Samuwele Wa Wumbirhi

10 Hi ku famba ka nkama, hosi ya Vaamoni+ yi fa, se Hanuni n’wana wa yona a sala a va hosi.+ 2 Kutani Davhida a ku: “Ni ta va ni timpsalu ka Hanuni n’wana wa Nahaxi ku fana ni leswi papayi wa yena a nga va ni timpsalu* ka mina.” Davhida a gama a rhuma vatirhi va yena swaku va ya mu tiyisa hi mhaka ya leswi a nga feliwa hi papayi wa yena. Kambe nkama vatirhi va Davhida va nga fika ka tiko la Vaamoni, 3 varhangeli va Vaamoni va byela Hanuni hosi ya vona va ku: “U pimisa swaku Davhida a rhume vanhu va ta ku tiyisa hi mhaka ya leswi a hloniphaka papayi wa wena? Phela a rhume vatirhi va yena swaku va ta kambela doropa leli swaku va ta li hlula.” 4 Se Hanuni a teka vatirhi va Davhida a va tsemeta malepfu ka tlhelo lin’we+ a tlhela a tsema ni mpahla ya vona hi le ka xisuti, a minenge ya vona yi sala handle, a gama a va tshika va famba. 5 Nkama Davhida a nga byeliwa leswi nga va yendlekela, a tekela ku rhuma vanhu swaku va ya va tlhangaveta, hikusa vavanuna lava a va danisiwile hintamu; kutani hosi yi va byela yi ku: “Tshamani aYeriko+ anze malepfu ya n’wina ma kula, hi kona mi nga ta vuya.”

6 Hi ku famba ka nkama, Vaamoni va vona swaku leswi va nga swi yendla swi va yendle va nyenyiwa hi Davhida, se va hakela 20.000 wa masonchwa lawa ma fambaka hi minenge, ya Vasiriya va le Beti-Reyobo+ ni Vasiriya va le Zoba+ swaku va ta lwa na Davhida. Va tlhele va hakela ni hosi ya Maka+ leyi a yi li ni 1.000 wa masonchwa, ku patsa ni 12.000 wa masonchwa+ lawa a ma ta hi Itoba. 7 A nkama Davhida a nga twa leswo, a rhuma Yowabu ni masonchwa hinkwawu ku patsa ni tinhenha ta yena ta matimba.+ 8 Kutani Vaamoni va huma va nyima ka xipfalu xa doropa swaku va tilulamisela ku lwa, kasi Vasiriya va le Zoba ni va Reyobo xikan’we ni masonchwa ya Itoba ni ya Maka a va nyime va li voxe ka ndhawu ya ku pfuleka.

9 Nkama Yowabu a nga vona swaku valala va mu hlasela hi phambheni ni ndzhaku, a langa tinhenha ta Israyele, swaku ti tilunghiselela ku lwa ni Vasiriya.+ 10 Se masonchwa lawa ma nga sala a ma nyike Abixayi+ makwavu wa yena swaku a ma rhangela swaku ma ta lwa ni Vaamoni.+ 11 A gama a ku: “Loko Vasiriya va ni hlula, tani u ta ni pfuna; kambe loko Vaamoni va ku hlula ni ta ta ni ta ku pfuna. 12 A hi tiyeni hi nga chavi nchumu+ hi lwela vanhu va ka hina ni madoropa ya Xikwembu xa hina, naswona Yehovha a ta yendla leswi a swi vonaka na swi li kahle ka yena.”+

13 Kutani Yowabu ni masonchwa lawa a a li na wona va yela Vasiriya swaku va ya lwa na vona, kutani Vasiriya va mu baleka.+ 14 A nkama Vaamoni va nga vona swaku Vasiriya va balekile, na vona va baleka Abixayi va nghena ka doropa. A nkama Yowabu a nga gama ku lwa ni Vaamoni a tlhela a ya Yerusalema.

15 A nkama Vasiriya va nga vona swaku va hluliwile hi Vayisrayele, va tlhele va hlengeletana.+ 16 Se Adadezeri+ a rhuma vanhu swaku va ya vitana Vasiriya lava a va tshama kusuhi ni Nambu wa Ewufrata,+ vanhu va kona va fike Elami na va rhangeliwa hi Xobaki murhangeli wa masonchwa ya Adadezeri.

17 Nkama Davhida a nga byeliwa leswi nga yendleka, a tekela ku hlengeleta masonchwa hinkwawu ya Israyele se va tsemakanya Nambu wa Yordani va ya Elami. Vasiriya va tilunghiselela swaku va ta ya tlhangana na Davhida va lwa na yena.+ 18 Kambe Vasiriya va baleka Vayisrayele; naswona Davhida a dlaye 700 wa masonchwa lawa a ma famba hi tinyolo* ni 40.000 wa masonchwa ya Vasiriya lawa a ma famba hi makavhalu, a gama a tlhava na Xobaki murhangeli wa masonchwa ya vona, a fela kolanu.+ 19 A nkama tihosi hinkwatu, leti a ti tirhela Adadezeri ti nga vona swaku Vayisrayele va ti hlulile, ti tekela ku yendla ntwananu wa ku rhula na vona ti sungula ku va tirhela;+ naswona Vasiriya se a va chava ku pfuna Vaamoni.