Tikronika Ta Wumbirhi
25 Amaziya a a ni 25 wa malembe nkama a nga va hosi funtshi a fume 29 wa malembe aYerusalema. Vito la mamani wa yena a ku li Yowadana lweyi a a psaliwe Yerusalema.+ 2 A tame a yendlela Yehovha minchumu yayinene, kambe ku nga li hi mbilu hinkwayu. 3 Hi ku hantlisa nkama mfumu wa yena wu nga sungula ku tiya, a dlaye vatirhi va yena lava va nga dlaya papayi wa yena lweyi a a li hosi.+ 4 Kambe a nga va dlayanga vana va vona hi ku ya hi leswi Yehovha a nga swi hlaya ka buku la Nawu wa Moxe, loko a ku: “Vapapayi a va fanelanga va fela swidjoho swa vana va vona, na vona vana a va fanelanga va fela swidjoho swa vapapayi va vona; mun’wani ni mun’wani a ta fela xidjoho xa yena.”+
5 Amaziya a hlengeleta Vayuda kutani a va yava hi ku ya hi varhangeli va mindjangu ya vona, varhangeli va mintlawa ya 1.000 wa vanhu ni varhangeli va mintlawa ya 100 wa vanhu va lixaka la Yuda ni la Benjamini.+ A va tsalisa ku sukela ka lava a va ni 20 wa malembe ku ya henhla,+ se a kuma swaku ku ni 300.000 wa tinhenha leti a ti djondzisiwile ku lwa nyimpi, leti a ti kota ku khoma tlharhi ni xivhikelo xaxikulu. 6 Amaziya a tlhela a thola 100.000 wa tinhenha ta Israyele a ti hakela 3.420 wa makilu* ya prata. 7 Kambe mutirheli wa Xikwembu xa ntiyiso a ya ka yena a fika a ku: “Wena hosi, u nga fambi ni masonchwa ya tiko la Israyele+ hikusa Yehovha a nga nyimi ni Vayisrayele, hambi ku li va lixaka la Efrayimi. 8 Kambe famba na u li wexe, u nga chavi ku ya lwa. Hikusa loko u nga yendli leswo, Xikwembu xa ntiyiso xi nga yendla swaku u hluliwa hi valala va wena, hikusa Xikwembu xi ni matimba ya ku pfuna+ munhu ni ya ku mu wisa.” 9 Kutani Amaziya a vutisa mutirheli wa Xikwembu xa ntiyiso a ku: “Kambe ni ta ku yini hi 3.420 wa makilu* ya prata lawa ni nga ma nyika masonchwa ya Israyele?” Se mutirheli wa Xikwembu xa ntiyiso a mu hlamula a ku: “Yehovha a nga swi kota ku ku nyika swa swinyingi ku tlula leswo.”+ 10 Kutani Amaziya a tlhelisa masonchwa lawa ma nga ya ka yena na ma ta hi ka lixaka la Efrayimi, a ma byela swaku ma muka. Kambe ma va kwatela ngopfu vanhu va Yuda, se ma muka na ma kwatile swinene.
11 Amaziya a tiya a nga chavi nchumu, a rhangela masonchwa ya yena va ya ka Nkova wa Munyu,+ a fika a dlaya 10.000 wa vavanuna va le Seyiri.+ 12 Masonchwa ya Yuda ma khoma 10.000 wa vavanuna na va ha hanya, ma va yisa henhla ka ribye ma fika ma va txukumetela ahansi, se va pshandlaka hinkwavu. 13 Kambe masonchwa lawa Amaziya a nga ma tlhelisa swaku ma nga fambi na yena nyimpini,+ ma dumele madoropa ya Yuda, ku sukela Samariya+ anze Beti-Horoni;+ ma dlaya 3.000 wa vanhu ma tlhela ma teketela minchumu ya yinyingi.
14 Kambe nkama Amaziya a nga vuya hi ku dlayeni ka Vaedomu, a vuye ni swifaniso leswi vavanuna va Seyiri a va swi gandzela kutani a swi yendla swikwembu swa yena+ funtshi a sungula ku swi khizamela ni ku swi yendlela magandzelo. 15 Kutani Yehovha a kwatela Amaziya swinene, se a rhuma muprofeta lweyi a nga fika ka yena a ku: “Hi mhaka muni u gandzela swikwembu leswi nga tsandzeka ku ponisa vanhu va swona ka mavoko ya wena?”+ 16 Nkama muprofeta na wa ha vulavula, hosi yi ku: “I mani a nga ku veka swaku u va mutsundzuxi wa mina?+ Miyela u ku ntse,+ loko u nga lavi ku fa.” Se muprofeta a miyela, kambe a tlhela a ku: “Na swi tiva swaku Xikwembu xi lava ku ku helisa, hikusa u yendle leswi funtshi a wu swi yingisanga leswi ni nga ku byela swona.”+
17 Loko Amaziya hosi ya Yuda se a vulavule ni vatsundzuxi va yena, a rhuma vanhu swaku va ya ka Yehowaxi n’wana wa Yehowazi n’wana wa Yewu hosi ya Israyele va ya ku: “Tani, a hi tlhangane swaku hi ta lwa.”+ 18 Yehowaxi hosi ya Israyele a rhuma vanhu swaku va ya ka Amaziya hosi ya Yuda va ya ku: “Xinsinyani xa mimintwa xa le Lebanoni xi rhumele rito ka nsinya wa mukedari wa le Lebanoni xi ku: ‘Tshika n’wana wa wena swaku a va nsati wa n’wana wa mina.’ Kambe xiharhi xa nhova xa le Lebanoni xi hundza xi psanyetela xinsinyani xa mimintwa. 19 U tibyele u ku: ‘Ni hlule Edomu.’+ Funtshi leswo swi ku yendla u tibyela, u lava ku dzunisiwa. Kambe swoswi tshama ka yindlo ya wena. Hi mhaka muni u lava ku tivitanela khombo u wa, u tlhela u wisa ni Yuda?”
20 Kambe Amaziya a nga yingisanga,+ hikusa Xikwembu xa ntiyiso a xi lava swaku va hluliwa hi valala va vona,+ hi mhaka ya leswi va nga gandzela swikwembu swa le Edomu.+ 21 Se Yehowaxi hosi ya Israyele a ya kumana na Amaziya hosi ya Yuda aBeti-Xemexi+ ku nga doropa la Yuda, va gama va sungula ku lwa. 22 Tiko la Israyele li hlula tiko la Yuda, se va gama va baleka, mun’wani ni mun’wani a ya kaya* ka yena. 23 Yehowaxi hosi ya Israyele a khoma Amaziya hosi ya Yuda, n’wana wa Yehowaxi, n’wana wa Yehowazi aBeti-Xemexi. Va gama va famba na yena aYerusalema va fika va diliza muru wa Yerusalema, ka ndhawu leyi ringanaka kolomuyani ka 178 wa mametru* ku sukela ka nyanghwa lowu vitaniwaka Nyanghwa wa Efrayimi,+ ku ya fika ka nyanghwa lowu vitaniwaka Nyanghwa wa le ka Ponta.+ 24 A teke woru hinkwalu, prata ni xuma hinkwaxu lexi a xi li ka yindlo ya Xikwembu xa ntiyiso lexi a xi hlayisiwa hi Obede-Edomu ni lexi a xi li lani ku vekiwaka xuma ka yindlo ya wuhosi.+ A tlhele a teka ni vanhu lava a nga va khoma a gama a tlhela a ya Samariya.
25 Amaziya+ n’wana wa Yehowaxi hosi ya Yuda a hanye 15 wa malembe loko se Yehowaxi+ n’wana wa Yehowazi hosi ya Israyele a file.+ 26 Timhaka hinkwatu ta wutomi la Amaziya, ku sukela a ku sunguleni anze wugamu, ti tsaliwile ka Buku leli vulavulaka hi Tihosi ta Yuda ni ta Israyele. 27 Ku sukela ka nkama lowu Amaziya a nga djikela Yehovha, va mu hambele planu* la ku mu dlaya+ aYerusalema, se a baleka a ya Lakixi, kambe va rhuma vanhu swaku va mu landza, va fika va mu dlaya koseniya. 28 Se va vuya na yena va mu pakele ka makavhalu funtshi a lahliwe lani vavhovho va yena va nga lahliwa kona ka doropa la Yuda.