Mahungu Ya Ku Tsakisa Ya Ku Tsaliwa Hi Matewu

21 Nkama a va li kusuhi ni Yerusalema, va fike Betifaje ka Ntshava ya Mawolivhera; se Yesu a rhuma vadjondzisiwa vambirhi+ 2 a ku: “Fambani ka xidoropani lexi vonekaka lahaya, kutani loko mi fika, mi ta kuma mbongolo yi bohiwile na yi li ni ximbongolwani; ti tlhantlheni mi ni tisela tona. 3 Loko munhu a mi vutisa, mi fanele mi ku: ‘Ti laviwa hi Hosi.’ Kutani hi xihantla, a ta mi tshika mi vuya na tona.”

4 Phela leswi swi yendlekile leswaku ku hetiseka leswi nga vuliwa hi muprofeta lweyi a nga te: 5 “Byelani Siyoni* mi ku: ‘Phela Hosi ya wena ya ta ka wena+ hi ku rhula,+ na yi ta hi mbongolo, ina, yi famba hi ximbongolwani.’”+

6 Se vadjondzisiwa va famba, va ya yendla leswi Yesu a nga va byela swona.+ 7 Va tisa mbongolo ni ximbongolwani xa yona, va gama va tlhateka tinguvu ta vona henhla ka tona, kutani Yesu a famba hi ximbongolwani.+ 8 Vanyingi ka lava a va li ka xitshungu va yandlala tinguvu ta vona ndleleni,+ kuve lavan’wani va sungula ku tsema tigadja ka minsinya va ti yandlala ndleleni. 9 Naswona xitshungu lexi a xi mu rhangelile ni lava a va mu landzela hi ndzhaku a va tama va huwelela va ku: “Ha khongela, a ku ponisiwe N’wana wa Davhida!+ A katekile lweyi a taka hi vito la Yehovha!*+ Ha khongela, mu ponisi, wena lweyi u nga matilweni!”+

10 Se nkama a nga nghena Yerusalema, doropa hinkwalu li nyimanyimeka, li ku: “I mani munhu lweyi?” 11 Xitshungu xi tshamela ku vula xi ku: “Lweyi i Yesu,+ muprofeta lweyi a taka hi Nazareta wa le Galileya!”

12 Kutani Yesu a nghena tempeleni, a hlongola hinkwavu lava xavisaka ni lava xavaka tempeleni, a wisetela mimeza ya vatxintxisi va male ni switshamu swa lava xavisaka swituvani,+ 13 a ku: “Ku tsaliwile: ‘Yindlo ya mina yi ta vitaniwa yindlo ya xikhongelo,’+ kambe n’wina mi yi yendla yindlo ya vayivi.”+ 14 Naswona a tlhela a hanyisa va ku fa matihlo ni lava khwitaka lava nga mu yela tempeleni.

15 Vaprista vavakulu ni vatsali va kwata hintamu+ nkama va nga vona swilo swa ku hlamalisa leswi Yesu a nga swi yendla ni nkama va nga vona swifanyani leswi a swi huwelela tempeleni swi ku: “Ha khongela, a ku ponisiwe N’wana wa Davhida!”+ 16 Se va ku: “Indjhe wa swi twa leswi vuliwaka hi swifanyani leswi?” Yesu a va hlamula a ku: “Na swi twa. A mi se tshama mi lerha leswi: ‘U yendle swaku vana ni swibebetani swi ku dzunisa’?”+ 17 Kutani a suka a va siya, a ya ka doropa la Betaniya, lomu a nga ya yetlela kona wusiku lolelo.+

18 Nimixo swinene, loko a tlhelela doropeni, a twa ndlala.+ 19 Hiloko a vona nsinya wa nkuwa kusuhi ni ndlela kutani a wu yela, kambe a nga kumanga nchumu ka wona+ loko ku nga li matluka ntsena. Se a ku ka wona: “Ku nga ha tshuki ku psaliwa mihandzu ka wena ni siku ni lin’we.”+ Kutani nsinya wa nkuwa wu woma hi nkama wolowo. 20 Kambe nkama vadjondzisiwa va nga vona leswi, va hlamalile va gama va ku: “Swi yendlekisa ku yini swaku nsinya wa nkuwa wu woma hi nkamanyana?”+ 21 Yesu a va hlamula a ku: “Ni mi byela ntiyiso: Loko mi ni lipfumelo naswona mi nga kanakani, a mi nga ta yendla leswi ni nga swi yendla ka nkuwa lowu ntsena, kambe mi nga byela ni ntshava leyi mi ku: ‘Suka u ya tihoxa lwandle,’ kutani yona yi suka.+ 22 Swilo hinkwaswu leswi mi swi kombelaka hi xikhongelo na mi ni lipfumelo, mi ta swi kuma.”+

23 Nkama Yesu a nga nghena tempeleni, vaprista vavakulu ni madoda ya tiko va ta ka yena na a li ku djondziseni va ku: “Ma ta hi kwini matimba lawa u yendlaka hi wona swilo leswi? Naswona i mani lweyi a nga ku nyika matimba ya kona?”+ 24 Yesu a va hlamula a ku: “Na mina ni ta mi vutisa nchumu xin’we; se loko mi ni hlamula, na mina ni ta mi byela swaku ni yendla swilo leswi hi matimba ya mani: 25 Yohani a a rhumiwe hi mani ku tsakamisa vanhu? Hi Xikwembu* kumbe hi vanhu?”* Kutani va sungula ku bula hi xivona va ku: “Loko hi ku: ‘A a rhumiwe hi Xikwembu,’ a ta ku: ‘Se hi mhaka muni mi nga pfumelanga ka yena?’+ 26 Kambe loko hi ku: ‘A a rhumiwe hi vanhu,’ hi chava ku kwateliwa hi xitshungu, hikusa xitshungu hinkwaxu xi kholwa swaku Yohani i muprofeta.” 27 Kutani va hlamula Yesu va ku: “A hi swi tivi.” Na yena a ku ka vona: “Na mina a ni nga ta mi byela lweyi a nga ni nyika matimba ya ku yendla swilo leswi.

28 “Mi swi vonisa ku yini? Wanuna mun’wani a a ni vana vambirhi. A ya ka lweyi wa ku sungula a ku: ‘N’wananga, famba u ya tirha ka nsimu ya mawuvha namuntlha.’ 29 A mu hlamula a ku: ‘Na yala!’ Kambe a sala a tilaya, a gama a ya. 30 Se a yela wa wumbirhi, a mu byela swa ku fana. Yena a hlamula a ku: ‘Ni ta ya papayi,’* kambe a gama a nga yi. 31 Ka lavambirhi, i mani lweyi a nga yendla ku rhandza ka papayi wa yena?” Va ku: “Hi lweyi wa ku sungula.” Yesu a ku ka vona: “Ni mi byela ntiyiso: A vahakelisi va rhesa* ni tinghwavani va ta rhanga va nghena ka Mfumu wa Xikwembu na n’wina mi nge se nghena. 32 Hikusa Yohani a tile ka n’wina, a mi djondzisa ndlela yayinene,* kambe a mi pfumelanga ka yena. Kambe vahakelisi va rhesa ni tinghwavani va pfumelile ka yena;+ hambi se mi swi vonile leswo, a mi tilayanga mi pfumela ka yena.

33 “Twanani xifaniso xin’wani xa munhu lweyi a a ni nsimu. A a byale mawuvha ka nsimu ya yena,+ a yaka muru, a txela ndhawu ya ku kamela ka yona mawuvha a tlhela a yaka yindlo ya ku leha;*+ kutani a yendla ntwananu* ni varimi van’wani swaku va yi hlayisa, a gama a yendza a ya ka tiko la le kule.+ 34 Nkama ku nga fika nkama wa ku tshovela, a rhume vatirhi va yena ka varimi swaku va ya teka mihandzu ya yena. 35 Kambe varimi va khoma vatirhi lava, mun’we va mu ba, mun’wani va mu dlaya, se lwemun’wanyani va mu ba hi maribye.+ 36 A tlhela a rhuma vatirhi van’wani va vanyingi ku tlula va ku sungula, kambe va va yendla swa ku fana.+ 37 Hi wugamu, a rhuma n’wana wa yena a ku: ‘Va ta mu hlonipha n’wana wa mina.’ 38 Nkama varimi va nga mu vona, va byelane va ku: ‘Hi lweyi a nga ta sala ni tshomba;+ tanani, a hi mu dlayeni hi ta sala ni nsimu* ya yena!’ 39 Se va mu khoma va mu txukumeta handle ka nsimu ya mawuvha, va mu dlaya.+ 40 Se loko n’winyi wa nsimu ya mawuvha a vuya, a ta va yendla yini varimi lava?” 41 Va hlamula va ku: “Leswi va nga vanhu va ku biha, a ta va helisa hi ndlela ya ku vava swinene naswona a ta siya nsimu ya mawuvha amandleni ya varimi van’wani, lava nga ta mu nyika mihandzu loko nkama wa ku tshovela wu fika.”

42 Yesu a ku: “A mi se tshama mi lerha Matsalwa lama nge: ‘Ribye leli vayaki va nga li yala, hi lona leli nga yendliwa ribye la lisima hintamu.*+ Li ta hi ka Yehovha,* naswona la hi hlamalisa’?+ 43 Hi yona mhaka leyi ni mi byelaka ni ku: Mi ta tekeliwa Mfumu wa Xikwembu wu nyikiwa tiko leli psalaka mihandzu. 44 Naswona lweyi a nga ta wela ka ribye lolelo a ta pshandlaseka.+ Kasi lweyi li nga ta mu wela, li ta mu pshandlasa.”+

45 Nkama vaprista vavakulu ni Vafarisi va nga twa swifaniso swa yena, va tsumbule swaku a a khuluma hi vona.+ 46 Kambe hambileswi a va swi lava ku mu khoma, a va chava xitshungu, hikusa a xi kholwa swaku Yesu i muprofeta.+