Vayavanyisi

8 Se masonchwa ya lixaka la Efrayimi ma byela Gidiyoni ma ku: “Hi mhaka muni u yendle leswi? Hi mhaka muni u nga hi vitananga nkama u nga lwa ni Vamidiyani?”+ Se ma sungula ku mu holovisa.+ 2 Kambe a ma hlamula a ku: “Leswi ni nga swi yendla swo va swa yini loko swi pimanisiwa ni leswi n’wina mi nga swi yendla? Phela leswi n’wina vana va Efrayimi+ mi nga swi yendla, i swikulu hintamu ku tlula minchumu yayinene leyi hina vana va Abiyezeri+ hi nga yi yendla! 3 Xikwembu xi nyikele Orebi na Zebe,+ varhangeli va Vamidiyani ka mavoko ya n’wina, se leswi mina ni nga swi yendla swo fika kwini loko swi pimanisiwa ni leswi n’wina mi nga swi yendla?” A nkama masonchwa ya Efrayimi ma nga twa leswo ma tshika ku mu holovisa.

4 Gidiyoni a fika a tsemakanya Nambu wa Yordani. Yena ni 300 wa masonchwa lawa a ma li na yena a va yo pfotlo hi ku karhala, kambe a va tshikanga ku hlongolisa valala va vona. 5 Se a byela vavanuna va Sukoti a ku: “Ni kombela mi nyika masonchwa ya mina mapawu hikusa a ma ha gwenti, naswona ma karhalile. Hi le ku hlongoliseni ka Zeba na Zalmuna, tihosi ta Vamidiyani.” 6 Kambe varhangeli va Sukoti va mu hlamula va ku: “Se u yo va khoma Zeba na Zalmuna wa kona, swaku hi za hi nyika mapawu masonchwa ya wena?” 7 Se Gidiyoni a ku: “Hi n’wina mi hlayaka leswo, loko Yehovha o tshuka a nyikela Zeba na Zalmuna ka mavoko ya mina, ku vuya ni vuyaka ni ta mi kwapa hi mimintwa ya khwati.”+ 8 Se a suka kolanu a ya Penuwele, na kona a fika a kombela mapawu, se na vona vavanuna va le Penuwele va mu hlamula ku fana ni leswi va nga mu hlamulisa xiswona vavanuna va le Sukoti. 9 A gama a byela vavanuna va le Penuwele a ku: “Loko no ya hlula seniyani ni yaka kona, ku vuya ni vuyaka, a prediyu* leli ni ta li diliza.”+

10 Zeba na Zalmuna a va li Karkori ni masonchwa ya vona ya kolomuyani ka 15.000. A masonchwa lawa, hi lawa ma nga sala ka masonchwa hinkwawu ya vanhu lava taka hi ka tlhelo la le wuxeni,+ hikusa se a ku dlayiwe 120.000 wa masonchwa lawa a ma ni swipada. 11 Gidiyoni a fambe hi ndlela leyi a yi tirhisiwa hi lava tshamaka ka matende hi ka tlhelo la le wuxeni aNoba ni Yogibeya.+ Se a va hlasela na va nga swi nyimelanga. 12 A nkama tihosi timbirhi ta Vamidiyani ku nga Zeba na Zalmuna a ti li ku balekeni, a ti txatxile a za a ti khoma; leswo swi yendle swaku masonchwa ya tona hinkwawu ma sungula ku chava.

13 Se Gidiyoni n’wana wa Yowaxi a vuya hi le nyimpini, a famba hi ndlela leyi yaka Eresi. 14 Na wa ha li ndleleni a khome djaha lin’wani la le Sukoti a li hamba swivutiso. Se djaha leli li mu tsalela mavito ya varhangeli ni madoda ya le Sukoti; hinkwavu a va li 77 wa vavanuna. 15 Se a yela vavanuna va le Sukoti a fika a va byela leswi: “Hi lweyi Zeba na Zalmuna lava mi nga ni poyila hi mhaka ya vona mi ku: ‘Se u yo va khoma Zeba na Zalmuna wa kona, swaku hi za hi ma nyika mapawu masonchwa ya wena?’”+ 16 A teka madoda ya doropa, a gama a laya vavanuna va le Sukoti hi ku va kwapa hi mimintwa ya nhova.+ 17 A dilizela prediyu la doropa la Penuwele,+ a gama a dlaya vavanuna va kona.

18 Gidiyoni a vutisa Zeba na Zalmuna a ku: “A va tshamise ku yini vavanuna lava mi nga va dlaya aTabori?” Se va mu hlamula va ku: “A va fana na wena, hinkwavu ka vona a va fana ni n’wana wa hosi.” 19 Se a va byela a ku: “Phela a va li vamakwerhu, a va li vana va mamani. Na funga hi vito la Yehovha Xikwembu lexi hanyaka swaku loko a mi nga va dlayanga, na mina a ni nga ta mi dlaya.” 20 A gama a byela Yeteri n’wana wa yena wa matevula a ku: “Vuya halenu u ta va dlaya.” Kambe Yeteri a nga xi humesanga xipada xa yena swaku a va dlaya; a a chava hikusa a a ha li mutsongo. 21 Se Zeba na Zalmuna va ku: “Loko u li wanuna hi dlayi hi wexe.” Se Gidiyoni a dlaya Zeba na Zalmuna,+ a gama a teka minchumu ya ku sasekisa hi yona ya ku fana ni n’weti leyi a yi li ka tinhamu ta makamela ya vona.

22 Vavanuna va Israyele va gama va byela Gidiyoni va ku: “Hi kombela swaku wena ni vana va wena ni vatukulu va wena mi hi fuma, hikusa u hi ponisile ka Vamidiyani.”+ 23 Gidiyoni a va hlamula a ku: “A ni nga ta mi fuma, hambi ku li n’wana wa mina a hi yena a nga ta mi fuma, kambe i Yehovha lweyi a nga ta mi fuma.”+ 24 A tlhela a ku: “Ni pfumeleleni ni mi kombela nchumu: Mun’wani ni mun’wani wa n’wina a a ni nyiki xitlan’wani xa yena xa nhompfu lexi a nga xi tekela valala va yena.” (A va ni switlan’wani ka tinhompfu, hikusa a va li Vaismayeli.)+ 25 Se va mu byela va ku: “Hi ta ku nyika swona.” Va gama va yandlala panu. Mun’wani ni mun’wani a hoxa ka panu xitlan’wani xa nhompfu lexi a nga xi tekela valala va yena. 26 Switlan’wani hinkwaswu swa woru swa le ka tinhompfu leswi a nga swi kombela, a swi peza 19 wa makilu,* na ku nga kontiwi minchumu ya ku sasekisa hi yona leyi a yi yendliwe ku fana ni n’weti, switlan’wani, mpahla ya mavoya ya kori ya ku pshuka leyi a yi yambaliwa hi tihosi ta Vamidiyani ni ma kolari* ya makamela.+

27 Se Gidiyoni a yendla xifaniso xa efodi,* hi woru leli,+ a gama a ya xi veka ka doropa la yena la Ofira;+ Vayisrayele hinkwavu va gama va sungula ku xi gandzela+ xi gama xi va ntlhamu ka yena ni ka va ndjangu wa yena.+

28 Vamidiyani+ va hluliwe hi Vayisrayele naswona a va ha tlhelanga va lwa na vona. Ka masiku ya Gidiyoni, ku game ku va ni ku rhula ka tiko hinkwalu la Israyele 40 wa malembe.+

29 Se Yerubali+ n’wana wa Yowaxi a tlhelela kaya ka yena a ya tshama kona.

30 Gidiyoni a va ni 70 wa vana hikusa a a ni vavasati va vanyingi. 31 Nsati wa yena wamutsongo* lweyi a a tshama Xikemi a mu psalele n’wana wa djaha, a gama a mu chula swaku i Abimeleki.+ 32 Se Gidiyoni n’wana wa Yowaxi a fa na a gugile hintamu naswona na a tikhorisile hi wutomi, va gama va ya mu lahla ka sirha la papayi wa yena Yowaxi aOfira ka tiko la Vabiyezeri.+

33 Loko Gidiyoni se a file, Vayisrayele va tlhele va sungula ku gandzela Vabali.+ Va lange Bali-Beriti swaku a va xikwembu xa vona.+ 34 Vayisrayele va khohlwe Yehovha Xikwembu xa vona,+ lweyi a nga va ponisa ka valala va vona hinkwavu;+ 35 naswona a va tshembekanga ka ndjangu wa ka Vayerubali, ku nga Gidiyoni, swaku va khensa minchumu hinkwayu yayinene leyi a nga va yendlela yona.+