Tinhlayo

18 Yehovha a tlhela a byela Aroni a ku: “Wena ni vana va wena, ni vandjangu wa wena mi ta hlamula hi mhaka ya xihoxo lexi nga ta yendleka ka ndhawu leyi kwetsimaka,+ naswona wena ni vana va wena mi ta hlamula hi mhaka ya xihoxo lexi nga ta yendleka ka ntirho wa n’wina wa wuprista.+ 2 Teka ni vamakwenu va lixaka la Levhi, ku nga lixaka la vavhovho va wena, swaku va ta pfuna+ wena ni vana va wena phambheni ka tende la Wumboni.+ 3 Va ta yendla ntirho lowu u nga ta va nyika wona ni ntirho hinkwawu lowu va faneleke va wu yendla ka tende.+ Kambe a va fanelanga va tshinela kusuhi ni swibya swa ndhawu ya ku kwetsima ni ka altari swaku wena na vona mi nga fi.+ 4 Va ta tirha na wena va yendla mintirho hinkwayu leyi lavekaka ka tende la ntlhanganu naswona munhu mun’wani ni mun’wani wa ku kala a nga li muprista* a nga fanelanga a tshinela kusuhi na wena.+ 5 Mi fanele mi yendla mintirho ya n’wina ka ndhawu ya ku kwetsima+ ni ka altari,+ swaku ni nga ha va kwateli+ Vayisrayele. 6 Se mina ni teke vamakwenu, ku nga Valevhi xikarhi ka Vayisrayele ni mi nyika vona.+ Va nyikiwe Yehovha swaku va yendla mintirho leyi nga kona ka tende la ntlhanganu.+ 7 Wena ni vana va wena mi ta yendla mintirho ya wuprista ka altari ni ka leswi nga ndzhaku ka kortina,+ mi fanele mi yendla ntirho lowu.+ Phela ni yo mi nyika ntirho wa wuprista swaku wu va wa n’wina naswona mun’wani ni mun’wani lweyi a kalaka a nga li muprista* lweyi a nga ta tshinela, a fanele a dlayiwa.”+

8 Yehovha a tlhela a byela Aroni a ku: “Se mina ni ku veka swaku u vonelela minyikelo leyi yi nyikeliwaka ka mina.+ Wena ni vana va wena ni ta mi pambulela swin’wani ka swilo hinkwaswu swa ku kwetsima leswi nyikeliwaka hi Vayisrayele hi masiku ni masiku.+ 9 Swilo swa ku kwetsima swinene leswi nyikeliwaka leswi faneleke swi va swa wena ka magandzelo lawa ma nga yendliwa hi ndzilu hi leswi: Gandzelo lin’wani ni lin’wani leli va li yendlaka ku patsa ni magandzelo ya swakudla,+ magandzelo ya vona ya xidjoho,+ magandzelo ya vona ya nandzu+ lawa va ni yendlelaka wona. Hinkwawu ma kwetsima swinene ka wena ni vana va wena. 10 U fanele u swi dla ka ndhawu ya ku kwetsima hintamu. Vavanuna hinkwavu va nga swi dla.+ Swi ta va swa ku kwetsima ka wena.+ 11 Swin’wani leswi nga ta va swa wena hi leswi: Tinyiko hinkwatu leti Vayisrayele va ti nyikelaka+ ku patsa ni magandzelo hinkwawu lawa ma fambisiwaka.+ Ni swi nyika wena ni vana va wena, hi masiku ni masiku.+ Mun’wani ni mun’wani lweyi a nga tenga ka ndjangu wa wena a nga swi dla.+

12 “Ni ku nyika+ mafurha hinkwawu yamanene ni vhinyu hinkwalu la nyuwani lalinene ni trigu,* ka leswi va swi nyikaka Yehovha, leswi va nga rhanga va swi tshovela.+ 13 Mihandzu hinkwayu leyi rhangaka yi wupfa ka tiko la vona, leyi va nga ta yi tisa ka Yehovha, yi ta va ya wena.+ Mun’wani ni mun’wani lweyi a nga tenga ka ndjangu wa wena a nga swi dla.

14 “Xin’wani ni xin’wani lexi nga nyikeliwa ka Xikwembu aIsrayele xi ta va xa wena.+

15 “Matevula ya swilo hinkwaswu leswi hanyaka,+ leswi va nga ta swi nyikela ka Yehovha, kumbe i munhu kumbe i xiharhi, swi fanele swi va swa wena. Kambe u fanele u kutsula matevula ya vanhu+ ni matevula ya swifuyu leswi kalaka swi nga tenganga.+ 16 U fanele u xi kutsula hi male leyi xi kutsuliwaka hi yona ku sukela loko xi ni wheti ku ya henhla, hi ku ya hi male leyi nga gemiwa ya kolomuyani ka 57 wa magrama*+ ya prata hi ku ya hi mapezela ya ndhawu ya ku kwetsima.* I 12 wa magrama.* 17 Kambe a wu fanelanga u kutsula homu ya xinuna ya matevula kumbe xinyempfani xa xinuna xa matevula, kumbe mbuti ya matevula.+ Swa kwetsima. U fanele u n’wan’wasela ngati ya swona ka altari,+ u hisa mafurha ya swona swaku ma va gandzelo leli yendliwaka hi ndzilu li nun’hwela kahle ka Yehovha.+ 18 Nyama ya swona yi ta va ya wena. Ku fana ni xifuva xa gandzelo leli fambisiwaka ni nenge wa xinene, swi fanele swi va swa wena.+ 19 Minyikelo hinkwayu ya ku kwetsima leyi Vayisrayele va nga ta yi nyikela ka Yehovha,+ ni ku nyika yona swaku yi va ya wena ni vana va wena va madjaha ni va tintombhi hi masiku ni masiku.+ I ntwananu wa munyu lowu nga ta tirha hi masiku ni masiku xikarhi ka Yehovha na wena ku patsa ni vana va wena.”

20 Yehovha a tlhela a byela Aroni a ku: “A wu nga ta va ni tshomba ka tiko la vona naswona a wu nge nyikiwi hambi ndhawunyana ka tiko xikarhi ka vona.+ Mina ni tshomba la wena xikarhi ka Vayisrayele.+

21 “Se vana va Levhi, ni va nyika swa wukhume*+ aIsrayele swi ta va tshomba la vona hi mhaka ya ntirho lowu va wu yendlaka ka tende la ntlhanganu. 22 Vayisrayele va nga ha tshineli ka tende la ntlhanganu, hikusa va ta tivangela xidjoho va gama va fa. 23 I Valevhi ntsena lava nga ta tirha ka tende la ntlhanganu naswona hi vona va nga ta tihlamulela ka xihoxo xa vona.+ Nawu lowu wu fanele wu tirha hi masiku ni masiku ka vatukulu va n’wina hinkwavu, wa leswaku a va fanelanga va va ni tshomba xikarhi ka Vayisrayele.+ 24 Hikusa Valevhi ni va nyika swa wukhume la leswi Vayisrayele va swi nyikelaka ka Yehovha swaku swi va tshomba la vona. Hi leswo swi nga yendla ni va byela ni ku: ‘A va fanelanga va va ni tshomba xikarhi ka Vayisrayele.’”+

25 Se Yehovha a byela Moxe a ku: 26 “U fanele u byela Valevhi u ku: ‘Mi ta yamukela swa wukhume leswi ni nga mi nyika swona swi huma ka Vayisrayele, swi ta va tshomba la n’wina,+ kutani na n’wina mi fanele mi humesa swa wukhume ka wukhume leli mi nga li yamukela swaku swi va minyikelo ka Yehovha.+ 27 Swi ta tekiwa swi li minyikelo ya n’wina, swi fanisiwa ni minyikelo ya trigu leli taka hi le xihulelweni,*+ vhinyu la linyingi kumbe mafurha ya n’wina. 28 Leswo swi ta mi pfuna na n’wina swaku mi nyikela ka Yehovha, mi pambula ka wukhume la swilo hinkwaswu leswi humaka ka Vayisrayele kutani ka swona mi ta nyikela ka Yehovha hi ku swi nyika muprista Aroni. 29 Mi ta nyikela minyikelo ya ku kwetsima ka Yehovha hi ku tirhisa swilo swa ku hambanahambana leswi mi nga ta swi pambula ka swilo swaswinene ngopfu leswi mi nga nyikiwa swona.’+

30 “U fanele u va byela u ku: ‘Loko mi nyikela hi swilo swaswinene ngopfu, swi ta tekiwa swi li ntshovelo wa le xihulelweni naswona swi li vhinyu kumbe mafurha ya Valevhi. 31 N’wina ni mindjangu ya n’wina mi nga swi dla ka ndhawu yin’wani ni yin’wani, hikusa i muholo wa n’wina hi mhaka leswi mi tirhaka ka tende la ntlhanganu.+ 32 Loko mi nyikela swilo swaswinene ngopfu ka swona a mi nge tivangeli xidjoho ka mhaka leyi, a mi fanelanga mi chakisa swilo swa ku kwetsima swa Vayisrayele hikusa mi ta fa.’”+