Vafilipiya

3 Se vamakwerhu, tamani mi tsaka Hosini.+ A ni karhali ku mi tsalela minchumu ya ku fana hikusa yi vhikela n’wina.

2 Tivoneleni ka lava hanyaka ku fana ni timbyana; tivoneleni ka lava vavisaka van’wani; tivoneleni ka lava lavaka swaku mi tsema nsuvu.*+ 3 Hikusa hi hina lava nga tsema nsuvu hikakunene,+ lava yendlaka ntirho wa ku kwetsima hi ku pfuniwa hi moya wa ku kwetsima wa Xikwembu, hi tibuma hi Kreste Yesu+ naswona a hi tibumi hileswi hi nga tsema nsuvu, 4 hambileswi ni nga ni xivangelo xa ku tibuma ku tlula vanhu hinkwavu hileswi ni nga tsema nsuvu.

Loko ku ni lweyi a pimisaka swaku a ni xa ku tibuma hi xona, mina na mu pala, 5 hikusa ni tseme nsuvu hi siku la wu 8,+ ni Muyisrayele wa lixaka la Benjamini, ni Muheberu wa ku psaliwa hi Vaheberu+ naswona a ni wu landzela hintamu nawu hileswi a ni li Mufarisi.+ 6 Loko swi ta ka ku hiseka, a ni hlupha bandla;+ loko swi ta ka ku yendla swa ku lulama hi ku ya hi nawu, a ni vanga ni nandzu. 7 Kambe leswi a ni swi nyika lisima hintamu, ni swi vone na swi nga pfuni nchumu* hi mhaka ya Kreste.+ 8 Ni teka swilo hinkwaswu na swi nga pfuni nchumu loko swi pimanisiwa ni wutivi la lisima swinene la ku tiva Kreste Yesu Hosi ya mina. Ni pfumele ku luzekeliwa hi swilo hinkwaswu hi mhaka ya yena, naswona ni swi vona swi li xidulu xa chaka leswaku ni kuma Kreste, 9 naswona ni mudjondzisiwa wa yena. Kambe a ni vuli swona swaku ni lulamile hileswi ni landzelaka Nawu, kambe ni vuliwa wa ku lulama hi mhaka ya leswi ni nga ni lipfumelo+ ka Kreste.+ Vhela Xikwembu xi va vona na va lulamile lava nga ni lipfumelo ka yena.+ 10 Lexi ni xi lavaka i ku mu tiva ni ku twisisa lisima la ku pfuxiwa ka yena+ ni ku tlhela ni hlupheka ku fana na yena.+ Ni tinyimisele ku fa ku fana na yena,+ 11 leswaku loko swi koteka ni va mun’we wa lava nga ta rhanga va pfuxiwa ku feni.+

12 A ni vuli swona swaku se ni yi kumile hakelo leyi kumbe swaku se ni hetisekile,* kambe ni tirha hi matimba+ swaku ni yendla leswi Kreste Yesu a nga ni langela ku swi yendla.+ 13 Vamakwerhu, a ni vuli swaku se ni yi kumile. Kambe lexi ni xi yendlaka i xin’we ntsena: Ni khohlwa swa le ndzhaku+ se ni lwela ku kuma leswi nga phambheni.+ 14 Ni wa ni pfuka na ni lwela ku kuma hakelo+ ya ku vitaniwa+ hi Xikwembu swaku ni ya tilweni hi ku tirhisa Kreste Yesu. 15 Se hina hi nga ni lipfumelo la ku tiya,+ a hi pimiseni hi ku pfumelelana ni leswi ni nga mi byela swona. Loko mi pimisa hi ndlela ya ku hambana ni leyi, Xikwembu xi ta mi pfuna swaku mi va ni mimpimiso leyi lavekaka. 16 Ka leswi se hi nga swi fikelela, a hi tameni hi yendlisa swoleswo.

17 Vamakwerhu, ni tekeleleni,+ mi va txuvuka kahle lava landzelaka xikombiso lexi hi nga mi siyela xona. 18 Hikusa i vanyingi lava hanyaka ku fana ni valala va mhandzi ya nxaniso* ya Kreste, lava a ni tshamela ku vulavula hi vona kambe swoswi ni vulavulaka hi vona na ni rila. 19 Magamu ya vona i ku fa, xikwembu xa vona i khwirhi la vona, va tikhuza hi minchumu ya ku danisa leyi va yi yendlaka; va tshamela ku pimisa hi minchumu ya misava leyi.+ 20 Kambe kaya ka hina+ hi le tilweni+ naswona hi mu nyimele hintamu muponisi lweyi a taka hi kole tilweni, ku nga Hosi Yesu Kreste,+ 21 lweyi a nga tirhisa matimba ya yena yamakulu swaku a txintxa muzimbha wa hina wa ku kala wu nga pfuni nchumu swaku wu fana ni muzimbha wa yena lowu phatimaka,+ ni ku tlhela a tirhisa matimba wolawo swaku a fuma swilo hinkwaswu.+