Tikronika Ta Ku Sungula

23 Nkama Davhida a a gugile funtshi a a li kusuhi ni ku fa, a veke n’wana wa yena Solomoni swaku a va hosi ya Israyele.+ 2 Kutani a hlengeleta varhangeli hinkwavu va Israyele, vaprista+ ni Valevhi.+ 3 Ku kontiwe Valevhi lava a va ni 30 wa malembe ku ya henhla,+ ku kumeka swaku a va li 38.000. 4 Ka numeru leyi a ku ni 24.000 wa vona lava a va li varhangeli va ntirho lowu a wu yendliwa ka yindlo ya Yehovha funtshi a ku ni 6.000 wa vayavanyisi ni varhangeli,+ 5 a ku ni 4.000 wa vavoneleli va tinyanghwa+ ni 4.000 wa vanhu lava a va dzunisa+ Yehovha hi swa ku chaya hi swona leswi Davhida a nga ku: “Ni swi yendlele ku dzunisa Xikwembu hi swona.”

6 Se Davhida a yava+ vana va Levhi ku nga Jersoni, Kohata na Merari hi mintlawa.+ 7 Ka Vajersoni a ku na Ladani na Ximeyi. 8 Vana va Ladani a va li vanharhu, ku nga Yehiyele lweyi a a li murhangeli, Zetami na Yuwele.+ 9 Vana va Ximeyi a va li vanharhu, ku nga Xelomoti, Aziyele na Harani. Lava a va li varhangeli va mindjangu ya Ladani. 10 Vana va Ximeyi a ku li Yahati, Zina, Yewuxi na Beriya. Lava 4 a va li vana va Ximeyi. 11 Yahati a a li murhangeli, ku gama ku landzela Ziza. Kambe leswi Yewuxi na Beriya a va nga na vana va vanyingi, a va kontiwa va li ndjangu wun’we va tlhela va nyikiwa ntirho wun’we.

12 Vana va Kohata a va li 4, ku nga Amirami, Izari,+ Hebroni na Uziyeli.+ 13 Vana va Amirami a ku li Aroni+ na Moxe,+ kambe Aroni a langiwe+ swaku a ya tirha ka Ndhawu Ya Ku Kwetsima Hintamu. Yena ni vana va yena a va yendlela Yehovha magandzelo, va mu tirhela va tlhela va katekisa vanhu hi vito la yena nkama hinkwawu.+ 14 Kambe vana va Moxe mutirheli wa Xikwembu xa ntiyiso, a va kontiwa ka lixaka la Valevhi. 15 Vana va Moxe a ku li Jerixomu+ na Eliyezere.+ 16 Ka vana va Jerixomu, Xebuwele+ a a li murhangeli. 17 Ka vana va Eliyezere, Rehabiya+ a a li murhangeli; Eliyezere a nga ha vanga ni vana van’wani, kambe Rehabiya a ve ni vana va vanyingi. 18 Ka vana va Izari,+ Xelomiti+ a a li murhangeli. 19 Ka vana va Hebroni, Yeriya a a li murhangeli, Amariya a va wa wumbirhi, Yahaziyele a va wa wunharhu, Yekamiyami+ a va wa wu 4. 20 Ka vana va Uziyeli,+ Mikiya a a li murhangeli, ku gama ku landzela Ixaya.

21 Vana va Merari a ku li Mahili na Muxi.+ Vana va Mahili a ku li Eliyazari na Kixi. 22 Eliyazari a fe na a ni vana va tintombhi ntsena. Se vana va Kixi lava a va li maxaka ya vona va va teka va va vasati va vona. 23 Vana va Muxi a va li vanharhu, a ku li Mahili, Ederi na Yeremoti.

24 Lava a va li vana va Levhi lava a va tsalisiwile hi ku ya hi mindjangu ya vona, ni hi ku ya hi varhangeli va mindjangu ya vona. Valevhi lava a va ni 20 wa malembe ku ya henhla a va kontiwile va tlhela va tsalisiwa hi ku ya hi mavito ya vona, swaku va ta tirha ka yindlo ya Yehovha. 25 Hikusa Davhida a te: “Yehovha Xikwembu xa Israyele a yendle swaku vanhu va yena+ va humula funtshi a ta tshama Yerusalema nkama hinkwawu.+ 26 Valevhi a va nga ha ta tlakula tabernakela kumbe swibya leswi tirhisiwaka ka yona.”+ 27 Hikusa hi ku ya hi marito ya wugamu ya Davhida, a ku kontiwa Valevhi lava a va ni 20 wa malembe ku ya henhla. 28 Ntirho wa vona a wu li wa ku pfuna vana va Aroni+ ka ntirho lowu a va wu yendla ka yindlo ya Yehovha, a va hlayisa mikintari*+ ni masala ya ku dlela ka wona, va basisa minchumu hinkwayu ya ku kwetsima va tlhela va yendla mintirho hinkwayu leyi a yi fanele yi yendliwa ka yindlo ya Xikwembu xa ntiyiso. 29 A va pfunisa ku hamba mapawu ya ku kwetsima,+ mpupu wa ku siliwa kahle wa ku yendla magandzelo hi wona, pawu la ku kala li nga na fermentu,+ bolu la ku yendla hi ku woxiwa, mbila+ ni mimpimu hinkwayu leyi a yi laveka. 30 A va fanele va khensa va tlhela va dzunisa Yehovha mixo wun’wani ni wun’wani+ va tlhela va swi yendla nimadlambu.+ 31 A va pfunisa nkama a ku yendleliwa Yehovha magandzelo ya ku hisiwa hi Tisavata,+ hi nkama wa ku huma ka n’weti+ ni hi minkama ya mafexta.*+ A va yendla leswo nkama ni nkama phambheni ka Yehovha hi ku ya hi numeru leyi a yi laveka hi ku ya hi minawu ya kona. 32 A va yendla mintirho ya vona ka tende la ntlhanganu, ni ka ndhawu ya ku kwetsima va tlhela va pfuna vamakwavu va vona ku nga vana va Aroni, ka mintirho leyi a yi yendliwa ka yindlo ya Yehovha.