Tinhlayo

32 Vana va Rubeni+ ni vana va Gadi+ a va ni swifuyu swa swinyingi, se va vona swaku tiko la Yazeri+ ni la Jiliyadi a ku li ndhawu yayinene ya swifuyu. 2 Va gama va ya ka Moxe na muprista Eliyazari ni varhangeli, va fika va ku: 3 “Madoropa ya Ataroti, Diboni, Yazeri, Nimira, Exiboni,+ Elele, Sebami, Nebo+ ni Beyoni,+ 4 ndhawu leyi Yehovha a nga yi hlulela Vayisrayele+ i ndhawu yayinene ya swifuyu naswona hina vatirhi va wena hi ni swifuyu swa swinyingi.”+ 5 Va tlhela va ku: “Loko u swi pfumelela, ndhawu leyi a yi nyikiwe vatirhi va wena swaku yi va tshomba la vona. U nga hi tlulelisi Nambu wa Yordani.”

6 Se Moxe a vutisa vana va Gadi ni vana va Rubeni a ku: “Indjhe vamakwenu va ta ya nyimpini kuve n’wina mo tshama lani? 7 Hi mhaka muni mi lava ku heta Vayisrayele matimba swaku va nga ngheni ka tiko leli Yehovha a nga ta va nyika lona ke? 8 Phela hi leswo vapapayi va n’wina va nga swi yendla nkama ni nga va rhuma va suka Kadexi-Barneya swaku va ya kambela tiko.+ 9 Nkama va nga fika ka Nkova wa Exikoli+ va vona tiko, va hete Vayisrayele matimba swaku va nga yi ka tiko leli Yehovha a a ta va nyika lona.+ 10 Yehovha a a kwate ngopfu hi siku lelo a za a funga a ku:+ 11 ‘Vavanuna lava va nga huma ka tiko la Gibita va ku sukela ka 20 wa malembe ku ya henhla, a va nga ta li vona tiko+ leli ni nga li fungela Abrahamu, Izaki na Yakobe,+ hikusa a va ni landzelanga hi mbilu ya vona hinkwayu, 12 ku to nghena ntsena Kalebe+ n’wana wa Yefune wa Mukenizi na Yoxuwa+ n’wana wa Nuni, hikusa va landzele Yehovha hi timbilu ta vona hinkwatu.’+ 13 Se Yehovha a kwatela Vayisrayele kutani a va rhendzelekisela mananga ku ringana 40 wa malembe,+ anze vanhu hinkwavu lava a va yendla swilo swa ku biha ka Yehovha va hela va ku jii.+ 14 Na n’wina mi tekelele vapapayi va n’wina, mi vadjohi lava va yendlaka swaku Yehovha a va kwatela hintamu Vayisrayele. 15 Loko mi nga mu landzeli, a ta tlhela a va tshika mananga, mi ta yendla swaku vanhu lava hinkwavu va weliwa hi khombo.”

16 Va game va tlhelela ka yena va fika va ku: “Hi pfumeleli hi yakela swifuyu swa hina swib’ala hi maribye, hi tlhela hi yakela vana va hina madoropa. 17 Kambe hi ta tshama hi lunghekile ku lwa nyimpi+ naswona hi ta famba ni Vayisrayele anze hi va fikisa lomu va yaka kona, kasi vana va hina va ta sala ka madoropa lawa ma nga ni mimuru, va hlayisekile ka vanhu lava tshamaka ka tiko leli. 18 A hi nge tlheleli makaya ka hina anze Vayisrayele hinkwavu va kuma ndhawu leyi nga tshomba la vona.+ 19 Hikusa a hi nga ta kuma tshomba na vona ka tlhelo lelin’wani la Nambu wa Yordani, hikusa hi kume tshomba la hina awuxeni ka Yordani.”+

20 Moxe a va hlamula a ku: “Loko mo yendla leswi: Mi khoma matlharhi mi ya lwa+ hi ku landza leswi Yehovha a nga swi hlaya; 21 naswona loko hinkwenu mo khoma matlharhi, mi tlulela nambu wa Yordani na Yehovha a swi vona, naswona na a li ku hlongoleni ka valala va yena lava va nga phambheni ka yena+ 22 anze tiko li hluliwa phambheni ka Yehovha,+ se hi kona mi nga ta vuya+ naswona mi ta va mi nga ha li na nandzu phambheni ka Yehovha ni ka Vayisrayele. Kutani tiko leli li ta va tshomba la n’wina phambheni ka Yehovha.+ 23 Kambe loko mo kala mi nga swi yendli leswi, mi ta va mi djohele Yehovha. Se mi ta khatisiwa hi mhaka ya xidjoho xa n’wina. 24 Kutani mi nga va yakela madoropa vana va n’wina, mi tlhela mi yakela mintlhambi ya n’wina swib’ala,+ kambe mi fanele mi yendla leswi mi nga swi tshembisa.”

25 Vana va Gadi ni vana va Rubeni va byela Moxe va ku: “Vatirhi va wena va ta yendla leswi hosi ya hina yi nga swi hlaya. 26 Vana va hina, vasati va hina, mintlhambi ni swifuyu swa hina hinkwaswu swi ta tshama ka madoropa ya Jiliyadi,+ 27 kambe vatirhi va wena va ta tlulela nambu, wanuna mun’wani ni mun’wani na a khomile matlharhi swaku a ya lwela Yehovha,+ hi ku landza leswi hosi ya hina yi nga swi hlaya.”

28 Se Moxe a nyika minawu muprista Eliyazari, Yoxuwa n’wana wa Nuni ni varhangeli va mindjangu ya tinxaka ta Israyele. 29 Moxe a va byela a ku: “Loko vana va Gadi ni vana va Rubeni vo tlulela na n’wina Nambu wa Yordani, na vavanuna hinkwavu va lunghekile ku lwa nyimpi phambheni ka Yehovha, se tiko li hluliwa phambheni ka n’wina, mi ta gama mi va nyika tiko la Jiliyadi swaku li va tshomba la vona.+ 30 Kambe loko vo kala va nga khomi matlharhi va tlulela na n’wina nambu, va ta tshama na n’wina ka tiko la Kanana.”

31 Se vana va Gadi ni vana va Rubeni va hlamula va ku: “Hi ta yendla leswi Yehovha a nga swi byela vatirhi va wena. 32 Hi ta khoma matlharhi hi tlulela nambu hi ya lwela Yehovha ka tiko la Kanana,+ kambe tshomba la hina li le ka tlhelo leli la Yordani.” 33 Kutani Moxe a nyika vana va Gadi, vana va Rubeni+ ni hafu ya lixaka la Manasi+ n’wana wa Yosefa mfumu wa Sihoni+ hosi ya Vaamori ni mfumu wa Ogi+ hosi ya Baxani, ku nga tiko leli nga ni madoropa lawa ma lumbaka ndhawu yoleyo ni madoropa lawa ma nga yakiwa kusuhi na lona.

34 Se vana va Gadi va yaka* doropa la Diboni,+ Ataroti,+ Arowa,+ 35 Atroti-Xofani, Yazeri,+ Yogibeya,+ 36 Beti-Nimira+ ni Beti-Harani,+ ku nga madoropa lawa a ma ni mimuru, va tlhela va yakela swifuyu swa vona swib’ala hi maribye. 37 Vana va Rubeni va yake doropa la Exiboni,+ Elele,+ Kiriyatayimi,+ 38 Nebo+ ni Bali-Meyoni,+ mavito ya wona ma txintxiwile, va yaka ni Xibima; kutani va gama va sungula ku txintxa mavito ya madoropa lawa va nga ma yaka.*

39 Vana va Makiri+ n’wana wa Manasi va hlasela doropa la Jiliyadi va li teka kutani va hlongola Vaamori lava a va tshama kolanu. 40 Se Moxe a nyika Makiri n’wana wa Manasi doropa la Jiliyadi, a gama a sungula ku tshama ka lona.+ 41 Yayiri n’wana wa Manasi a hlasela swidoropani swa Jiliyadi, a swi teka a gama a swi chula vito a ku i Avhoti-Yayiri.*+ 42 Noba a hlasela doropa la Kenati ni swidoropani leswi nga kusuhi na lona kutani a swi chula vito la yena la Noba.