Vakorinto Va Ku Sungula

9 A ni chunsekanga ke? A ni mupostolo ke? A ni mu vonanga Yesu Hosi ya hina ke?+ A hi n’wina mihandzu ya ntirho wa mina Hosini? 2 Hambi ni nga li mupostolo ka van’wani, ni mupostolo ka n’wina! Hikusa n’wina mi karimbu leyi tiyisekisaka swaku ni mupostolo aHosini.

3 Se lava ni solaka ni va hlamula leswi: 4 A hi na mfanelo ya ku dla ni ku phuza ke? 5 A hi na mfanelo ya ku fambafamba ni nsati lweyi a nga Mukreste*+ loko hi yendza, ku fana ni vapostolo lavan’wani hinkwavu ni vamakwavu va Hosi+ na Khefasi*+ ke? 6 Kumbe ko va mina na Barnaba+ ntsena lava hi faneleke hi tirha swaku hi tihanyisa? 7 Hi lini sonchwa leli tihakelelaka loko li li nyimpini? I mani lweyi a rimaka nsimu ya mawuvha kambe a nga dli mihandzu ya kona ke?+ Kumbe i mani lweyi a lusaka ntlhambi kambe a nga phuzi leiti la kona ke?

8 Leswi ni swi vulaka o va mavonelo ya vanhu ke? Nawu a wu swi vuli swilo leswi? 9 Hikusa ka Nawu wa Moxe ku tsaliwe leswi: “U nga pfali nomo wa homu loko yi hula trigu.”*+ Mi pimisa swaku Xikwembu xo va ni mhaka ni tihomu ntsena? 10 Kumbe xi vula leswo ni hi mhaka ya hina? Vhela xi vule leswo hi mhaka ya hina, hikusa munhu lweyi a rimaka ni munhu lweyi a hulaka va fanele va tirha na va tshemba swaku va ta kuma xanchumu.

11 Loko hi byale swilo leswi humaka ka Xikwembu axikarhi ka n’wina, swi bihile kuva mi hi pfuna hi leswi hi swi pfumalaka ke?+ 12 Loko van’wani va ni mfanelo ya ku wundliwa hi n’wina, hina a hi na mfanelo ya ku va tlula ke? Kambe a hi yi tirhisanga mfanelo leyi,+ hi tiyisela swilo hinkwaswu leswaku hi nga pfaleli mahungu ya ku tsakisa hi ta Kreste.+ 13 A mi swi tivi swaku vanhu lava tirhaka tempeleni va dla swilo leswi nga tempeleni, ni leswaku lava tirhaka ka altari nkama ni nkama va kuma swin’wani swa leswi nga nyikeliwa ka altari?+ 14 Se Hosi yi nyikele nawu wa leswaku lava chumayelaka mahungu ya ku tsakisa va tihanyisa hi mahungu ya ku tsakisa.+

15 Kambe mina a ni mi kombelanga nchumu.+ Naswona a ni tsali leswi swaku mi ni yendlela xanchumu, hikusa a swi ta yampsa swaku ni fa ku tlula . . . A nga kona lweyi a nga ta ni tekela mfanelo ya mina ya ku tibuma!+ 16 Loko ni chumayela mahungu ya ku tsakisa a ni fanelanga ni tibuma hikusa hi leswi ni faneleke ni swi yendla. Phela ni le nghozini loko ni nga chumayeli mahungu ya ku tsakisa!+ 17 Loko ni chumayela hi ku swi rhandza, ni ta holeliwa; kambe hambi ni nga chumayeli hi ku swi rhandza, na ha nyikiwile ntirho lowu.+ 18 Se ni ganya yini? Ni ganya ku chumayela mahungu ya ku tsakisa na ni nga hakeliwi nchumu, swaku ni nga yi tirhisi hi ndlela ya ku biha mfanelo ya mina ya ku va muchumayeli wa mahungu ya ku tsakisa.

19 Hambileswi ni kalaka ni nga li xikarawa xa munhu, ni tiyendla xikarawa xa hinkwavu leswaku ni ta kota ku koka vanhu va vanyingi swinene. 20 Ka Vayuda ni tiyendle Muyuda swaku ni ta kota ku koka Vayuda;+ ka lava nga hansi ka Nawu wa Moxe ni tiyendle lweyi a nga hansi ka Nawu wa Moxe, swaku ni ta kota ku koka lava nga hansi ka Nawu, hambileswi mina ni kalaka ni nga li hansi ka Nawu wa Moxe.+ 21 Ka lava kalaka va nga landzeli Nawu wa Moxe ni tiyendle lweyi a kalaka a nga landzeli Nawu wa Moxe, leswaku ni ta kota ku koka lava kalaka va nga landzeli Nawu, hambileswi mina ni landzelaka Nawu wa Xikwembu ni wa Kreste.+ 22 Ka lava kalaka va nga tiyanga ni tiyendle wa ku kala a nga tiyanga, leswaku ni ta kota ku koka va ku kala va nga tiyanga.+ Ni ve swilo hinkwaswu ka vanhu va mixaka hinkwayu, leswaku hi tindlela hinkwatu ni ta kota ku ponisa van’wani. 23 Kambe ni yendla hinkwaswu leswi hi mhaka ya mahungu ya ku tsakisa, swaku ni ma byela van’wani.+

24 A mi swi tivi swaku lava nga ka mpalisanu wa ku tsutsuma, va tsutsuma hinkwavu, kambe i mun’we ntsena lweyi a ganyaka? Tsutsumani hi ndlela leyi nga ta yendla swaku mi ganya.+ 25 Kutani hinkwavu lava nghenaka ka mpalisanu va tikhoma ka minchumu hinkwayu. Phela va yendla leswo swaku va ta kota ku kuma harhi* leyi wonhekaka,+ kambe hina hi swi yendlela ku kuma harhi ya ku kala yi nga wonheki.+ 26 Hi mhaka leyo, mina a ni tsutsumi swa muhulahula;+ hambi swibakela swa mina a ni swi hoxeteli swaku swi ba moya; 27 kambe ni ba* muzimbha wa mina+ ni wu yendla xikarawa, swaku mina yelweyi ni chumayelaka van’wani, ni nga gami ni yaliwa* hi Xikwembu.