Nehemiya

2 Hi wheti ya Nisani,* hi lembe la wu 20+ la ku fuma ka Hosi Artaxexe,+ ku vekiwe vhinyu phambheni ka hosi, kutani ni teka vhinyu ni nyika hosi, ku nga leswi a ni tolovela ku swi yendla.+ Kambe a ni nge se tshama ni xukuvala phambheni ka yona. 2 Se hosi yi ni vutisa yi ku: “Hi mhaka muni u xukuvalile kuve a wu vabyi? Devhi ku ni lexi ku dlaka mbilwini ya wena.” Kutani ni sungula ku chava.

3 Se ni hlamula hosi ni ku: “Hosi a yi hanyi hi masiku! Ni xukuvalile hikusa doropa, ku nga ndhawu leyi vavhovho va mina va nga lahliwa ka yona, yi hohlotiwile naswona swipfalu swa lona swi hisiwile.”+ 4 Kutani hosi yi ku: “U lava ni ku yendlela yini?” Ni yo vhela ni khongela ka Xikwembu xa le tilweni.+ 5 Se ni gama ni hlamula hosi ni ku: “Loko hosi yi swi tsakela naswona loko mina mutirheli wa wena ni kume timpsalu ka wena, ni pfumeleli ni ya Yuda, ka doropa leli vavhovho va mina va nga lahliwa ka lona, swaku ni ya tlhela ni li yaka.”+ 6 Kutani hosi yi ni vutisa na yi tshame ni nsati* wa yona yi ku: “Loko u famba u ta heta nkama muni naswona u ta vuya siku muni ke?” Se ni yi byela leswaku ni ta vuya siku muni,+ kutani hosi yi ni chunsa ni famba.+

7 Se ni byela hosi ni ku: “Loko hosi yi swi tsakela, ni kombela makarta* lawa ni nga ta ma nyika vagovhernadori va ndhawu leyi nga Wuxeni ka Nambu wa Ewufrata,+ swaku va ni pfumelela ni hundza anze ni ya fika Yuda, 8 ni karta leli yaka ka Azafi muhlayisi wa Nsimu ya Hosi, leswaku a ni nyika timhandzi ni ta yaka tinyanghwa ta Tempele+ ni mimuru ya doropa+ ni yindlo leyi ni nga ta tshama ka yona.” Kutani hosi yi ni nyika wona,+ hikusa Xikwembu a xi li na mina.*+

9 Ni game ni fika ka vagovhernadori va ndhawu leyi nga aWuxeni ka Nambu wa Ewufrata, ni va nyika makarta lama taka hi ka hosi. Hosi yi tlhele yi ni nyika varhangeli va masonchwa ni vafambisi va makavhalu kuva va ni heleketa. 10 Nkama Sanibalati+ wa Muhoroni na Tobiya+ mutirhi lweyi a nga Muamoni+ va nga swi twa, a va tsakanga hi ku tiva swaku ku ni munhu mun’wani lweyi a nga tela ku ta pfuna Vayisrayele.

11 Se ni game ni fika aYerusalema, lomu ni nga tshama masiku manharhu. 12 Kutani ni pfuka niwusiku ni vavanuna vangali vangani, kambe a ni swi byelanga munhu leswi Xikwembu xa mina xi nga ni byela leswaku ni swi yendla aYerusalema naswona a ni nga na xifuyu xin’wani handle ka lexi a ni famba hi xona. 13 Se ni huma niwusiku hi Nyanghwa wa le Nkoveni+ phambheni ka Xihlovo xa Nyoka Yayikulu ni ya ka Nyanghwa wa Swidulu swa Nkuma.+ Ni kambela muru wa doropa la Yerusalema lowu nga diliziwa ni swipfalu swa lona leswi nga hisiwa.+ 14 Kutani ni hundza ni ya ka Nyanghwa wa Xihlovo+ ni lomu a ku Hlayisiwa Mati ya Hosi,* kambe a ku nga na ndhawu ya ku hundza xifuyu lexi a ni famba hi xona. 15 Kambe ni tame ni famba hi nkova+ wusiku lolelo, na ni kambela muru, se ni gama ni vuya ni nghena hi Nyanghwa wa le Nkoveni.

16 Vapfunisi va vagovhernadori+ a va nga ku tivi lomu ni nga ya kona ni swaku a ni ya yendla yini, hikusa a ni nga se va byela nchumu Vayuda, vaprista, varhangeli, vapfunisi va vagovhernadori ni vatirhi lavan’wani hinkwavu. 17 Hi wugamu ni va byele ni ku: “Ma xi vona xiyimu lexi xa ku biha lexi hi nga ka xona, Yerusalema a hohlotiwile ni swipfalu swa kona swi hisiwile. Tanani, a hi tlheleni hi yaka muru wa Yerusalema swaku hi ta humula ku poyiliwa.” 18 Se ni va byela leswi Xikwembu xa mina xi nga ni seketelisa swona,+ ni marito lawa hosi yi nga ni byela wona.+ Kutani va ku: “Hi nga ha dleni nkama, a hi sunguleni ku yaka.” Kutani va tiyisana swaku va yendla ntirho wawunene.+

19 Nkama Sanibalati wa Muhoroni, Tobiya+ mutirhi lweyi a nga Muamoni+ na Gexemi wa Muarabiya+ va nga twa mhaka leyi, va sungula ku hi hleka+ ni ku hi poyila va ku: “Mi yendla yini? Mo terekela hosi?”+ 20 Kambe ni va hlamula ni ku: “Xikwembu xa le tilweni hi xona lexi nga ta hi pfuna,+ hina vatirheli va xona hi ta yaka; kambe n’wina a mi na nchumu la, funtshi a mi na timfanelo aYerusalema.”+