Samuwele Wa Ku Sungula

25 Hi ku famba ka nkama Samuwele+ a file; se Vayisrayele hinkwavu va tlhangana swaku va mu rila va tlhela va ya mu lahla ka doropa la yena aRama.+ Se Davhida a suka a ya mananga ya Parani.

2 A ku ni wanuna mun’wani aMawoni+ lweyi a a tirhela aKarmeli.+ Wanuna lweyi a a ganyile hintamu; a a ni 3.000 wa tinyempfu ni 1.000 wa timbuti. Hi nkama wolowo a a tsemeta tinyempfu ta yena aKarmeli.* 3 Vito la wanuna yelweyo a ku li Nabali,+ kasi nsati wa yena a ku li Abigayili.+ Abigayili a a tlharihile a tlhela a saseka, kambe nuna wa yena a a li wa ndjangu wa Kalebe,+ naswona a a karhata a tlhela a va ni mahanyelo ya ku biha.+ 4 Davhida a swi twa na a li mananga swaku Nabali a a tsemeta tinyempfu. 5 Kutani Davhida a rhuma 10 wa madjaha a ma byela a ku: “Fambani Karmeli. Loko mi fika ka Nabali, mu pfuxeleni hi vito la mina 6 mi gama mi ku: ‘Hi navela swaku u hanya nkama wa ku leha ni leswaku wena ni ndjangu wa wena ni minchumu hinkwayu leyi u nga na yona mi va ni ku rhula. 7 Ni swi twile swaku u le ku tsemeteni ka tinyempfu. A nkama valusi va tinyempfu ta wena a va li na hina, a hi va hluphanga+ naswona a va luzekeliwanga hi nchumu nkama hinkwawu lowu a va li Karmeli. 8 Vutisa vatirhi va wena, va ta ku byela. Ni kombela u va ni timpsalu ka madjaha ya mina, hikusa hi te hi nkama wa ku tsaka.* Ni kombela u hi nyika xin’wani ni xin’wani lexi u nga na xona.’”+

9 Se madjaha ya Davhida ma ya ka Nabali ma fika ma mu byela hinkwaswu leswi Davhida a nga ma rhuma swona. A nkama ma nga gama ku vulavula, 10 Nabali a ma hlamula a ku: “Davhida wa kona o va mani? Naswona n’wana wa Yese i mani ke? Phela ka masiku ya namuntlha vatirhi va vanyingi va rhandza ku baleka vapatrao va vona.+ 11 No hlanya, swaku ni nga teka pawu la mina ni mati ya mina ni nyama leyi ni nga yi dlayela vatirhi va mina, ni swi nyika vanhu va ku a ni va tivi swaku va ta hi kwini?”

12 Kutani madjaha ya Davhida ma tlhela, ma fika ma mu byela hinkwaswu leswi Nabali a nga swi hlaya. 13 Davhida a vhela a byela vanhu va yena a ku: “Mun’wani ni mun’wani a a teki xipada xa yena!”+ Se hinkwavu va teka swipada swa vona; Davhida na yena a teka xipada xa yena. Kutani Davhida a famba ni 400 wa vavanuna, kasi lava 200 va sala ni swidjumba.

14 Hi nkama wolowo, mun’we wa vatirhi a famba a ya byela Abigayili nsati wa Nabali, a ku: “Davhida a rhume vanhu va suka hi mananga swaku va ta pfuxela patrao wa hina, kambe yena a va rhuketelile.+ 15 Vavanuna lava va hi khome kahle. A va hi hluphanga naswona a hi luzekeliwanga hi nchumu nkama hinkwawu lowu a hi li na vona anhoveni.+ 16 Nkama hinkwawu lowu a hi li na vona hi lusa tinyempfu, a va fana ni muru lowu wu hi vhikelaka wusiku ni nhlikanhi. 17 Swoswi pimisa hi leswi u nga ta swi yendla, hikusa patrao wa hina ni hinkwavu lava tshamaka kaya ka yena+ va ta kumiwa hi khombo,+ yena i xiphunta naswona a nga lavi ku twa nchumu.”

18 Kutani hi ku hantlisa Abigayili+ a teka 200 wa mapawu, makhuwani mambirhi yamakulu ya vhinyu, 5 wa tinyempfu leti nga dlayiwa, 5 wa mindzhava* ya mbhacha, 100 wa mabolu ya ku yendliwa hi mawuvha ya ku woma, ni 200 wa mabolu ya ku yendliwa hi makuwa* ya ku woma. A swi tlhateke ka timbongolo,+ 19 a gama a byela vatirhi va yena a ku: “Rhangani mi famba; se mina ni ta gama ni mi landza.” Kambe a nga mu byelanga nchumu nuna wa yena Nabali.

20 A nkama a a famba hi mbongolo a a pfaleliwe hi ntshava. Hi nkama wolowo Davhida ni vanhu va yena a va ta hi ndlela yoleyo se a tlhangana na vona. 21 Davhida a a ku: “Ni yo tihlupha mahala leswi ni nga vhikela swilo hinkwaswu swa wanuna lweyi amananga? Phela a xi kona ni xin’we lexi nga lahleka,+ kambe a ni tlhelisela hi swa ku biha ka hinkwaswu swaswinene leswi ni nga mu yendlela swona?+ 22 Xikwembu a xi khatise valala* va mina, loko dlambu lo xa na ka ha sale wanuna hambi ko va mun’we ka ndjangu wa Nabali.”

23 A nkama Abigayili a nga vona Davhida, a xika hi ku hantlisa ka mbongolo, a khizama phambheni ka yena a txuvuka hansi. 24 A khizama ka minenge ya yena a gama a ku: “Hosi ya mina, a nandzu a wu ti ka mina; ni kombela u ni tshika ni vulavula u tlhela u ni yingisa. 25 Hosi ya mina, ni kombela u nga vi na mhaka na Nabali+ lweyi wa xiphunta, hikusa a fana ni vito la yena. Vito la yena i Nabali,* naswona a phuntile. Kambe mina mutirhi wa wena a ni ma vonanga madjaha lawa u nga ma rhuma. 26 Swoswi hosi ya mina, na funga hi vito la Yehovha Xikwembu lexi hanyaka ni hi leswi wena u hanyaka, swaku i Yehovha a nga yendla+ swaku u nga vi ni nandzu wa ngati+ ni swaku u nga hakelisi. Valala va wena ni lava va lavaka ku ku vavisa a va fani na Nabali. 27 Ni kombela u teka leswi+ ni nga ku tela na swona u swi nyika madjaha lawa ma fambaka na wena.+ 28 Ni kombela u ni rivalela nandzu wa mina, hikusa Yehovha a ta yendla swaku vana va wena va fuma nkama wa ku leha,+ hi mhaka ya leswi wena hosi u lwaka tinyimpi ta Yehovha+ ni hi mhaka ya leswi u kalaka u nga yendlanga swa ku biha wutomi la wena hinkwalu.+ 29 Loko munhu a ku hlongolisa a lava ku ku dlaya, Yehovha Xikwembu xa wena a ta ku vhikela ku fana ni munhu lweyi a hlayisaka minchumu ya lisima ka paxta la yena. A valala va wena a ta va txukumeta kule ku fana ni maribye lawa ma txopiwaka hi xibalakatsa. 30 Naswona a nkama lowu Yehovha a nga ta ku yendlela minchumu hinkwayu yayinene leyi a nga yi tshembisa a tlhela a ku veka swaku u va murhangeli wa Israyele,+ 31 a wu nga ta tisola ka mbilu ya wena hi ku dlaya vanhu na swi nga fanelanga ni hi ku hakelisa hi voko la wena.+ Nkama Yehovha a nga ta ku katekisa, u nga ni khohlwi.”

32 Se Davhida a byela Abigayili a ku: “A ku dzunisiwe Yehovha Xikwembu xa Israyele lweyi a nga ku rhuma namuntlha swaku u ta tlhangana na mina! 33 Naswona a ku katekisiwe ku tlhariha ka wena! Ni navela swaku u katekisiwa hileswi namuntlha u nga yendla swaku ni nga vi ni nandzu wa ngati+ ni leswaku ni nga tirhisi mavoko ya mina swaku ni hakelisa. 34 Na funga hi vito la Yehovha Xikwembu lexi hanyaka, Xikwembu xa Israyele, lweyi a nga yendla swaku ni nga ku yendli swa ku biha.+ Loko a wu nga kahlulanga u ta kumana na mina,+ nimixo a ku nga ha ta va ni wanuna ni mun’we lweyi a nga ta va a salile ka ndjangu wa Nabali.”+ 35 Kutani Davhida a yamukela leswi Abigayili a a mu tele na swona, a gama a mu byela a ku: “Muka hi ku rhula. Ni swi twile leswi u nga swi hlaya naswona ni ta yendla leswi u nga swi kombela.”

36 Abigayili a game a tlhela a ya ka Nabali,* lweyi a a tihambele fexta kaya ka yena ingi o va hosi, a a tsakile naswona a a dakwile hintamu. Abigayili a nga mu byelanga nchumu Nabali anze li xa. 37 Nimixo nkama byala se a li hangalakile, Abigayili a mu byele hinkwaswu leswi nga yendleka; se mbilu ya Nabali yi fana ni ya munhu wa ku fa, ni muzimbha wa yena wu woma ku fana ni ribye. 38 Loko se ku hundze kolomuyani ka 10 wa masiku, Yehovha a yendla swaku Nabali a fa.

39 A nkama Davhida a nga twa swaku Nabali a file, a te: “A ku dzunisiwe Yehovha lweyi a nga kambisisa mhaka ya mina+ ya ku rhukiwa hi Nabali,+ a tlhela a yendla swaku ni nga yendli swa ku biha;+ Yehovha a ni hakeliselile ka Nabali!” Se Davhida a rhuma vanhu swaku va ya mu gangisela Abigayili swaku a ta va nsati wa yena. 40 Vatirhi va Davhida va fika Karmeli, va byela Abigayili va ku: “Davhida a hi rhume swaku hi ta ku teka u ta va nsati wa yena.” 41 Kutani Abigayili a vhela a khizama a txuvuka hansi, a ku: “Hi mina lweyi mutirhi wa wena lweyi a nga ta hlambisa minenge+ ya vatirhi va hosi ya mina.” 42 Se Abigayili+ a hantlisa a famba hi mbongolo ya yena na 5 wa vatirhi va yena va xisati va mu landza hi ndzhaku; Abigayili a fambe ni vavanuna lava nga rhumiwa hi Davhida, se a ya va nsati wa yena.

43 Davhida a a chade na Ahinowami+ wa le Yezreyeli,+ se hi vambirhi ka vona va va vasati va yena.+

44 Kambe Sawulo a teke Mikala+ n’wana wa yena, lweyi a a li nsati wa Davhida, a mu nyika Paliti+ n’wana wa Layixi lweyi a a li wa Galimi.