Nehemiya

6 Nkama Sanibalati, Tobiya,+ Gexemi wa Muarabiya+ ni valala va hina hinkwavu va nga byeliwa swaku ni hetile ku pfuxa muru+ ni swaku a ka ha salanga mbhovo wa ku kala wu nga pfaliwanga (hambileswi a ni nge se vekela swipfalu ka tinyanghwa),+ 2 Sanibalati na Gexemi va ni rhumele rito hi ku hantlisa va ku: “Tani hi ta tlhangana ka xidoropani xin’wani xa Nkova wa Onu+ hi nkama lowu hi nga ta twanana wona.” Kambe a va yendle planu la ku ni vavisa. 3 Se ni rhume vanhu swaku va ya va byela leswi: “Ni khomekile hi ntirho wawukulu, a ni nge swi koti ku ta. Hi mhaka muni ntirho wu fanele wu nyima hi mhaka ya n’wina?” 4 Va ni rhumele rito la ku fana ka 4, kambe ni va hlamule swa ku fana.

5 Sanibalati a tlhele a rhumela mutirhi wa yena ka mina hi khambi la wu 5, na a ni marito ya ku fana ni ya ku sungula ni karta la ku kala li nga lemiwanga. 6 Ka lona a ku tsaliwe leswi: “Se swa tiveka xikarhi ka matiko, na Gexemi+ a vula swoleswo, swaku wena ni Vayuda mi lava ku tereka.+ Hi leswo swi yendlaka mi yaka muru; naswona hi ku ya hi leswi swi hlayiwaka, wena u ta va hosi ya vona. 7 U tlhele u langa vaprofeta swaku va byela vanhu hi ta wena ka doropa hinkwalu la Yerusalema va ku: ‘Ku ni hosi aYuda!’ Se mhaka leyi yi ta byeliwa hosi. Tani hi ta bulisana hi mhaka leyi.”

8 Kambe ni te: “A swi kona ndhawu hinkwaswu leswi u swi vulaka; wo swi sukela ka nhloko ya wena.” 9 Hikusa hinkwavu a va zama ku hi chavisela va ku: “Va ta hela matimba, ntirho wu ta nyima.”+ Xikwembu xa mina, na ku kombela ni nyiki matimba.+

10 Kutani ni ya kaya ka Xemaya n’wana wa Delayi, n’wana wa Mehetabeli hi nkama lowu a a nga humi ka yindlo ya yena. A te: “A hi veki nkama lowu hi nga ta tlhangana hi wona ka yindlo ya Xikwembu xa ntiyiso atempeleni, hi fika hi khiya swipfalu swa tempele, hikusa va lava ku ku dlaya. Va ta ta va ta ku dlaya niwusiku.” 11 Kambe ni te: “Indjhe munhu wa ku fana na mina a fanele a baleka? Indjhe munhu wa ku fana na mina a nga nghena atempeleni kutani a tama a hanya?+ A ni nga ta ya ndhawu!” 12 Se ni vhela ni swi tsumbula swaku a a nga rhumiwanga hi Xikwembu, kambe a a xaviwe hi Tobiya na Sanibalati+ swaku a ta ni kanganyisa. 13 A a xaviwile swaku a ta ni chavisela swaku ni ta djoha, va ta gama va va ni xa ku ni wonha vito ni ku ni danisa hi xona.

14 Xikwembu xa mina, u nga mu khohlwi Tobiya+ na Sanibalati ni leswi a va swi yendla ku patsa na Nowadiya muprofeta wa xisati ni vaprofeta lavan’wani hinkwavu lava a va tshamela ku zama ku ni chavisa.

15 A muru wu hetiwe hi diya 25 ka wheti ya Elulu,* loko se ku hundze 52 wa masiku.

16 Nkama valala va hina hinkwavu va nga twa mhaka leyi ni nkama matiko hinkwawu lama nga matlhelweni ka hina ma nga swi vona, swi va danisile swinene,+ se va gama va swi vona swaku hi yendle ntirho lowu hi ku pfuniwa hi Xikwembu xa hina. 17 Ka masiku wolawo, varhangeli+ va le Yuda a va tsalela Tobiya makarta ya manyingi naswona a a ma hlamula. 18 Vanhu va vanyingi va le Yuda a va nyima na yena hikusa a a li mukon’wani wa Xekaniya n’wana wa Ara+ naswona Yehohanani n’wana wa yena a a teke n’wana wa Mexulami+ n’wana wa Berekiya. 19 Funtshi a va tshamela ku ni byela swaswinene hi Tobiya kutani va ya mu byela leswi mina ni nga swi vula. Se Tobiya a a ni tsalela makarta a zama ku ni chavisa.+