Tinhlayo

11 Se vanhu va sungula ku ngurangura swinene, va ngurangurela Yehovha. Nkama Yehovha a nga swi twa, a va kwatela ngopfu, kutani ndzilu lowu taka hi ka Yehovha wu va hisa wu dlaya van’wani va vona ka magamu ya matende. 2 Vanhu va sungula ku rilela Moxe, kutani a khongela ka Yehovha,+ se ndzilu wu timeka. 3 Ndhawu yoleyo yi chuliwe swaku i Tabera,* hikusa va hisiwe hi ndzilu lowu taka hi ka Yehovha.+

4 Vanhu+ lava taka hi ka matiko man’wani* lava a va tshama na vona, va sungule ku navela swakudla swa ku yampsa,+ se Vayisrayele na vona va tlhela va sungula ku rila va ku: “I mani lweyi a nga ta hi nyika nyama swaku hi dla ke?+ 5 Hi khumbuka tihlampfi leti a hi ti dla hi mahala aGibita, mapipinu, makhalavatla, tinyala ni swinyalani!+ 6 Kambe swoswi ha fa hi ndlala. A ku na swin’wani leswi hi nga dlaka swona, ko va ni mana leyi ntsena.”+

7 Mana+ a yi fana ni mbewu ya kowentru,*+ naswona a yi fana ni wurimba* la bedeliyamu. 8 Vanhu a va hangalaka va yi rholela, va yi sila kumbe va yi kandza ka churhi. Kutani va yi sweka ka tipanela kumbe va yendla mapawu ya redondu;+ a yi nandziha ku fana ni bolu la ku lombela leli nga cheliwa mafurha. 9 Loko ku va ni mberha* ka matende niwusiku, mana na yona a yi wela kolanu.+

10 Se Moxe a twa vanhu na va rila ka mindjangu ya vona, na va nyime ka tinyanghwa ta matende ya vona. Yehovha a kwata swinene,+ Moxe na yena a swi zanga swi mu tsakisa. 11 Kutani Moxe a ku ka Yehovha: “Hi mhaka muni u ni vangele maxangu lawa? Hi mhaka muni u nga ni tweli wusiwana, leswi u ni rhwexaka ndzhwalu wa vanhu hinkwavu lava?+ 12 O va mina ni nga psala vanhu hinkwavu lava? O va mina ni nga va psala u zaka u ni byela u ku: ‘Va tlakule ku fana ni xitirhi lexi tlakulaka n’wana lweyi a yan’waka’, u va yisa ka tiko leli u nga funga swaku u ta li nyika vavhovho va vona?+ 13 Ni ta yi kuma kwini nyama ya ku nyika vanhu lava hinkwavu? Hikusa va tshamela ku ni rilela va ku: ‘Hi nyiki nyama swaku hi dla!’ 14 A ni nge swi koti ku rhwala vanhu lava na ni li noxe; swa ni tikela ngopfu.+ 15 Loko ku li swaku u ta ni khomisa xileswi, ni kombela u ni dlaya swoswi.+ Kambe loko u ni rhandza, ni vhikeleli swaku ni nga ha voni maxangu.”

16 Se Yehovha a byela Moxe a ku: “Ni langeli 70 wa vavanuna ka madoda ya Israyele, lawa u tivaka swaku i madoda ni varhangeli va vanhu;+ va yise ka tende la ntlhanganu, mi fika mi nyima kolanu. 17 Ni ta xika+ ni ta vulavula na wena kolanu,+ ni ta pambula moya wun’wani wa ku kwetsima+ lowu nga ka wena ni va nyika wona, kutani va ta ku pfuna ku rhangela vanhu lava swaku u nga tirhi wexe.+ 18 U fanele u byela vanhu u ku: ‘Lunghekani* hikusa mundzuku+ mi ta dla nyama, mi rilele Yehovha+ mi ku: “I mani lweyi a nga ta hi nyika nyama swaku hi dla? Hikusa a hi tikhorisa Gibita.”+ Vhela, Yehovha a ta mi nyika nyama mi dla.+ 19 A mi nga ta yi dla siku lin’we, kumbe masiku mambirhi kumbe 5 wa masiku kumbe 10 wa masiku kumbe 20 wa masiku, 20 kambe ku ringana wheti, anze yi huma hi tinhompfu, yi mi kolwa,+ hikusa mi tshike Yehovha lweyi a nga xikarhi ka n’wina naswona mi mu rilelile mi ku: “Kasi hi sukele yini Gibita?”’”+

21 Se Moxe a ku: “Ni ni 600.000 wa vavanuna+ lava nga masonchwa, kambe wena u li: ‘Ni ta va nyika nyama, va ta yi dla ku ringana wheti!’ 22 Loko vo dlayeliwa mintlhambi hinkwayu ya tinyempfu ni ya tihomu, indjhe va nga yenela? Kumbe loko vo phaseliwa tihlampfi hinkwatu ta lwandle, indjhe ti nga va yeneta?”

23 Se Yehovha a byela Moxe a ku: “Voko la Yehovha li yo koma ke?+ Swoswi u ta swi vona kumbe leswi ni nga swi vula swi ta yendleka kumbe a swi nga ta yendleka.”

24 Moxe a famba a ya byela vanhu leswi Yehovha a nga swi hlaya. A hlengeleta 70 wa vavanuna lava nga susiwa ka madoda ya tiko, a va nyimisa matlhelweni ka tende.+ 25 Kutani Yehovha a xika na a li ka rhefu,+ a vulavula na Moxe,+ se a teka moya wun’wani wa ku kwetsima+ lowu a a mu nyike wona a wu nyika 70 wa madoda. Nkama va nga nyikiwa moya wa ku kwetsima, va yo vhela va sungula ku profeta,+ kambe a va ha tlhelanga va swi yendla.

26 A ku ni vavanuna vambirhi lava a va salile ka matende. Mavito ya vona a ku li Eldadi na Medadi. Se moya wa ku kwetsima wu va ka vona, hikusa mavito ya vona a ma tsaliwile, kambe a va nga yanga ka tende la ntlhanganu. Kutani va sungula ku profeta amatendeni. 27 Kutani djaha lin’wani li tsutsuma li ya byela Moxe li ku: “Eldadi na Medadi va le ku profeteni ka matende!” 28 Se Yoxuwa+ n’wana wa Nuni, lweyi a a li mupfunisi wa Moxe ku sukela a ha li djaha, a ku: “Moxe hosi ya mina, va tshikisi!”+ 29 Kambe Moxe a mu byela a ku: “U ni wukwele la vanhu lavayani hi mhaka ya mina ke? A ni navela swaku vanhu hinkwavu va Yehovha va va vaprofeta naswona Yehovha a va nyika moya wa yena!” 30 Hi ku famba ka nkama Moxe ni madoda ya Vayisrayele va tlhelele ka matende.

31 Kutani Yehovha a yendla swaku xidzedze xi tisa tin’hwarhi,* ti ta hi ka tlhelo la lwandle, ti wa ka matende,+ ka tlhelo lin’we a ti tate ndhawu ya kolomuyani ka mpfhuka wa ku ringana siku lin’we, ni ka tlhelo lelin’wani a ti tate ndhawu ya kolomuyani ka mpfhuka wa ku ringana siku lin’we, a ti li ka matlhelo hinkwawu ya matende, a ti tlhatakanyane kolomuyani ka metru* lin’we ku suka hansi. 32 Se vanhu va hlengeleta tin’hwarhi siku lelo hinkwalu ni wusiku la kona hinkwalu ni siku leli landzelaka hinkwalu. Hinkwavu va hlengelete swa ku tata kolomuyani ka 10 wa swibya* swaswikulu naswona va ti yaneke ka matlhelo hinkwawu ya matende. 33 Loko nyama ya ha li ka nomo wa vona, na va nga se sungula ku yi txakunha, Yehovha a kwatela vanhu, kutani Yehovha a dlaya vanhu va vanyingi swinene.+

34 Se va chula ndhawu yoleyo va ku i Kibroti-Atavha,*+ hikusa hi kolanu va nga lahla vanhu lava va nga navela swakudla swa ku yampsa.+ 35 Nkama va nga suka aKibroti-Atavha va ye Hazeroti+ va fika va tshama kolanu.