Yobo
32 Kutani vavanuna lavanharhu va tshika ku hlamula Yobo, hikusa a a tshemba swaku a lulamile.+ 2 Kambe Elihu n’wana wa Barakeli wa le Buza,+ wa ndjangu wa Arama a a kwate hintamu. A a kwatele Yobo hi mhaka ya leswi a a tivona a lulamile ku tlula Xikwembu.+ 3 A a va kwatele swinene ni vanghanu va Yobo lavayani vavanharhu hikusa a va swi kotanga ku mu hlamula kambe va vule swaku Xikwembu a xi lulamanga.+ 4 Leswi Elihu a a li mutsongo ka vona a va nyimele va za va gama ku vulavula swaku a ta hlamula Yobo.+ 5 Loko Elihu a vona leswaku vavanuna lavayani vavanharhu a va swi koti ku hlamula, a kwate ngopfu. 6 Kutani Elihu n’wana wa Barakeli wa le Buza a sungula ku vulavula a ku:
“Ni mutsongo
N’wina mi vakulu.+
Hi mhaka leyo ni mi hloniphile ni nga hlayi nchumu+
Ni miyelile ni nga mi byeli leswi ni swi tivaka.
7 Ni tibyele swaku: ‘Lava nga vakulu a va vulavule,
Lava nga ni malembe ya manyingi a va kombise swaku va tlharihile.’
8 Kambe i moya wa ku kwetsima lowu Xikwembu xi wu nyikaka vanhu,
Ni ku hefemula ka Lweyi Wa Matimba Hinkwawu loku ku va nyikaka ku twisisa.+
9 Ku va ni malembe ya manyingi ntsena a swi yendli munhu a tlhariha,
Naswona a hi vanhu vavakulu ntsena lava twisisaka swaswinene.+
10 Kutani ni li: ‘Ni yingiseni,
Na mina ni ta mi byela leswi ni swi tivaka.’
11 Phela ni nyimile swaku ni ta twa leswi mi swi hlayaka;
Ni tame ni yingisa leswi mi swi pimisaka,+
Nkama a mi lavetela swa ku swi hlaya.+
12 Ni mi yingisele kahle,
Kambe a nga kona ka n’wina lweyi a nga kombisa swaku Yobo a hoxile,
Kumbe ku hlamula leswi a a swi hlaya.
13 Kutani mi nga hlayi mi ku: ‘Hi tlharihile;
I Xikwembu lexi nga hlayaka swaku a hoxile, a hi munhu.’
14 Leswi a a nga vulavuli na mina,
Ni ta mu hlamula hi ndlela ya ku hambana ni ya n’wina.
15 Va chavile, a va ha na tinhlamulu;
A va ha na xa ku xi hlaya.
16 Ni va nyimelile, kambe a va ha tami va vulavula;
Vo nyima va nga ha hlayi nchumu.
17 Se na mina ni ta hlamula;
Na mina ni ta hlaya leswi ni swi tivaka,
18 Hikusa ni ni swinyingi swa ku swi hlaya;
Moya wa ku kwetsima lowu nga ndzeni ka mina wu ni yendla ni vulavula.
19 Khwirhi la mina li fana ni vhinyu leli nga mbhonyiwa,
Li fana ni swa ku chela ka swona vhinyu* swa nyuwani leswi lavaka ku buvuka.+
20 Ni pfumeleleni ni vulavula swaku ni ta pepisa mbilu ya mina!
Ni ta pfula nomo wa mina ni hlamula.
21 A ni nga ta kheta munhu;+
Kumbe ni zama ku tlakusa munhu hi ku lava ku mu tsakisa,
22 Hikusa a ni swi koti ku zama ku tlakusa munhu swaku ni mu tsakisa;
Loko no yendla leswo, Lweyi a nga ni yendla a a ta hantla a ni helisa.