Vayavanyisi

21 Vavanuna va tiko la Israyele va funga aMizpa,+ va ku: “A hi nge va nyiki va ka Benjamini vana va hina va tintombhi swaku va va vasati va vona.”+ 2 Se Vayisrayele va ya Betele,+ va fika va tshama phambheni ka Xikwembu xa ntiyiso va rila swinene anze nimadlambu. 3 Va ku: “Yehovha Xikwembu xa Israyele, hi mhaka muni u tshike swilo leswi swi yendleka aIsrayele? Hi mhaka muni lixaka lin’we li fanele li helisiwa namuntlha aIsrayele?” 4 Hi mundzuku wa kona, vanhu va pfuka nimpundzu swinene va yaka altari kolanu swaku va ta yendla magandzelo ya ku hisiwa ni magandzelo ya ku kombela ku rhula.+

5 Se Vayisrayele va vutisa va ku: “I mani ka tinxaka hinkwatu ta Israyele a kalaka a nga tanga nkama hi nga hlengeletana phambheni ka Yehovha?” Va vutise leswo hikusa a va fungile swaku lweyi a kalaka a nga tanga phambheni ka Yehovha aMizpa, a fanele a dlayiwa. 6 Se Vayisrayele va va twela wusiwana vamakwavu va vona va ka Benjamini hi mhaka ya leswi swi nga va humelela, se va ku: “Namuntlha lixaka lin’we li susiwile aIsrayele. 7 Hi ta ku yini swaku lava nga sala va lixaka la Benjamini va kuma vavasati? Phela se hi fungile ka Yehovha+ swaku a hi nge va nyiki vana va hina va tintombhi swaku va va vasati va vona.”+

8 Va vutisa va ku: “I vamani ka tinxaka ta Israyele lava kalaka va nga tanga phambheni ka Yehovha aMizpa?”+ Va kume swaku vanhu va Yabexi-Jiliyadi a va nga yanga lomu vanhu va nga tlhangana kona. 9 Nkama va nga kontela vanhu, va kume swaku lava tshamaka Yabexi-Jiliyadi a va nga li kona. 10 Se Vayisrayele va rhuma 12.000 wa tinhenha swaku ti ya Yabexi-Jiliyadi. Va ti byela va ku: “Fambani mi ya dlaya vanhu hinkwavu va Yabexi-Jiliyadi hi xipada, mi dlaya ni vavasati ni vana.+ 11 Mi fanele mi yendla leswi: Dlayani vavanuna hinkwavu ni vavasati hinkwavu lava nga tshama va famba masangu.” 12 Ka vanhu va Yabexi-Jiliyadi, va kume 400 wa tintombhi ta ku a ti nge se tshama ti famba masangu. Se va ti tisa ka doropa la Xilo,+ leli nga ka tiko la Kanana.

13 Se xitshungu hinkwaxu xi rhuma vanhu va ya ka va ka Benjamini lava a va li ka ribye la Rimoni,+ swaku xi va tivisa swaku nyimpi se yi helile. 14 Hi nkama wolowo va ka Benjamini va tlhela va ya ka tiko la vona. Se va va nyika vavasati lava kalaka va nga va dlayanga nkama va nga dlaya vavasati va le Yabexi-Jiliyadi,+ kambe a va va yenelanga. 15 Vayisrayele va va twela wusiwana va ka Benjamini+ hi mhaka ya leswi nga va humelela, hikusa Yehovha a yendle swaku tinxaka ta Israyele ti yavana. 16 Se madoda lawa a ma rhangela xitshungu ma ku: “Leswi vavasati hinkwavu va ka Benjamini va nga dlayiwa, hi ta yendla yini swaku vavanuna va ka Benjamini lava nga sala va kuma vavasati?” 17 Se va ku: “Vanhu lava nga sala va lixaka la Benjamini, va fanele va tama va tshama ni tshomba la vona swaku ku nga helisiwi ni lixaka ni lin’we aIsrayele. 18 Kambe hina a hi pfumeleliwanga ku va nyika vana va hina va tintombhi swaku va va vasati va vona, hikusa Vayisrayele va fungile va ku: ‘A a rhukiwe lweyi a nga ta pfumela swaku n’wana wa yena a chadiwa hi munhu wa lixaka la ka Benjamini.’”+

19 Va gama va ku: “Lembe ni lembe ku ni fexta* la Yehovha ka doropa la Xilo,+ leli kumekaka norte* ka Betele, ka tlhelo la le wuxeni, ka ndlela yayikulu leyi sukelaka Betele yi ya Xikemi ni sul* wa Lebona.” 20 Se va byela vavanuna va ka Benjamini va ku: “Fambani mi ya tumbela ka masimu ya mawuvha. 21 Se loko mi vona tintombhi ta Xilo ti ta ku txineni, humani ka masimu ya mawuvha, mi titekela vavasati ka tintombhi ta Xilo, mi gama mi tlhelela ka tiko la Benjamini. 22 Se loko vapapayi va vona kumbe vamakwavu va vona va ta va ta khala, hi ta va hlamula hi ku: ‘Hi kombela mi hi twela wusiwana hikusa a hi swi kotanga ku kuma vavasati lava nga va yenela anyimpini+ funtshi n’wina a mi nga ta va nyika vana va n’wina va tintombhi hi mhaka ya leswi mi nga funga.’”+

23 Se vavanuna va ka Benjamini va yendla swoleswo, mun’wani ni mun’wani a titekela nsati ka vavasati lava a va li ku txineni. Va gama va tlhela va ya ka tiko leli nga tshomba la vona va fika va pfuxeta madoropa+ ya vona va tshama ka wona.

24 Kutani Vayisrayele va hangalaka hi nkama wolowo, mun’wani ni mun’wani a ya ka lixaka la yena ni ndjangu wa yena, ka tiko leli nga tshomba la yena.

25 Ka masiku wolawo a ku nga na hosi aIsrayele.+ Mun’wani ni mun’wani a a yendla ku rhandza.*