Tikronika Ta Wumbirhi

29 Hezekiya+ a a ni 25 wa malembe nkama a nga va hosi funtshi a fume 29 wa malembe aYerusalema. Vito la mamani wa yena a ku li Abiya n’wana wa Zakariya.+ 2 A tame a yendlela Yehovha minchumu yayinene,+ ku fana na Davhida vhovho wa yena.+ 3 Hi lembe la ku sungula la ku fuma ka yena, hi wheti ya ku sungula, a pfule tinyanghwa ta yindlo ya Yehovha kutani a sungula ku ti lunghisa.+ 4 Se a vitana vaprista ni Valevhi a va hlengeleta ka kintari lowu wu nga ka tlhelo la le wuxeni. 5 A ku: “Ni yingiseni n’wina Valevhi. Tibasiseni+ mi basisa ni yindlo ya Yehovha Xikwembu xa vavhovho va n’wina, mi humesa minchumu hinkwayu leyi kalaka yi nga basanga ka ndhawu ya ku kwetsima,+ 6 hikusa vapapayi va hina a va nga tshembekanga funtshi va yendle swa ku biha phambheni ka Yehovha Xikwembu xa hina.+ Va tshike Yehovha va tlhela va tshika tabernakela ya yena, va mu djikela.+ 7 Va tlhele va pfala tinyanghwa ta vharanda+ la tempele va tima ni swa ku voninga hi swona.+ Va tshike ku hisa swinun’hwelisu*+ ni ku yendlela Xikwembu xa Israyele magandzelo ya ku hisiwa+ ka ndhawu ya ku kwetsima. 8 Kutani Yehovha a kwatela vanhu va Yuda ni va le Yerusalema,+ a tlhele a va tisela khombo va za lava nga swi twa ni ku swi vona va hlamala, va chava va tlhela va va bela noti wa ku va poyila, hi ku ya hi leswi na n’wina mi swi vonaka.+ 9 Vavhovho va hina va dlayiwe hi xipada+ funtshi vana va hina va madjaha, vana va hina va tintombhi ni vasati va hina va tekiwile va yisiwa wukaraweni hi mhaka ya leswi.+ 10 Swoswi ni lava ku yendla ntwananu na Yehovha Xikwembu xa Israyele+ swaku a tshika ku hi kwatela. 11 Vana va mina, swoswi a hi nkama wa ku khondla mavoko, hikusa Yehovha a lange n’wina swaku mi nyima phambheni ka yena mi mu tirhela+ ni ku mu yendlela magandzelo ya ku hisiwa.”+

12 Se Valevhi va sekeleka va nyima, ka Vakohata+ a ku na Mahati n’wana wa Amasayi na Yuwele n’wana wa Azariya; ka va Merari,+ a ku na Kixi n’wana wa Abidi na Azariya n’wana wa Yehaleli; ka Vajersoni,+ a ku na Yowa n’wana wa Zima na Edeni n’wana wa Yowa; 13 ka vana va Elizafani, a ku na Ximiri na Yewele; ka vana va Azafi,+ a ku na Zakariya na Mataniya; 14 ka vana va Hemani,+ a ku na Yehiyele na Ximeyi; ka vana va Yedutani,+ a ku na Xemaya na Uziyeli. 15 Se va hlengeleta vamakwavu va vona va tibasisa va gama va ya basisa ni yindlo ya Yehovha hi ku ya hi leswi hosi yi nga swi hlaya na yi landza leswi nga hlayiwa hi Yehovha.+ 16 Kutani vaprista va nghena ka yindlo ya Yehovha va yi basisa, va tlhela va humesa chaka hinkwalu leli va nga li kuma ka tempele ya Yehovha, va li yisa ka kintari*+ wa yindlo ya Yehovha. Se Valevhi va teka chaka lolelo va ya li txukumeta ka Nkova wa Kedroni.+ 17 Va sungule ku basisa tempele hi siku la ku sungula ka wheti ya ku sungula, hi siku la wu 8 va fike ka vharanda la tempele ya Yehovha.+ Va hete 8 wa masiku na va basisa yindlo ya Yehovha va gama hi siku la wu 16 la wheti ya ku sungula.

18 Nkama va nga heta va ye ka Hosi Hezekiya va fika va ku: “Hi basise yindlo hinkwayu ya Yehovha, altari ya magandzelo ya ku hisiwa+ ni swibya swa yona hinkwaswu+ ni meza wa mapawu ya ku kwetsima+ ni swibya hinkwaswu leswi tirhisiwaka ka wona. 19 Ni swibya hinkwaswu leswi Hosi Akazi a nga swi susa na a ha li hosi nkama a nga tshika ku tirhela Xikwembu,+ hi swi lulamisile hi tlhela hi swi tengisa+ hi gama hi swi veka phambheni ka altari ya Yehovha.”

20 Hosi Hezekiya a pfuka nimpundzu swinene a hlengeleta varhangeli va doropa, va gama va famba va ya ka yindlo ya Yehovha. 21 Va fambe ni 7 wa tihomu ta xinuna, 7 wa tinyempfu ta xinuna, 7 wa swinyempfani swa xinuna ni 7 wa swiphongo swaku swi ya va gandzelo la xidjoho la hinkwavu va le wuhosini, la ndhawu leyi kwetsimaka ni la Yuda.+ A gama a byela vaprista, ku nga vatukulu va Aroni, swaku va swi nyikela henhla ka altari ya Yehovha. 22 Kutani ku dlayiwa tihomu,+ se vaprista va gama va teka ngati ya kona va yi n’wan’wasela henhla ka altari;+ va gama va dlaya tinyempfu va n’wan’wasela ngati ya tona henhla ka altari, va tlhela va dlaya ni swinyempfani swa xinuna, va n’wan’wasela ngati ya swona henhla ka altari. 23 Se va tshineta swiphongo swa gandzelo la xidjoho phambheni ka hosi ni ka vanhu, va gama va tlhateka mavoko ya vona henhla ka swona. 24 Vaprista va gama va dlaya swiphongo leswi, va yendla gandzelo la xidjoho hi ngati ya swona ahenhla ka altari, swaku va kombelela tiko hinkwalu la Israyele ku rivaleliwa, hikusa hosi a yi hlaye swaku gandzelo la ku hisiwa ni gandzelo la xidjoho li fanele li yendleliwa tiko hinkwalu la Israyele.

25 Hi nkama wolowo, a hosi a yi veke Valevhi ka yindlo ya Yehovha na va ni switende, tiharipa+ ni swa ku chaya hi swona swa nsimbi swa ku fana ni maparatu;* yi yendle leswo hi ku ya hi leswi nga hlayiwa hi Davhida,+ muprofeta Natani+ na Gadi+ lweyi a a vona minchumu ya ku hlamalisa hi ndlela ya singita* a gama a yi byela hosi, hikusa nawu lowu a wu ta hi ka Yehovha funtshi a wu nyikele hi ku tirhisa vaprofeta va yena. 26 Valevhi a va nyimile na va khome minchumu ya ku chaya hi yona leyi a yi li ya Davhida, kasi vaprista a va khome timhalamhala.*+

27 Se Hezekiya a hlaya swaku ku yendliwa gandzelo la ku hisiwa ka altari.+ Nkama na ku yendliwa gandzelo la ku hisiwa, va sungule ku yimbelela lisimu la Yehovha va tlhela va chaya timhalamhala, na va fambisana ni lava a va chaya minchumu ya ku chaya hi yona ya Davhida hosi ya Israyele. 28 Vanhu hinkwavu va khizama loko ku yimbeleliwa lisimu ku tlhela ku chayiwa timhalamhala. Hinkwaswu leswi swi tame swi yendleka anze va heta ku nyikela gandzelo la ku hisiwa. 29 Nkama va nga heta ku nyikela gandzelo, hosi ni hinkwavu lava a va li na yona va khizama va txuvuka hansi. 30 Hosi Hezekiya ni varhangeli lava a va li na yena va byela Valevhi swaku va dzunisa Yehovha hi ku tirhisa marito ya Davhida+ na Azafi+ lweyi a a kota ku vona minchumu ya ku hlamalisa hi ndlela ya singita.* Se va yimbelela na va tsake ngopfu, va khizama va txuvuka hansi.

31 Kutani Hezekiya a ku: “Leswi se mi nga langiwa ku va vanhu va Yehovha, tanani mi ta yendla magandzelo mi tlhela mi nyikela magandzelo ya ku khensa ka yindlo ya Yehovha.” Kutani vanhu va sungula ku tisa swifuyu swa ku yendla magandzelo ni swa magandzelo ya ku khensa, kasi lava a va swi lava va tise ni swifuyu swa magandzelo ya ku hisiwa.+ 32 Swifuyu swa ku yendla magandzelo ya ku hisiwa leswi nga tisiwa ku ve 70 wa tihomu, 100 wa tinyempfu ta xinuna ni 200 wa swinyempfani swa xinuna, hinkwaswu leswi a swi ta va swa magandzelo ya ku hisiwa lawa a ma ta yendleliwa Yehovha,+ 33 kasi swa magandzelo ya ku kwetsima, ku ve 600 wa tihomu ni 3.000 wa tinyempfu. 34 Kambe vaprista a va nga li vanyingi, a va nga yeneli swaku va susa swikhumba swa swifuyu hinkwaswu swa magandzelo ya ku hisiwa, se vamakwavu va vona ku nga Valevhi va va pfuna+ anze ntirho hinkwawu wu hela ni vaprista va heta ni ku tibasisa,+ hikusa Valevhi a va rhandza ku tibasisa hintamu ku tlula vaprista. 35 A ku ni swifuyu swa swinyingi swa ku yendla hi swona magandzelo ya ku hisiwa+ ni mafurha ya magandzelo ya ku kombela ku rhula+ ni magandzelo ya vhinyu lawa a ma nyikeliwa ni magandzelo ya ku hisiwa.+ Se ntirho wu tlhele wu yendliwa hi ndlela yoleyo ka yindlo ya Yehovha. 36 Kutani Hezekiya ni vanhu hinkwavu va tsaka hi mhaka ya leswi Xikwembu xa ntiyiso xi nga va yendlela swona,+ hikusa hinkwaswu swi yendleke hi nkama wawutsongo.