Mahungu Ya Ku Tsakisa Ya Ku Tsaliwa Hi Marka

15 Nkama li nga xa, vaprista vavakulu, madoda ni vatsali, lava lumbaka Tribunali Lalikulu,* va tlhangana swaku va yendla planu* hi Yesu; kutani va mu boha va famba na yena, va ya mu nyikela ka Pilatu.+ 2 Se Pilatu a mu vutisa a ku: “U Hosi ya Vayuda ke?”+ A hlamula a ku: “Wena hi wexe u vula swona.”+ 3 Kambe vaprista vavakulu a va mu lumbeta hi swilo swa swinyingi. 4 Pilatu a tlhela a mu vutisa a ku: “U li yini hi leswi va swi vulaka?+ A wu swi twi hinkwaswu leswi va ku lumbetaka swona?”+ 5 Kambe Yesu a nga mu hlamulanga nchumu, lakakuva Pilatu a hlamala.+

6 Ka fexta lin’wani ni lin’wani la paxkwa, hosi a yi tolovela ku chunsela xitshungu a xib’ochwa lexi a va xi kombela.+ 7 Ka nkama wolowo, a ku ni wanuna lweyi a vitaniwaka Barabasi lweyi a a pfaleliwe ni ntlawa wa vanhu lava nga terekela mfumu va tlhela va dlayetela vanhu. 8 Kutani xitshungu xi ya ka Pilatu xi ya kombela ku yendleliwa leswi a a tala ku xi yendlela swona. 9 Pilatu a ku: “Mi lava swaku ni mi chunsela Hosi ya Vayuda ke?”+ 10 Hikusa a a swi tiva swaku vaprista vavakulu a va mu tise ka yena hi mhaka ya leswi a va mu nyenya.+ 11 Kambe vaprista vavakulu va hlohlotela xitshungu leswaku xi kombela swaku ku chunsiwa Barabasi.+ 12 Pilatu a tlhela a vutisa xitshungu a ku: “Se ni ta yendla yini hi lweyi mi mu vitanaka Hosi ya Vayuda?”+ 13 Xi tlhela xi huwelela xi ku: “A a yisiwi mhandzini!”*+ 14 Kambe Pilatu a tlhela a ku: “Kasi hi mhaka muni? A wonhe yini?” Kambe xi huwelela hintamu xi ku: “A a yisiwi mhandzini!”+ 15 Leswi Pilatu a a lava ku tsakisa xitshungu, a xi chunsele Barabasi; naswona nkama a nga rhuma leswaku Yesu a biwa,+ a mu nyikelile leswaku a dlayiwa ka mhandzi.+

16 Se masonchwa ma mu teka ma mu yisa kaya ka govhernadori ma gama ma vitana masonchwa hinkwawu.+ 17 Kutani ma mu yambexa nguvu ya ku pshuka ma tlhela ma luka harhi ya mintwa ma mu tlhateka yona; 18 ma ku: “Xowani, wena Hosi ya Vayuda!”+ 19 Ma tlhela ma mu ba nhloko hi lihlanga, ma mu pshitela marhi kutani ma mu khizamela. 20 Nkama ma nga gama ku tlanga hi yena, ma mu hlivila nguvu ya ku pshuka, ma mu yambexa mpahla ya yena ma gama ma famba na yena leswaku a ya gongondzeliwa ka mhandzi.+ 21 Ma tlhela ma sindzisa Simoni wa le Kirene papayi wa Alexandri na Rufu, lweyi a a hundza hi ndlela na a ta hi le handle ka doropa, leswaku a rhwala mhandzi ya Yesu ya nxaniso.*+

22 Se ma mu tisa ka ndhawu leyi vitaniwaka Golgota, ku nga vito la ku loko li hundzuluxeliwa li vula: “Ndhawu ya Ripala.”*+ 23 Ma zame ku mu nyika vhinyu leyi nga patsiwa ni mira,*+ kambe a nga yi nwanga. 24 Nkama ma nga mu gongondzela ka mhandzi, ma hoxe swiribyani* swaku ma yavelana mpahla ya yena, leswaku ma tiva leswi mun’wani ni mun’wani a a ta teka swona.+ 25 Ma mu gongondzele ka mhandzi hi ma 9.* 26 Naswona a ku tsaliwe nandzu wa yena lowu nge: “Hosi ya Vayuda.”+ 27 Funtshi va mu gongondzele xikan’we ni swigevenga swimbirhi, xin’we ka xinene se lexin’wani ka ximatsi xa yena.+ 28* —— 29 Kutani lava hundzaka hi ndlela va sungula ku mu rhuketela ni ku hlakahla tinhloko+ va ku: “Ha! Wena lweyi a wu ku u nga diliza tempele u tlhela u yi yaka hi masiku manharhu,+ 30 tiponise hi ku xika ka mhandzi ya nxaniso.”* 31 Na vona vaprista vavakulu ni vatsali a va mu poyilela va ku: “A ponise van’wani kambe yena a nga swi koti ku tiponisa!+ 32 Kreste Hosi ya Israyele a a xiki swoswi ka mhandzi ya nxaniso,* leswaku hi ta kholwa nkama hi nga ta swi vona.”+ Hambi lava a va gongondzeliwe xikan’we na yena va sungule ku mu rhuketela.+

33 Hi ma 12,* munyama wu funengeta tiko hinkwalu anze ku ba ma 15.*+ 34 Se hi ma 15, Yesu a huwelela hi rito la le henhla a ku: “Eli, Eli, lama sabaktani?” leswi loko swi hundzuluxeliwa swi vulaka swaku: “Xikwembu xanga, Xikwembu xanga, u ni tshikele yini?”+ 35 Kutani nkama van’wani va lava a va nyime kusuhi va nga mu twa na a huwelela, va sungule ku vula va ku: “Twanani! A vitana Eliya.” 36 Se mun’wani a tsutsuma a ya peta xiponchi ka vhinyu la ku bava, a xi tlhoma ka lihlanga, a mu nyika swaku a nwa+ a ku: “Mu tshikeni! Hi lava ku swi vona kumbe Eliya wa kona a ta ta a ta mu hawula.” 37 Kambe Yesu a huwelela hi rito la le henhla a gama a fa.+ 38 Se kortina leli nga tempeleni+ li handzuka hi le xikarhi ku sukela henhla ku ya fika hansi.+ 39 Kutani nkama murhangeli wa masonchwa* lweyi a a nyime kusuhi na yena a nga vona leswi nga yendleka loko a fa a ku: “Impela wanuna lweyi a a li N’wana wa Xikwembu.”+

40 A ku ni vavasati lava a va swi vona na va li kule; xikarhi ka vona a ku na Mariya Madalena na Mariya mamani wa Yakobe Wamutsongo na Yose, xikan’we na Salome,+ 41 lava a va famba na yena va mu pfuna+ loko a li Galileya, ni vavasati van’wani va ku tala lava nga famba na yena Yerusalema.

42 Leswi se a li ya ku peleni naswona a ku li siku la Ku Lunghiselela Savata, leyi a yi ta va hi mundzuku ka kona, 43 ku te Yosefa wa le Arimateya, wa Tribunali ya Wukhongeli la Xiyuda* lweyi a a hloniphiwa hintamu naswona a a nyimela ku ta ka Mfumu wa Xikwembu. A kanye mbilu a ya ka Pilatu a ya kombela ntsumbu wa Yesu.+ 44 Kambe Pilatu a a nga tiyiseki leswaku Yesu se a file, kutani a vitana murhangeli wa masonchwa a mu vutisa swaku a file kumbe wa ha hanya. 45 Se nkama murhangeli wa masonchwa a nga mu tiyisekisa swaku a file, hi kona a nga nyika Yosefa ntsumbu wa Yesu. 46 Yosefa a xave lensoli la ku phela swinene naswona a wu hawulile, a wu bohelele hi lona a gama a wu veka ka sirha+ leli a nga li txela ka ribye; kutani a wumbuluta ribye a pfala nyanghwa wa sirha.+ 47 Kambe Mariya Madalena na Mariya mamani wa Yose va tame va txuvukisela lomu a a lahliwe kona.+