Tikronika Ta Wumbirhi

9 Hosi ya xisati ya le Xeba+ yi twa ndhuma ya Solomoni, se yi ta Yerusalema swaku yi ta mu vutisa swivutiso swa ku karhata hintamu. Yi te ni vatirhi va yona ni varhangeli lava yi nga va veka ni makamela lawa a ma rhwale mafurha ya balsamu ni woru la linyingi hintamu+ ku patsa ni maribye ya lisima. Yi fika yi vutisa Solomoni hinkwaswu leswi a yi lava ku swi tiva.+ 2 Solomoni a yi hlamula swivutiso swa yona hinkwaswu. A xi kona xivutiso ni xa xin’we lexi a kalaka a nga swi kotanga ku xi hlamula.

3 A nkama hosi ya xisati ya le Xeba yi nga vona swaku Solomoni a tlharihile,+ yi tlhela yi vona ni yindlo leyi a nga yi yaka,+ 4 yi vona ni swakudla leswi a swi vekiwa ka meza wa yena,+ leswi vatirhi va yena a va tshamisa xiswona ka meza, leswi lava a va phamela a va yambalisa xiswona va tlhela va tirhisa xiswona, lava a va mu chelela leswi a a swi nwa ni leswi a va yambalisa xiswona ni magandzelo ya ku hisiwa lawa a a ma yendla nkama ni nkama ka yindlo ya Yehovha,+ yi hlamale hintamu swinene. 5 Hosi ya xisati yi byela Solomoni yi ku: “Leswi ni nga swi twa ka tiko la mina hi mintirho ya wena ni leswi u nga tlharihisa xiswona i ntiyiso. 6 A ni swi kholwanga nkama va nga ni byela kambe se na kholwa leswi ni nga tivonela hi noxe,+ funtshi leswi va nga ni byela i switsongo hintamu ka leswi ni nga swi vona.+ Wena u tlharihile hintamu ku tlula leswi ni nga byeliwa swona.+ 7 Va katekile vanhu va wena, va katekile ni vatirhi va wena lava va nyimaka phambheni ka wena nkama ni nkama va yingisela wutlharhi la wena! 8 A ku dzunisiwe Yehovha Xikwembu xa wena, lweyi a nga ku rhandza a gama a ku veka ka xitshamu xa yena xa wuhosi swaku u nyimelela Yehovha Xikwembu xa wena. Hikusa Xikwembu xa wena xi rhandze tiko la Israyele+ swaku li tama li va kona minkama hinkwayu, hi leswo swi nga yendla swaku xi ku veka swaku u va hosi leswaku u va yavanyisa ni ku va fuma hi ndlela yayinene.”

9 Kutani hosi leyi ya xisati yi nyika Solomoni 4.104 wa makilu* ya woru+ ni mafurha ya balsamu ya manyingi hintamu swinene ni maribye ya lisima. A ka ha tlhelanga ku tisiwa mafurha ya manyingi ku fana ni lawa hosi ya xisati ya le Xeba yi nga ma nyika Hosi Solomoni.+

10 Vatirhi va Hirami ni vatirhi va Solomoni lava nga tisa woru la le Ofiri+ va tlhele va ta ni timhandzi ta minsinya ya algama ni maribye ya lisima.+ 11 Hosi yi tirhise timhandzi ta nsinya wa algama swaku yi yendla swikada swa yindlo ya Yehovha+ ni yindlo ya hosi+ ni swaku yi yendla tiharipa ni switende swa lava yimbelelaka.+ A ku nga se tshama ku voniwa timhandzi ta ku fana na tona ka tiko la Yuda.

12 Hosi Solomoni a nyike hosi ya xisati ya le Xeba hinkwaswu leswi yi nga swi navela ni leswi yi nga swi kombela; a yi nyike swilo swa swinyingi ku tlula leswi yi nga mu tela na swona. Hosi leyi ya xisati yi game yi tlhela ni vatirhi va yona yi ya ka tiko la yona.+

13 Lembe ni lembe Solomoni a va mu tisela woru la ku peza kolomuyani ka 23.000 wa makilu,*+ 14 na ku nga kontiwi ni woru leli a li tisiwa hi vanhu lava a va fambafamba hi matiko va xavisa ni leli a li tisiwa hi vaxavisi van’wani ni tihosi hinkwatu ta Arabiya ni vagovhernadori va tiko, lava a va tisa woru ni prata ka Solomoni.+

15 Hosi Solomoni a yendla 200 wa swivhikelo swaswikulu hi ku tirhisa woru leli nga patsiwa ni nsimbi+ (xivhikelo xin’wani ni xin’wani a xi yendliwe hi woru leli nga patsiwa ni nsimbi leli pezaka 7 wa makilu)*+ 16 ni 300 wa swivhikelo swaswitsongo swi nga yendliwa hi woru leli nga patsiwa ni nsimbi, (xivhikelo xin’wani ni xin’wani a xi yendliwe hi woru leli a li peza makilu mambirhi).* Se hosi yi swi teka yi ya swi veka ka Yindlo ya Khwati la Lebanoni.+

17 Hosi yi tlhele yi yendla xitshamu xaxikulu xa wuhosi hi matinyu ya tindlopfu yi xi namarheta woru la ku tenga.+ 18 A ku ni 6 wa swikada leswi a swi ya ka xitshamu xa wuhosi nakambe a ku ni xibankwani xaxitsongo xa woru xa ku tlhateka minenge lexi a xi patsane ni xitshamu xa wuhosi kasi ka matlhelo hamambirhi, a ku ni swa ku khigetela movoko ka swona, ka tlhelo lin’wani ni lin’wani la leswi swa ku khigetela mavoko a ku ni xifaniso xa nghonyama.+ 19 A ku vekiwe 12 wa swifaniso swa tinghonyama+ ahenhla ka 6 wa swikada, ka xikada xin’wani ni xin’wani a ku vekiwe xifaniso xa nghonyama hala ni hala amagamu ka xona. A ku nga na mfumu wun’wani lowu a wu yendle nchumu wa ku fana ni lowo. 20 Swibya hinkwaswu leswi Hosi Solomoni a a swi tirhisa swaku a phuza hi swona a swi yendliwe hi woru ni swibya hinkwaswu leswi a swi li ka Yindlo ya Khwati la Lebanoni a swi yendliwe hi woru la ku tenga. A ku nga na xibya lexi a xi yendliwe hi prata hikusa prata a li voniwa li nga li la nchumu ka nkama wa Solomoni.+ 21 Phela maboti ya hosi a ma ya Tarxixi+ ni vatirhi va Hirami.+ A maboti lawa ya Tarxixi a ma vuya kan’we loko se ku hele malembe manharhu, a ma vuya na ma ni woru, prata, matinyu ya tindlopfu,+ tihavu ni mapikoko.*

22 Hosi Solomoni a a tlharihile a tlhela a ganya ku tlula tihosi hinkwatu ta misava.+ 23 Tihosi ta misava hinkwayu a ti ta ka Solomoni swaku ti ta twa wutlharhi la yena leli a a nyikiwe hi Xikwembu xa ntiyiso.+ 24 Lembe ni lembe a va ta ni minchumu va ta mu nyika. A va mu nyika minchumu ya prata, ya woru, mpahla,+ matlharhi, mafurha ya balsamu, makavhalu ni timbongolo.* 25 Solomoni a a ni 4.000 wa swib’ala swa makavhalu ni tinyolo* funtshi a a ni 12.000 wa makavhalu.*+ Swilo leswi a a swi veke ka doropa leli a a veka tinyolo, leli a li li kusuhi ni lomu a a tshama kona aYerusalema.+ 26 A fume tihosi ta matiko hinkwawu ku sukela ka Nambu wa Ewufrata ku ya fika ka tiko la Vafilista anze lani tiko la Gibita a li sungulela kona.+ 27 A hosi yi yendle swaku a prata li tala hintamu aYerusalema ku fana ni maribye, ni timhandzi ta minsiya ya mikedari na tona a ti li tinyingi swinene ku fana ni minsinya ya makuwa* leyi nga Xefela.+ 28 Ku ni lava a va suka Gibita+ ni ka matiko man’wani va tisa makavhalu ka Solomoni.

29 Timhaka hinkwatu ta wutomi la Solomoni,+ ku sukela a ku sunguleni anze magamu, ti tsaliwile ka leswi nga tsaliwa hi muprofeta Natani+ ni le ka wuprofeta la Ahiya+ wa le Xilo ni ka timhaka leti vulavulaka hi Ido+ lweyi a a kota ku vona minchumu ya ku hlamalisa hi ndlela ya singita leyi khumbaka Yerobuwamu+ n’wana wa Nebati. 30 Solomoni a fume tiko hinkwalu la Israyele na a li Yerusalema, 40 wa malembe. 31 Solomoni a gama a fa, va ya mu lahla lani vavhovho va yena va nga lahliwa kona ka doropa la Davhida papayi wa yena.+ Se Robuwamu n’wana wa yena a sungula ku fuma.+