Tikronika Ta Ku Sungula
28 Se Davhida a hlengeleta varhangeli hinkwavu va Israyele aYerusalema, ku nga varhangeli va tinxaka, varhangeli va mintlawa+ leyi tirhelaka hosi, varhangeli va mintlawa ya 1.000 wa vanhu, varhangeli va mintlawa ya 100 wa vanhu,+ varhangeli lava hlayisaka minchumu hinkwayu ya hosi, varhangeli hinkwavu lava hlayisaka swifuyu swa hosi+ ni swa vana va yona,+ vatirhi lava va tirhaka ka yindlo ya wuhosi ni vavanuna hinkwavu va matimba.+ 2 Kutani Hosi Davhida a sekeleka a nyima a ku:
“Ni yingiseni vamakwerhu na n’wina vanhu va mina. A ni swi lava hi mbilu hinkwayu ku yaka yindlo leyi areka ya ntwananu wa Yehovha a yi ta tshama ka yona, leyi a yi ta tlhela yi va ndhawu leyi Xikwembu xa hina a xi ta tlhateka minenge ya xona ka yona+ funtshi ni yendle malulamiselo swaku yi yakiwa.+ 3 Kambe Xikwembu xa ntiyiso xi ni byele xi ku: ‘A hi wena u nga ta yaka yindlo leyi ku nga ta dzunisiwa vito la mina+ ka yona, hikusa u lwe tinyimpi hintamu u tlhele u dlaya vanhu va vanyingi.’+ 4 Kambe Yehovha Xikwembu xa Israyele a ni langile ka ndjangu wa papayi leswaku ni va hosi ya Israyele hi masiku ni masiku,+ hikusa a lange Yuda swaku a va murhangeli,+ ka lixaka la Yuda a lange ndjangu wa papayi,+ ka vana va papayi a lange mina swaku a ni yendla hosi ya tiko hinkwalu la Israyele.+ 5 Yehovha a ni nyike vana va vanyingi,+ kambe ka vana va mina hinkwavu a lange Solomoni+ swaku a tshama ka xitshamu xa wuhosi xa Yehovha a va hosi ya Israyele.+
6 “A ni byele a ku: ‘Solomoni n’wana wa wena hi yena a nga ta yaka yindlo ya mina ni mikintari* ya mina, hikusa hi yena ni nga mu langa swaku a va n’wana wa mina funtshi mina ni ta va papayi wa yena.+ 7 Ni ta tiyisa mfumu wa yena swaku wu tshama na wu li kona nkama hinkwawu+ loko a yingisa minawu ya mina ni swiboho swa mina swa ku yavanyisa+ ku fana ni leswi a swi yendlaka swoswi.’ 8 Se ni vulavula phambheni ka Vayisrayele hinkwavu, vanhu va Yehovha lava va nga nhlengeletana ni le phambheni ka Xikwembu xa hina, ni li: Yendlani hinkwaswu swaku mi tiva minawu hinkwayu ya Yehovha Xikwembu xa n’wina mi tlhela mi yi yingisa, swaku mi tshama ka tiko leli lalinene+ mi tlhela mi li siyela vana va n’wina.
9 “Wena Solomoni n’wananga, tiva Xikwembu xa mina papayi wa wena u xi tirhela hi mbilu hinkwayu+ na u tsakile, hikusa Yehovha a kambisisa timbilu hinkwatu+ a tlhela a tiva hinkwaswu leswi munhu a swi pimisaka.+ Loko u mu lavetela a ta yendla swaku u mu kuma,+ kambe loko u mu tshika, na yena a ta ku tshika swa wugamu.+ 10 Swoswi Yehovha a ku langile swaku u mu yakela yindlo leyi yi nga ta va ndhawu leyi kwetsimaka. Tiya nhlana u sungula ntirho.”
11 Se Davhida a nyika n’wana wa yena Solomoni dezenyu+ la vharanda,+ makwartu ya kona ku nga makwartu ya ku veka minchumu, makwartu ya le henhla, makwartu ya le ndzeni ni kwartu leli Xikwembu xi rivalelaka swidjoho ka lona.+ 12 A mu nyike dezenyu la hinkwaswu leswi a nga kombiwa swona hi moya wa ku kwetsima wa Xikwembu, leswi a a fanele a yi yendlisa xiswona mikintari+ ya yindlo ya Yehovha, masala hinkwawu ya ku dlela ka wona, ndhawu ya ku veka minchumu ya lisima ka yindlo ya Xikwembu xa ntiyiso ni lani a ku ta vekiwa minchumu leyi yi nga nyikeliwa ka Xikwembu;+ 13 a tlhele a mu byela leswi mintlawa ya vaprista+ ni Valevhi a yi fanele yi tshamisa xiswona, mintirho hinkwayu leyi a yi ta yendliwa ka yindlo ya Yehovha ni swibya hinkwaswu leswi a swi ta tirhisiwa ka yindlo ya Yehovha; 14 a mu byele makilu hinkwawu ya woru leli a li ta tirhisiwa, woru la swibya hinkwaswu leswi a swi ta tirhisiwa ka mintirho ya ku hambanahambana, a tlhela a mu byela makilu ya swibya hinkwaswu swa prata leswi a swi ta tirhisiwa ka mintirho ya ku hambanahambana; 15 ni makilu ya swa ku tlhoma swa ku voninga hi swona swa woru+ swa ku hambanahambana ni swa ku voninga hi swona, ni makilu ya swa ku tlhoma swa ku voninga hi swona swa prata swa ku hambanahambana ni swa ku voninga hi swona; 16 ni makilu ya woru leli a li ta tirhisiwa swaku ku yendliwa mimeza hinkwayu leyi a ku ta vekiwa mapawu ya ku kwetsima+ ni makilu ya prata leli a li ta tirhiseliwa ku yendla mimeza ya prata, 17 makilu ya magarfu, matijela ni majaru lawa ma nga yendliwa hi woru la ku tenga,+ makilu ya matijela hinkwawu ya woru ni makilu ya matijela hinkwawu yamatsongo ya prata. 18 A tlhele a mu byela ni makilu ya woru la ku tenga leli a a ta li tirhisa swaku a yendla altari la swinun’hwelisu,*+ ni xifaniso lexi fanekiselaka movha wa Xikwembu+ ku nga makerubu+ ya woru lawa a ma pfule timpapa ta wona ma mbhonya areka ya ntwananu wa Yehovha. 19 Davhida a gama a ku: “Yehovha a ni pfunile a tlhela a ni nyika wutivi swaku ni tsala leswi minchumu hinkwayu yi nga ta tshamisa xiswona.”+
20 Se Davhida a byela n’wana wa yena Solomoni a ku: “Tiya u nga chavi nchumu, sungula ntirho. U nga chavi funtshi u nga rhurhumeli, hikusa Yehovha Xikwembu, Xikwembu xa mina a ta ku pfuna.+ A nga ta ku tshika+ kambe a ta va na wena anze u heta ntirho hinkwawu wa ku yaka yindlo ya yena Yehovha. 21 Hi leyi mintlawa ya vaprista+ ni ya Valevhi+ lava nga ta yendla ntirho hinkwawu ka yindlo ya Xikwembu xa ntiyiso. U ni vatirhi lava nga tinyimisela lava va kotaka ku yendla mintirho hinkwayu,+ ku patsa ni varhangeli+ ni vanhu hinkwavu, lava va nga ta yingisa leswi u nga ta va byela swona.”