Mahungu Ya Ku Tsakisa Ya Ku Tsaliwa Hi Yohani

8 12 Se Yesu a tlhela a khuluma na vona a ku: “Hi mina ku vonakala ka misava.+ Lweyi a ni landzelaka a nge zi a famba ka munyama, kambe a ta va ni ku vonakala+ ka wutomi.” 13 Kutani Vafarisi va ku: “Wena u byela vanhu hi ta wena; kambe leswi u swi vulaka a hi ntiyiso.” 14 Yesu a va hlamula a ku: “Hambi ni byela vanhu hi ta mina, leswi ni swi vulaka i ntiyiso hikusa na ku tiva lomu ni taka hi kona ni lomu ni yaka kona.+ Kambe n’wina a mi ku tivi lomu ni taka hi kona ni lomu ni yaka kona. 15 Mi yavanyisa hi ku ya hi mavonelo ya vanhu,+ kambe mina a ni yavanyisi munhu. 16 Funtshi hambiloko ni yavanyisa, ni yavanyisa hi ntiyiso hikusa a ni noxe, kambe Papayi lweyi a nga ni rhuma a na mina.+ 17 Naswona ka Nawu wa n’wina ku tsaliwe leswi: ‘Wufakazi la vanhu vambirhi li tiyile.’+ 18 Leswi ni swi vulaka hi mina i ntiyiso naswona Papayi lweyi a nga ni rhuma a nyima na swona.”+ 19 Se va ku: “A kwini Papayi wa wena?” Yesu a va hlamula a ku: “Leswi mi kalaka mi nga ni tivi ni Papayi wa mina a mi mu tivi.+ Loko a mo ni tiva ni Papayi wa mina a mi ta mu tiva.”+ 20 Yesu a vulavule marito lawa na a djondzisa tempeleni lani ku vekiwaka kona male.+ Kambe a nga kona lweyi a nga mu khoma hikusa nkama wa yena a wu nge se fika.+

21 A tlhela a ku: “Na famba, mi ta ni lavetela kambe mi ta fela ka xidjoho xa n’wina.+ A mi nge fiki lomu ni yaka kona.”+ 22 Kutani Vayuda va ku: “Indjhe a ngo lava ku tisunga? Hikusa a li: ‘A mi nge fiki lomu ni yaka kona.’” 23 A tlhela a ku: “N’wina mi va lani hansi; mina ni wa le henhla.+ N’wina mi va misava leyi; kambe mina a ni wa misava leyi. 24 Hi yona mhaka leyi ni nge: Mi ta fela ka swidjoho swa n’wina. Loko mi nga kholwi swaku ni yena, impela mi ta fela ka swidjoho swa n’wina.” 25 Se va ku: “Hi wena mani?” Yesu a va hlamula a ku: “Swi ngo, no tihetela nkama hi ku vulavula na n’wina? 26 Ni ni minchumu ya ku tala ya ku yi vula hi n’wina ni ku mi yavanyisa. Phela Lweyi a nga ni rhuma a vulavula ntiyiso naswona leswi ni mi byelaka swona swi ta hi ka yena.”+ 27 A va nga swi twisisi swaku a khuluma hi Papayi. 28 Se Yesu a ku: “A nkama mi nga ta hayeka N’wana wa munhu+ ka mhandzi, hi kona mi nga ta swi tiva swaku ni yena+ ni swaku leswi ni swi yendlaka a ni yo swi sukela;+ kambe leswi ni mi byelaka swona ni djondzisiwe hi Papayi wa mina. 29 Lweyi a nga ni rhuma a na mina; a nga ni tshikanga noxe hikusa nkama hinkwawu ni yendla leswi mu tsakisaka.”+ 30 Na a ha vula swilo leswi va ku tala va ve ni lipfumelo ka yena.

31 Kutani Yesu a byela Vayuda lava nga kholwa ka yena a ku: “Loko mi yingisa leswi ni swi vulaka mi vadjondzisiwa va mina hikakunene, 32 mi ta tiva ntiyiso+ kutani ntiyiso wu ta mi chunsa.”+ 33 Lavan’wani va ku: “Hina hi vana va Abrahamu naswona a hi se tshama hi va swikarawa swa munhu. Se hi mhaka muni u ku: ‘Mi ta chunseka’?” 34 Yesu a va hlamula a ku: “Ni mi byela ntiyiso: Lweyi a yendlaka xidjoho i xikarawa xa xidjoho.+ 35 Naswona xikarawa a xi tshami muntini hi masiku ni masiku; kambe n’wana a tshama hi masiku ni masiku. 36 Kutani loko N’wana a mi chunsa, impela mi ta chunseka. 37 Na swi tiva swaku mi vana va Abrahamu. Kambe mi lava ku ni dlaya hikusa leswi ni swi vulaka a swi vuli nchumu ka n’wina. 38 Ni mi byela leswi ni nga swi vona nkama na na ha li na Papayi wa mina,+ kambe n’wina mi yendla minchumu leyi mi nga yi twa ka papayi wa n’wina.” 39 Se va mu hlamula va ku: “Papayi wa hina i Abrahamu.” Yesu a ku: “Loko a mi li vana va Abrahamu+ a mi ta yendla mintirho ya Abrahamu. 40 Kambe swoswi mi lava ku ni dlaya, mina lweyi ni nga mi byela ntiyiso lowu ni nga wu twa ka Xikwembu.+ Abrahamu a nga swi yendlanga leswo. 41 Mi yendla mintirho ya papayi wa n’wina.” Se va ku: “Hina a hi psaliwanga wugelegeleni;* hi ni Papayi mun’we, ku nga Xikwembu.”

42 Yesu a ku: “Loko Xikwembu a xi li Papayi wa n’wina, a mi ta ni rhandza,+ hikusa ni ta hi ka xona. A ni yo swi sukela ni ta, kambe hi Xona xi nga ni rhuma.+ 43 Se hi mhaka muni mi nga swi twisisi leswi ni mi byelaka swona? Hikusa a mi swi yingisi leswi ni swi vulaka. 44 Papayi wa n’wina i Davulosi naswona mi lava ku yendla ku rhandza ka yena.+ A a li mudlayi ku sukela nkama lowu a nga hembela Xikwembu.+ A nga tshamanga ntiyisweni hikusa a nga na ntiyiso. Loko a hemba, a hemba swi huma mbilwini, hikusa i muhembi ni papayi wa mavunhwa.+ 45 Mina ni mi byela ntiyiso kambe a mi kholwi ka mina. 46 I mani ka n’wina lweyi a nga kombisaka xidjoho xa mina? Loko ku li swaku ni vulavula ntiyiso, hi mhaka muni mi nga kholwi ka mina? 47 Lweyi a taka hi ka Xikwembu wa yingisa leswi Xikwembu xi mu byelaka swona.+ N’wina a mi yingisi hikusa a mi ti hi ka Xikwembu.”+

48 Vayuda va mu hlamula va ku: “A hi vulanga ntiyiso loko hi ku: ‘U Musamariya+ naswona u ni dimoni’?”+ 49 Yesu a hlamula a ku: “A ni na dimoni. Mina ni hlonipha Papayi wa mina, kambe n’wina a mi ni hloniphi. 50 A ni tilaveli ku dzunisiwa;+ kambe a kona Lweyi a faneleke a dzunisiwa naswona hi yena a yavanyisaka. 51 Ni mi byela ntiyiso: Lweyi a yingisaka leswi ni swi vulaka a nge tshuki a fa.”+ 52 Vayuda va ku: “Swoswi ha swi tiva swaku u ni dimoni. Abrahamu a file ni vaprofeta va file kambe wena u li: ‘Lweyi a ni yingisaka a nge tshuki a fa.’ 53 U lava ku vula swaku u mukulu ka papayi wa hina Abrahamu lweyi a nga fa? Vaprofeta na vona va file. Se u pimisa swaku wo va mani wena?” 54 Yesu a hlamula a ku: “Loko ni tidzunisa, a swi pfuni nchumu. Papayi hi yena lweyi a ni dzunisaka,+ yena lweyi mi ngo i Xikwembu xa n’wina. 55 N’wina a mi mu tivi,+ kambe mina na mu tiva.+ Naswona loko no vula swaku a ni mu tivi ni ta va muhembi ku fana na n’wina. Kambe na mu tiva naswona na mu yingisa. 56 Papayi wa n’wina Abrahamu a a li nyimela hi ku tsaka siku leli a ni ta ta hi lona. A li vonile siku lolelo kutani a tsaka.”+ 57 Se Vayuda va ku: “Hambi 50 wa malembe a wu se na tlhanganisa, kambe u li u vone Abrahamu?” 58 Yesu a ku: “Ni mi byela ntiyiso: Ni ve kona na Abrahamu a nge se psaliwa.”+ 59 Se va rholela maribye leswaku va mu djikidjela, kambe Yesu a tumbela a gama a huma tempeleni.