Vaheberu
8 Leswi hi zamaka ku swi vula hi leswi: Hi ni muprista wamukulu wa ku fana na yena+ naswona a tshame ka voko la xinene ka xitshamu xa Wuhosi xa Xikwembu amatilweni.+ 2 A tirha ka ndhawu ya ku kwetsima+ ni ka tabernakela ya ntiyiso leyi nga nyimisiwa hi Yehovha,* ku nga li hi munhu. 3 Hikusa muprista mun’wani ni mun’wani wamukulu a langiwile swaku a nyikela tinyiko ni magandzelo; se a swi fanela swaku ni lweyi a va ni swa ku swi nyikela.+ 4 Loko a a li lani misaveni a a nga ta va muprista+ hikusa se va kona vanhu lava nyikelaka tinyiko hi ku ya hi Nawu. 5 Vanhu lava va yendla ntirho wa ku kwetsima lowu nga xikombiso ni ndzhuti+ wa swilo swa le tilweni;+ swi fana ni nkama lowu Moxe a a li kusuhi ni ku yaka tabernakela, lani Xikwembu xi nga mu byela xi ku: “Tiyiseka swaku u yendla swilo hinkwaswu hi ku landza planu leli u nga kombiwa lona le ka ntshava.”+ 6 Kambe swoswi Yesu a nyikiwe ntirho wa ku yampsa swinene, hikusa a tlhela a va mutlhanganisi+ wa ntwananu wa ku yampsa+ lowu nga tiyisekisiwa hi nawu hi ku ya hi switshembiso swa ku yampsa.+
7 Loko ntwananu wolowo wa ku sungula a wu nga na xihoxo, a wa wumbirhi a wu nga ta laveka.+ 8 Hikusa Xikwembu xi kuma xihoxo ka vanhu loko xi ku: “‘Vonani! Masiku ma ta,’ ku vula Yehovha,* ‘lawa ni nga ta yendla ntwananu wa nyuwani ni vanhu va Israyele xikan’we ni vanhu va Yuda. 9 A wu nga ta fana ni ntwananu lowu ni nga wu yendla ni vavhovho va vona siku ni nga va khoma hi voko ni va humesa ka tiko la Gibita,+ hikusa va tshove ntwananu wa mina, ni za ni tshika ku va hlayisa,’ ku vula Yehovha.*
10 “‘Hikusa lowu i ntwananu lowu ni nga ta wu yendla ni vanhu va Israyele loko masiku wolawo ma hundzile,’ ku vula Yehovha.* ‘Ni ta nghenisa minawu ya mina ka mimpimiso ya vona naswona ni ta yi tsala ka timbilu ta vona.+ Ni ta va Xikwembu xa vona naswona vona va ta va vanhu va mina.+
11 “‘A ku na munhu xikarhi ka vona lweyi a nga ta djondzisa mun’wani kumbe makwavu wa yena a ku: “Tiva Yehovha!”* Hikusa hinkwavu va ta ni tiva, ku sukela ka wamutsongo ku ya ka wamukulu. 12 Ni ta va twela wusiwana ka mintirho ya vona ya ku kala yi nga lulamanga naswona a ni nge he swi khumbuki swidjoho swa vona.’”+
13 Leswi xi vulavulaka hi “ntwananu wa nyuwani” xi yendle swaku lowu wa ku sungula wu hundzeliwa hi nkama.+ Lowu nga hundzeliwa hi nkama i wa khale naswona wu kusuhi ni ku nyamalala.+