Samuwele Wa Wumbirhi
7 Nkama hosi Davhida se a a tshamisekile ka yindlo ya yena+ ya wuhosi naswona Yehovha a yendle swaku valala va yena hinkwavu lava a va li kusuhi va nga mu karhati, 2 a byele muprofeta Natani+ a ku: “Mina ni tshama ka yindlo leyi nga yakiwa hi mapulangu ya minsinya ya mikedari,+ kambe Areka ya Xikwembu xa ntiyiso yi tshama ka tende leli nga yendliwa hi tipanu.”+ 3 Natani a hlamula hosi a ku: “Yendla leswi u swi pimisaka hikusa Yehovha a na wena.”+
4 Hi wusiku lolelo, Yehovha a byela Natani a ku: 5 “Famba u ya byela mutirheli wa mina Davhida u ku: ‘Yehovha a li: “Hi mhaka muni u lava ku ni yakela yindlo swaku ni ta tshama ka yona?+ 6 Phela a ni se tshama ka yindlo ku sukela siku leli ni nga humesa Vayisrayele aGibita anze namuntlha,+ kambe a ni fambafamba na vona na ni li ka tende ni ka tabernakela.+ 7 Ka nkama hinkwawu lowu a ni fambafamba na vona, u tshama u twa swaku ni khalile ka varhangeli lava a va rhangela tinxaka ta Israyele lava ni nga va veka swaku va risa vanhu va mina, ku nga Vayisrayele ke? U tshama u ni twa ni va vutisa swaku hi mhaka muni mi nga ni yakelanga yindlo hi mapulangu ya minsinya ya mikedari?”’” 8 Swoswi famba u ya byela Davhida mutirheli wa mina u ku: ‘Yehovha murhangeli wa tintsumi a li: “A wu lusa tinyempfu+ nkama ni nga ku langa swaku u rhangela vanhu va mina, ku nga Vayisrayele.+ 9 Ni ta va na wena hinkwaku lomu u nga ta ya kona,+ ni ta helisa valala va wena hinkwavu phambheni ka wena;+ ni ta yendla swaku vito la wena li tiviwa ngopfu+ ku fana ni vanhu lava tiviwaka hintamu amisaveni. 10 Ni ta langela Vayisrayele ku nga vanhu va mina, a ndhawu ya ku tshama ka yona; va ta tshama ka yona hi ku rhula, a va nga ha ta karhatiwa hi munhu; vanhu lava yendlaka swa ku biha a va nge he tlheli va va hlupha ku fana ni leswi a va va hluphisa xiswona,+ 11 ka nkama hinkwawu lowu ni nga veka vayavanyisi+ leswaku va rhangela vanhu va mina, ku nga Vayisrayele. Ni ta yendla swaku valala va wena hinkwavu va nga ku karhati.+
“‘“Naswona Yehovha a ku byele swaku yena Yehovha a ta yendla swaku wuhosi li va ka ndjangu wa wena.+ 12 Nkama u nga ta fa,+ u ta lahliwa ni vavhovho va wena. Kambe ni ta gama ni langa mun’we ka vana* va wena swaku a va hosi ni tlhela ni tiyisa mfumu wa yena.+ 13 Hi yena a nga ta ni yakela yindlo leyi ku nga ta dzunisiwa vito la mina+ ka yona naswona ni ta tiyisa xitshamu xa yena xa wuhosi swaku xi tshama na xi li kona minkama hinkwayu.+ 14 Ni ta va papayi wa yena, yena a ta va n’wana wa mina.+ Loko a yendla swa ku biha ni ta mu laya hi nhonga* ku fana ni leswi vanhu va yendlisaka swona.+ 15 Ni ta tama ni mu rhandza, a swi nga ta fana na Sawulo+ lweyi a ni mu rhandza kambe ni nga tshika ku mu rhandza ni tlhela ni mu susa phambheni ka wena. 16 Yindlo ya wena ni wuhosi la wena swi ta tshama na swi li kona nkama hinkwawu; ni xitshamu xa wena xa wuhosi xi ta tshama na xi tiyile nkama hinkwawu.”’”+
17 Natani a byele Davhida hinkwaswu leswi Xikwembu xi nga mu komba swona.+
18 Se Davhida a gama a nghena ka tende a tshama hansi a khongela ka Yehovha, a ku: “Wena Yehovha Hosi Leyikulu, no va mani mina? Naswona ndjangu wa mina wo va yini leswi u nga ni hlayisa anze namuntlha?+ 19 Wena Yehovha Hosi Leyikulu, u tlhela u byela mina mutirheli wa wena leswi nga ta yendleka ka ndjangu wa mina ka nkama lowu taka. Yehovha Hosi Leyikulu, nawu lowu wu ya ka vanhu hinkwavu. 20 Kutani mina Davhida mutirheli wa wena a ni nge he hlayi nchumu, hikusa u ni tiva kahle,+ wena Yehovha Hosi Leyikulu. 21 Hi mhaka ya leswi u nga swi hlaya ni leswi u swi lavaka ka mbilu ya wena, u ni yendlele minchumu leyi hinkwayu ya ku hlamalisa naswona u ni byele yona.+ 22 Hi leswo swi ku yendlaka u va munhu wa ku hlamalisa,+ wena Yehovha Hosi Leyikulu. A ku na munhu wa ku fana na wena,+ naswona hi wena ntsena u nga Xikwembu;+ hinkwaswu leswi hi nga swi twa hi tindleve ta hina swi tiyisa mhaka leyi. 23 A ku na tiko lin’wani lani misaveni leli fanaka ni vanhu va wena, ku nga Vayisrayele.+ U va ponisile swaku va va vanhu va wena,+ u yendla swaku vito la wena li tiviwa hintamu+ hi ku va yendlela minchumu ya yinyingi ya ku hlamalisa.+ U hlongole matiko ni swikwembu swa wona hi mhaka ya vanhu va wena lava u nga va ponisa aGibita. 24 U yendle swaku Vayisrayele va tshama na va li vanhu va wena minkama hinkwayu;+ kasi wena Yehovha, u ve Xikwembu xa vona.+
25 “Swoswi wena Yehovha Xikwembu xa mina, minkama hinkwayu yendla leswi u nga ni tshembisa swona mina ni ndjangu wa mina, naswona swi yendli hi ku ya hi leswi u nga ni tshembisa swona.+ 26 Vito la wena a li dzunisiwe minkama hinkwayu,+ swaku vanhu va ta ku: ‘Yehovha murhangeli wa tintsumi i Xikwembu xa Israyele.’ Yendla swaku ndjangu wa mina wu tiya phambheni ka wena,+ 27 hikusa wena Yehovha murhangeli wa tintsumi, Xikwembu xa Israyele, u ni byelile mina mutirheli wa wena, u ku: ‘Ni ta yendla swaku wuhosi li nga suki ka ndjangu wa wena.’*+ Hi leswo swi ni yendlaka ni nga chavi ku khongela ka wena ni vulavula hi mhaka leyi. 28 Wena Yehovha Hosi Leyikulu u Xikwembu xa ntiyiso, leswi u swi hlayaka i ntiyiso+ naswona u ni tshembise ku ni yendlela minchumu yayinene. 29 Tsaka hi ku katekisa ndjangu wa mina naswona a wu tshame phambheni ka wena minkama hinkwayu,+ hikusa wena Yehovha Hosi Leyikulu u ni tshembisile naswona ndjangu wa mina mutirheli wa wena a wu kateke minkama hinkwayu hi minkateko leyi taka hi ka wena.”+