Tikronika Ta Wumbirhi
34 Yosiya+ a a ni 8 wa malembe nkama a nga va hosi funtshi a fume 31 wa malembe aYerusalema.+ 2 A yendlele Yehovha minchumu yayinene funtshi a yendle minchumu hinkwayu leyi Davhida vhovho wa yena a nga yi yendla, a nga zanga a tshika ku yendla minchumu yayinene.
3 Hi lembe la wu 8 la ku fuma ka yena na a ha li mufana, a sungule ku lava Xikwembu xa Davhida vhovho wa yena+ funtshi hi lembe la wu 12 a sungule ku basisa doropa la Yuda ni la Yerusalema+ hi ku susa tindhawu ta ku tlakuka+ leti a ku gandzeliwa ka tona, timhandzi ta Axera,* swifaniso swa ku vatliwa+ ni swifaniso swa nsimbi. 4 Va tlhele va dilizela maaltari ya swifaniso swa Bali, Yosiya na a swi vona funtshi a tseme leswi a va tlhateka ka swona swinun’hwelisu,* leswi a swi li henhla ka wona. A tlhele a tshovetela timhandzi ta Axera,* swifaniso swa ku vatliwa ni swa ku yendliwa hi nsimbi, a swi sila swi va mapa a gama a teka mapa ya kona a ya ma xwanya ka masirha ya lava a va swi yendlela magandzelo.+ 5 A hise marhambu ya vaprista ahenhla ka maaltari ya vona+ kutani a basisa doropa la Yuda ni la Yerusalema.
6 Ka madoropa ya lixaka la Manasi, la Efrayimi,+ la Simiyoni anze ka lixaka la Naftali ni ka tindhawu ta vona leti a ti hohlokile,* 7 a dilize maaltari a tlhela a tshovelela timhandzi ta Axera* ni swifaniso swa ku vatliwa,+ a swi sila swi va mapa; a tlhela a tsema hinkwaswu swa ku tlhateka ka swona a swinun’hwelisu ka tiko hinkwalu la Israyele,+ loko a gamile a tlhelele aYerusalema.
8 Hi lembe la wu 18 la ku fuma ka yena na se a basise tiko ni tempele, a rhume Xafani+ n’wana wa Azaliya, Mazeya lweyi a a rhangela doropa na Yowa n’wana wa Yowahazi lweyi a a tsala leswi a swi yendleka swaku va lunghisa yindlo ya Yehovha Xikwembu xa yena.+ 9 Va ye ka muprista wamukulu Hilikiya va ya mu nyika male leyi a yi tisiwile ka yindlo ya Xikwembu, leyi Valevhi lava va vonelelaka tinyanghwa va nga yi hlengeleta ka va ka Manasi, va ka Efrayimi ni ka tiko hinkwalu la Israyele,+ ku patsa ni lixaka la Yuda, la Benjamini ni ka lava tshamaka aYerusalema. 10 Kutani va yi nyike lava nga langiwa swaku va vonelela ntirho ka yindlo ya Yehovha. Se vatirhi va yi tirhisile swaku va ta lunghisa leswi nga wonheka ka yindlo ya Yehovha. 11 Va yi nyike lava tivaka ku yendla ntirho wa mavoko ni lava ku yaka swaku va xava maribye ya ku tsemiwa kahle ni timhandzi swaku ti tiyisa yindlo ti tlhela ti tirhisiwa swaku ku yakiwa tiyindlo leti tihosi ta Yuda ti nga ti tshika ti hohloka.+
12 Vavanuna volavo a va yendla ntirho hi ku tshembeka.+ Ku langiwe Valevhi ku nga Yahati na Obadiya, lava a va li Vamerari,+ na Zakariya na Mexulami, lava a va li Vakohata+ swaku va vonelela ntirho. Valevhi hinkwavu lava a va swi kota ku yimbelela kahle,+ 13 a va vonelela vatirhi ni vanhu hinkwavu lava a va yendla mintirho ya ku hambanahambana; kasi Valevhi van’wani a va li vasekretariyu,* varhangeli ni vavoneleli va tinyanghwa.+
14 A nkama a va humesa male leyi nga tisiwa ka yindlo ya Yehovha,+ muprista Hilikiya a kume buku la Nawu wa Yehovha+ leli nga tsaliwa hi Moxe.+ 15 Se Hilikiya a byele Xafani lweyi a a li sekretariyu a ku: “Ni kume buku la Nawu ka yindlo ya Yehovha.” Hilikiya a gama a teka buku a li nyika Xafani. 16 Se Xafani a famba ni buku ka hosi a fika a ku: “Vatirhi va wena va yendla hinkwaswu leswi u nga va rhuma swona. 17 Va humese male leyi a yi li ka yindlo ya Yehovha, va yi nyika vavanuna lava nga langiwa swaku va vonelela ntirho ni lava yendlaka ntirho.” 18 Xafani lweyi a a li sekretariyu a tlhela a byela hosi a ku: “Ku ni buku leli ni nga nyikiwa hi muprista Hilikiya.”+ Se Xafani a sungula ku li lerhela hosi.+
19 A nkama hosi yi nga twa leswi nga tsaliwa ka buku la Nawu, yi handzula mpahla ya yona.+ 20 Yi gama yi byela muprista Hilikiya, Ayikami+ n’wana wa Xafani, Abidoni n’wana wa Mikiya, Xafani lweyi a a li sekretariyu na Asaya mutirhi wa yona yi ku: 21 “Fambani mi ya ni vutisela ka Yehovha, mi vutisela vanhu lava nga sala aIsrayele ni Yuda swaku leswi swi nga tsaliwa ka buku leli nga kumiwa swi hlaya swa ku yini; hikusa Yehovha a ta hi kwatela hintamu hi mhaka ya leswi vavhovho va hina va kalaka va nga yingisanga leswi Yehovha a nga swi hlaya, ni leswi va kalaka va nga swi kotanga ku yendla hinkwaswu leswi nga tsaliwa ka buku la Nawu.”+
22 Se Hilikiya ni lava nga rhumiwa hi hosi va ya ka muprofeta Ulda+ lweyi a a li nsati wa Xalumi. Xalumi a a vonelela ndhawu leyi a ku vekiwa ka yona mpahla funtshi a a li n’wana wa Tikivha n’wana wa Harasi. Ulda a a tshama ka dixtritu leli vitaniwaka Dixtritu la Nyuwani la Yerusalema; se va fike va vulavula na yena kolanu.+ 23 Ulda a va byela a ku: “Yehovha Xikwembu xa Israyele a li: ‘Fambani mi ya byela lweyi a nga mi rhuma swaku mi ta ka mina, mi ku: 24 “Yehovha a li: ‘Ni ta tisa khombo ka ndhawu leyi ni ka vanhu hinkwavu lava tshamaka ka yona,+ ni ta tisa makhombo hinkwawu lawa ma nga tsaliwa ka buku la Nawu+ leyi va nga yi lerhela hosi ya Yuda. 25 Leswi va nga ni tshika+ funtshi va hiselaka swikwembu swin’wani magandzelo swaku va ni kwatisa+ hi mintirho hinkwayu ya mavoko ya vona, ni ta va kwatela, funtshi ku kwata ka mina a ku nga ta hela.’”+ 26 Kambe fambani ka hosi ya Yuda leyi nga mi rhuma ku ta vutisa Yehovha, mi fika mi yi byela mi ku: “Hi leswi Yehovha Xikwembu xa Israyele a nga swi hlaya: ‘Ka leswi u nga swi twa,+ 27 leswi u nga ni yingisa u tlhela u tiveka hansi ka mina, nkama u nga twa leswi ni nga swi hlaya hi ndhawu leyi ni lava tshamaka ka yona, u gama u handzula mpahla ya wena u sungula ku rila phambheni ka mina, na mina ni ku twile,+ ku vula mina Yehovha. 28 Funtshi hi leswo swi nga ta yendla u lahliwa hi ku rhula lani vavhovho va wena va nga lahliwa kona, a wu nga ta ma vona makhombo hinkwawu lawa ni nga ta ma tisa ka ndhawu leyi ni ka vanhu lava tshamaka ka yona.’”’”+
Se lava va nga rhumiwa va ya byela hosi hinkwaswu leswi va nga byeliwa swona. 29 Hosi yi rhuma vanhu swaku va ya vitana madoda hinkwawu ya Yuda ni ya Yerusalema.+ 30 Hosi yi gama yi ya ka yindlo ya Yehovha ni vavanuna hinkwavu va Yuda, hinkwavu lava tshamaka aYerusalema, vaprista, Valevhi ni vanhu hinkwavu, ku sukela ka wamutsongo ku ya ka wamukulu. Yi lerhela vanhu hinkwaswu leswi nga tsaliwa ka buku la ntwananu leli nga kumiwa ka yindlo ya Yehovha.+ 31 A hosi yi nyima ka ndhawu ya yona yi yendla ntwananu+ phambheni ka Yehovha yi mu tshembisa swaku yi ta yingisa minawu hinkwayu ya Yehovha, yi tlhela yi yendla hinkwaswu* leswi a swi hlayaka hi mbilu hinkwayu ni hi wutomi la yona hinkwalu+ hi ku yendla hinkwaswu leswi yi nga swi tshembisa ka ntwananu lowu, leswi nga tsaliwa ka buku leli.+ 32 Yi byele hinkwavu lava a va li aYerusalema ni va ka Benjamini swaku va pfumelelana ni ntwananu lowu. Se lava a va tshama Yerusalema va pfumelelane na wona ntwananu wa Xikwembu xa vavhovho va vona.+ 33 Kutani Yosiya a susa minchumu hinkwayu ya ku nyenyentsa* ka tiko hinkwalu la Vayisrayele+ naswona a pfune vanhu hinkwavu aIsrayele swaku va gandzela Yehovha Xikwembu xa vona. A va tshikanga ku gandzela Yehovha Xikwembu xa vavhovho va vona nkama a ku fuma yena Yosiya.