Mahungu Ya Ku Tsakisa Ya Ku Tsaliwa Hi Matewu
9 Kutani a nghena ka boti, a tsemakanya a ya ka doropa leli a a tshama ka lona.+ 2 Se va mu tisela munhu lweyi a a ni trombozi* na a yetlelile ka xibedwani. Loko a vona lipfumelo la vona, Yesu a byela munhu lweyi a a ni trombozi a ku: “Tiya mbilu n’wananga; swidjoho swa wena swi rivaleliwile.”+ 3 Kutani vatsali van’wani va ku: “Munhu lweyi a delela Xikwembu.” 4 Se Yesu, hi ku tiva mimpimiso ya vona a ku: “Hi mhaka muni mi pimisa swa ku biha ka timbilu ta n’wina?+ 5 Ina ka, ku yampsa yini, ku vula u ku: ‘U rivaleliwile swidjoho swa wena’ kumbe ku vula u ku: ‘Pfuka u famba’?+ 6 Kambe leswaku mi ta swi tiva swaku N’wana wa munhu a ni matimba ya ku rivalela swidjoho lani misaveni . . . ”, kutani a byela munhu lweyi a a ni trombozi* a ku: “Pfuka, u teka xibedwani xa wena u muka.”+ 7 Se a pfuka a timukela. 8 Nkama vanhu va nga vona leswo, va chava, kutani va dzunisa Xikwembu lexi nga nyika vanhu matimba wolawo.
9 Nkama Yesu a nga suka kolanu, a ya phambheni, kutani a vona wanuna lweyi a vitaniwaka Matewu na a tshame lani ku hakelisiwaka kona rhesa,* a mu byela a ku: “Tani u ni landzela.” Se a sekeleka a mu landzela.+ 10 Loko Yesu se a li ku dleni* akaya, vahakelisi va ku tala va rhesa ni vadjohi va ta kutani va sungula ku dla* na Yesu ni vadjondzisiwa va yena.+ 11 Kambe nkama Vafarisi va nga swi vona, va vutisa vadjondzisiwa va yena va ku: “Hi mhaka muni mudjondzisi wa n’wina a dla ni vahakelisi va rhesa ni vadjohi?”+ 12 Se nkama Yesu a nga swi twa, a ku: “Vanhu lava nga kahle a va lavi dotori kambe dotori a laviwa hi lava vabyaka.+ 13 Kutani, fambani mi ya djondza ntlhamuselo wa marito lawa: ‘Ni lava timpsalu, ku nga li magandzelo.’+ Hikusa a ni telanga ku ta vitana va ku lulama, kambe ku ta vitana vadjohi.”
14 Se vadjondzisiwa va Yohani va ta ka yena va fika va mu vutisa va ku: “Hi mhaka muni hina ni Vafarisi hi titsona swakudla kuve vadjondzisiwa va wena a va titsoni ke?”+ 15 Se Yesu a va hlamula a ku: “Vanghanu va muteki* a va na xivangelo xa ku rila loko muteki+ a ha li na vona, a hi swona ke? Kambe masiku ma ta lawa muteki a nga ta va a nga ha li kona;*+ se hi kona va nga ta titsona swakudla. 16 A nga kona lweyi a nga rhungaka xitarapu xa nyuwani ka mpahla ya khale, hikusa xitarapu xa nyuwani xi nga kokelela mpahla yoleyo se yi handzuka hintamu.+ 17 Naswona vanhu a va cheli vhinyu la nyuwani ka mabolhela ya khale ya ku yendliwa hi xikhumba,* hikusa loko vo li chela, ma ta pandzeka kutani vhinyu li ta halaka ni mabolhela ma wonheka. Kambe vanhu va chela vhinyu la nyuwani ka mabolhela ya nyuwani, kutani mabolhela ni vhinyu swi ta hlayiseka.”
18 Na a ha va byela swilo leswo, ku ta murhangeli mun’wani a fika a khizama a ku: “Swi nga yendleka n’wana wa mina wa ntombhi se a file nkama lowu; a hi fambi u ya mu tlhateka mavoko leswaku a ta hanya.”+
19 Se Yesu a sekeleka a famba na yena, xikan’we ni vadjondzisiwa va yena. 20 Kutani wansati lweyi se a a ni 12 wa malembe na a hluphiwa hi mavabyi ya ku humetela ngati,+ a ta hi le ndzhaku a fika a khumba ponta ya mpahla ya yena+ 21 hikusa a a tshamela ku tibyela leswi: “Loko no za ni khumba mpahla ya yena ntsena, ni ta hanya.” 22 Yesu a ndzuluka kutani loko a mu vona, a ku: “Tiya mbilu n’wananga! Lipfumelo la wena li ku hanyisile.”+ Ku sukela hi nkama wolowo, wansati a va kahle.+
23 Se nkama a nga fika kaya ka murhangeli wa sinagoga,* a vona vanhu na va chaya tinsimu* ta swirilo, ni xitshungu na xi rila hintamu,+ 24 Yesu a ku: “Humani lomu, hikusa xintombhani lexi a xi fanga, kambe xi yo yetlela.”+ Se va sungula ku mu hleka swinene. 25 Loko xitshungu se xi humesiwe handle, Yesu a nghena a khoma voko la xintombhana,+ kutani xi pfuka.+ 26 Mhaka leyi yi hangalake ka muganga wolowo hinkwawu.
27 Nkama Yesu na a hundza hi ndlela, vavanuna vambirhi lava nga fa matihlo+ va mu landza, na va huwelela va ku: “N’wana wa Davhida hi tweli wusiwana.” 28 Loko se a nghene ndlwini, vavanuna lava nga fa matihlo va mu tela, kutani a va vutisa a ku: “Ma kholwa swaku ni nga swi kota ku mi hanyisa?”+ Va mu hlamula va ku: “Ina Hosi.” 29 Se a khumba matihlo ya vona,+ a ku: “A swi yendleki hi ku ya hi lipfumelo la n’wina.” 30 Kutani va sungula ku vona. Se Yesu a va byela a ku: “Mi nga byeli munhu mhaka leyi.”+ 31 Kambe loko va humile, va sungula ku byeletela vanhu hinkwaswu leswi a nga va yendlela swona ka ndhawu yoleyo hinkwayu.
32 Kutani loko va suka, vanhu va mu tisela mbheveve leyi nga ni dimoni;+ 33 kambe nkama dimoni li nga hlongoliwa, mbheveve yi sungula ku vulavula.+ Se vanhu va hlamala va ku: “A hi se tshama hi swi vona swa ku fana ni leswi aIsrayele.”+ 34 Kambe Vafarisi va sungula ku vula va ku: “A hlongola madimoni hi hosi ya madimoni.”+
35 Kutani Yesu a famba ka madoropa ni ka swidoropani hinkwaswu, a djondzisa ka masinagoga ni ku chumayela mahungu ya ku tsakisa ya Mfumu ni ku hanyisa mavabyi ni ku limala ka mixaka hinkwayu.+ 36 Nkama a nga vona xitshungu,+ a xi twele wusiwana hikusa a xi hluphiwa, xi pepetsekisiwa ku fana ni tinyempfu ta ku kala ti nga na murisi.+ 37 Kutani a byela vadjondzisiwa va yena a ku: “Phela ntshovelo i wukulu, kambe vatirhi i vatsongo.+ 38 Hi mhaka leyo, kombelani N’winyi wa ntshovelo swaku a rhumela vatirhi ka ntshovelo wa yena.”+