Xikwembu ni lisimu la Xinyempfani+ va ku:

“I yikulu naswona ya hlamalisa mintirho ya wena+ Yehovha,* Xikwembu Xa Matimba Hinkwawu.+ Tindlela ta wena ti lulamile naswona i ta ntiyiso,+ wena Hosi leyi nga kona hi nkama wa ku kala wu nga heli.+ 4 I mani lweyi a nga ta kala a nga ku chavi, wena Yehovha,* a tlhela a nga dzunisi vito la wena? Phela hi wena ntsena lweyi a tshembekaka,+ a ku na mun’wani. Matiko hinkwawu ma ta ta ma ta ku gandzela,+ hikusa swa tiveka swaku u yavanyisa hi ndlela yayinene.”

5 Se ni gama ni vona ndhawu leyi kwetsimaka ya tende la wumboni+ atilweni na yi pfuliwa,+ 6 kutani ku humelela 7 wa tintsumi hi ka ndhawu leyi kwetsimaka na ti khome 7 wa makhombo;+ a ti yambale mpahla ya ku basa yi tlhela yi phatima naswona a titibohe swifuva hi mabandhi ya woru. 7 Se kerubu lin’we ka lawayani ya 4 li teka 7 wa switijelana swa woru leswi nga tala hi ku kwata ka Xikwembu+ lexi hanyaka hi masiku ni masiku li nyika 7 wa tintsumi. 8 Kutani ndhawu leyi kwetsimaka yi tala hi ximusi hi mhaka ya ku phatima ka Xikwembu+ ni hi mhaka ya matimba ya xona naswona a nga kona lweyi a nga kota ku nghena ka ndhawu leyi kwetsimaka na ku nge se hela 7 wa makhombo+ ya 7 wa tintsumi.