Mahungu Ya Ku Tsakisa Ya Ku Tsaliwa Hi Marka

2 Kambe loko se ku hundze masikunyana, a tlhelele Kapernawume; kutani vanhu va swi twa swaku a kona kaya.+ 2 Se ku ta vanhu va ku tala swinene ku za ku pfumaleka ni ndhawu hambi hi ka xipfalu; kutani a sungula ku va byela mahungu ya ku tsakisa.+ 3 Se va mu tisela munhu lweyi a a ni trombozi* na a tlakuliwe hi 4 wa vavanuna.+ 4 Kambe leswi a va nga swi koti ku mu fikisa ka Yesu hileswi a ku tale hi vanhu, va hahlula henhla ka yindlo leyi Yesu a a li ka yona, va yehlisa xibedwani lexi a ku yetlele munhu lweyi. 5 Nkama Yesu a nga vona lipfumelo la vona,+ a byela lweyi a a ni trombozi a ku: “N’wananga, swidjoho swa wena swi rivaleliwile.”+ 6 Hi nkama wolowo, a ku ni vatsali van’wani lava a va tshamile kolanu, lava a va vulavula ka timbilu ta vona va ku:+ 7 “Hi mhaka muni munhu lweyi a vulavulisa leswi? A rhuketela Xikwembu. I mani lweyi a nga rivalelaka swidjoho loko ku nga li Xikwembu ntsena?”+ 8 Kambe Yesu a hantla a swi tsumbula leswi a va swi pimisa ka timbilu ta vona se a ku: “Hi mhaka muni mi pimisa swa ku fana ni leswo ka timbilu ta n’wina?+ 9 Ku yampsa yini, ku byela munhu lweyi a nga ni trombozi u ku: ‘U rivaleliwe swidjoho swa wena,’ kumbe ku vula u ku: ‘Pfuka u teka xibedwani xa wena u famba’? 10 Kambe leswaku mi ta swi tiva swaku N’wana wa munhu+ a ni matimba ya ku rivalela swidjoho lani misaveni . . . ”,+ a byela munhu lweyi a a ni trombozi a ku: 11 “Na ku byela: Pfuka u teka xibedwani xa wena u muka.” 12 Se a pfuka, a teka xibedwani xa yena a famba na a voniwa hi vanhu hinkwavu. Se hinkwavu va hlamala kutani va dzunisa Xikwembu va ku: “A hi se tshama hi swi vona swa ku fana ni leswi.”+

13 Siku lin’wani, Yesu a tlhela a ya tlhelweni ka lwandle, se xitshungu xi mu yela, kutani a sungula ku xi djondzisa. 14 Nkama na a famba, a vone Levhi n’wana wa Alfewu na a tshame lani ku hakelisiwaka kona rhesa* se a ku: “Tani u ni landzela.” Se a sekeleka a mu landzela.+ 15 Loko se a li ku dleni* kaya ka Levhi, vahakelisi va ku tala va rhesa ni vadjohi va ta, kutani va sungula ku dla* na Yesu ni vadjondzisiwa va yena hikusa ku tala ka vona a va sungule ku mu landzela.+ 16 Kambe nkama vatsali va ntlawa wa Vafarisi va nga vona swaku a dla ni vadjohi ni vahakelisi va rhesa, va byela vadjondzisiwa va yena va ku: “Hi mhaka muni Mudjondzisi wa n’wina a dla ni vahakelisi va rhesa ni vadjohi?” 17 Nkama Yesu a nga swi twa a ku: “Vanhu lava nga kahle a va lavi dotori kambe dotori a laviwa hi lava vabyaka. A ni telanga ku ta vitana va ku lulama, kambe ku ta vitana vadjohi.”+

18 Vadjondzisiwa va Yohani ni Vafarisi a va titsona swakudla. Kutani va ta ka yena va ku: “Hi mhaka muni vadjondzisiwa va Yohani ni vadjondzisiwa va Vafarisi va titsona swakudla kuve vadjondzisiwa va wena a va titsoni ke?”+ 19 Se Yesu a va hlamula a ku: “Vanghanu va muteki*+ a va na xivangelo xa ku titsona swakudla loko muteki a ha li na vona, a hi swona ke? A va nge titsoni na muteki a ha li na vona. 20 Kambe masiku ma ta lawa muteki a nga ta va a nga ha li kona,*+ se hi nkama wolowo hi kona va nga ta titsona swakudla. 21 A nga kona lweyi a nga rhungaka xitarapu xa nyuwani ka mpahla ya khale. Hikusa loko o yendla leswo, xitarapu xa nyuwani xi nga kokelela mpahla ya khale, se yi handzuka hintamu.+ 22 Naswona a nga kona lweyi a nga chelaka vhinyu la nyuwani ka mabolhela ya khale ya ku yendliwa hi xikhumba.* Hikusa loko o yendla leswo, a vhinyu li ta boxa mabolhela wolawo li halaka, kutani mabolhela ma wonheka. Kambe vhinyu la nyuwani li cheliwa ka mabolhela ya nyuwani.”

23 Hi siku la Savata, nkama Yesu na a hundza hi ka masimu ya trigu, vadjondzisiwa va yena va sungule ku khaya trigu va dla na va famba.+ 24 Kutani Vafarisi va ku: “Hi mhaka muni vadjondzisiwa va wena va yendla leswi tsimbisiwaka hi Savata?” 25 Kambe a va hlamula a ku: “A mi se tshama mi lerha leswi Davhida a nga swi yendla nkama a nga heleliwa hi swakudla, kutani yena ni vavanuna lava a va li na yena va twa ndlala?+ 26 A mi lerhanga swaku a nkama Abiyatari+ a a li muprista wamukulu, Davhida a nghene ka yindlo ya Xikwembu a teka mapawu ya ku kwetsima a dla a tlhela a teka man’wani a ma nyika vavanuna lava a va li na yena, lawa a ku nga na munhu lweyi a a pfumeleliwa ku ma dla loko ku nga li vaprista ntsena?”+ 27 Kutani Yesu a ku: “Savata yi yendleliwe munhu, a hi munhu+ a nga yendleliwa Savata. 28 N’wana wa munhu i Hosi hambi ku li ya Savata.”+