Mintirho Ya Vapostolo

7 Kambe muprista wamukulu a ku: “Mhaka leyo i ntiyiso ke?” 2 Stefano a hlamula a ku: “Vavanuna, vamakwerhu na n’wina vapapayi, ni yingiseni. Xikwembu lexi kwetsimaka xi humelele ka vhovho wa hina Abrahamu a nkama lowu a a li Mezopotamiya, na a nge se ya tshama Harani,+ 3 kutani xi ku: ‘Suka ka tiko la wena ni le ka maxaka ya wena u ya ka tiko leli ni nga ta ku komba lona.’+ 4 Se a suka ka tiko la Vakalidiya a ya tshama Harani. Kutani nkama papayi wa yena a nga fa,+ Xikwembu xi yendle swaku a suka kolanu a ta tshama ka tiko leli mi tshamaka ka lona swoswi.+ 5 Kambe a xi mu nyikanga tshomba ka lona, hambi ndhawunyana leyi ringanaka ni nkondzo wa yena; kambe xi mu tshembise ku mu nyika tiko lolelo swaku li va la yena ni vana* va yena,+ hambileswi a a nga na n’wana hi nkama wolowo. 6 Xikwembu xi tlhele xi mu byela swaku vana* va yena a va ta tshama ka tiko lin’wani naswona vanhu va tiko lolelo a va ta va yendla swikarawa ni ku va hlupha 400 wa malembe.+ 7 Xikwembu xi te: ‘Tiko leli nga ta va yendla swikarawa ni ta li yavanyisa,+ va gama va huma swaku va ta ni yendlela ntirho wa ku kwetsima ka ndhawu leyi.’+

8 “Kutani Xikwembu xi yendla ntwananu na Abrahamu, lowu nga markariwa hi ku tsema nsuvu;*+ Abrahamu a game a va papayi wa Izaki+ a gama a mu tsema nsuvu nkama a nga tlhanganisa 8 wa masiku,+ na yena Izaki a ve papayi wa Yakobe, se Yakobe a va papayi wa 12 wa vana lava va nga gama va va 12 wa mindjangu.* 9 Se vamakwavu va Yosefa+ va sungula ku va ni wukwele kutani va mu xavisa aGibita.+ Kambe Xikwembu a xi li na yena,+ 10 naswona xi mu ponisile ka mahlomulu ya yena hinkwawu xi tlhela xi mu nyika wutlharhi ni ku mu yendla swaku a tsakeliwa hi Faru hosi ya Gibita. Se Faru a mu veka swaku a rhangela Gibita ni yindlo hinkwayu ya yena.+ 11 Kambe ku ve ni ndlala yayikulu ka tiko hinkwalu la Gibita ni la Kanana, phela ku ve nhlomulu wawukulu naswona vavhovho va hina a va nga kumi swakudla.+ 12 Kambe nkama Yakobe a nga twa swaku a ku ni swakudla aGibita, a rhume vavhovho va hina hi khambi la ku sungula.+ 13 Kambe nkama va nga ya ka wumbirhi, Yosefa a byele vamakwavu va yena swaku hi yena mani, se Faru a tiva ndjangu wa Yosefa.+ 14 Se Yosefa a rhuma vanhu swaku va landza papayi wa yena Yakobe ni maxaka ya yena hinkwawu ka ndhawu yoleyo,+ hinkwavu ka vona a va li 75 wa vanhu.+ 15 Kutani Yakobe a ya Gibita,+ lomu a nga ya fela kona+ xikan’we ni vavhovho va hina.+ 16 Se va yisiwa Xikemi, kutani va lahliwa ka sirha leli Abrahamu a a li xavile hi swikhemu swa prata ka vana va Hamori aXikemi.+

17 “Loko wu ya wu tshinela nkama wa leswaku xitshembiso lexi Xikwembu xi nga xi byela Abrahamu xi hetiseka, Vayisrayele va ye va tala aGibita, 18 anze ku va ni hosi yin’wanyani ka tiko la Gibita, leyi a yi nga mu tivi Yosefa.+ 19 A yi tirhisa wukanganyisi ka vanhu va hina yi tlhela yi sindzisa vapapayi va hina swaku va tshika vana va vona va fa.+ 20 Moxe a psaliwe hi nkama wolowo naswona a a xongile ka Xikwembu. A wundliwe tiwheti tinharhu akaya ka papayi wa yena.+ 21 Kambe nkama lowu a nga tshikiwa,+ n’wana wa Faru wa ntombhi a mu rhola kutani a mu wundla ku fana ni loko a li n’wana wa yena.+ 22 Kutani Moxe a djondzisiwe wutlharhi hinkwalu la Vagibita. A marito ni mintirho ya yena a swi ni matimba.+

23 “Na a ni 40 wa malembe, a bohe ku ya vona vamakwavu, vana va Israyele.+ 24 Loko a vona mun’wani wa vona na a hluphiwa, a mu lamulela a gama a hakelisa hi ku dlaya Mugibita lweyi a a hlupha makwavu wa yena. 25 A a pimisa swaku vamakwavu a va ta swi twisisa swaku Xikwembu a xi tirhisa yena leswaku xi va ponisa, kambe a va swi twisisanga. 26 Hi mundzuku ka kona, a tlhele a ya kuma van’wani na va lwa se a zama ku va lamula a ku: ‘He vanduwe, mi vamakwavu. Kasi mi lwela yini?’ 27 Kambe lweyi a a hlula makwavu a susumeta Moxe a ku: ‘I mani a nga ku veka swaku u va hosi ni muthethisi wa hina? 28 Na mina u lava ku ni dlaya ku fana ni Mugibita lweyi u nga mu dlaya tolo ke?’ 29 Nkama a nga twa leswo, Moxe a balekile a ya tshama ka tiko la Midiyani, lomu a nga va ni vana vambirhi va madjaha.+

30 “Loko se ku hundze 40 wa malembe, ntsumi yi humelele ka Moxe amananga ya Ntshava ya Sinayi na yi li ka xinsinyani xa mintwa lexi a xi pfurha.+ 31 Nkama Moxe a nga vona leswo, a hlamalile. Kambe loko a ya a tshinela swaku a ta txuvukisisa, a twa rito la Yehovha* li ku: 32 ‘Hi mina Xikwembu xa vavhovho va wena, Xikwembu xa Abrahamu, xa Izaki ni xa Yakobe.’+ Se Moxe a sungula ku rhurhumela naswona a nga swi lavanga ku txuvukisisa. 33 Se Yehovha* a ku: ‘Hlivila masandaliya ya wena, hikusa ndhawu leyi u nga nyima ka yona ya kwetsima. 34 Ni ku vonile ku hlupheka ka vanhu va mina lava nga Gibita ni tlhela ni twa ku konya ka vona;+ kutani ni tele ku ta va ponisa. Se tani ni ta ku rhuma aGibita.’ 35 Yena Moxe lweyi va nga mu yala va ku: ‘I mani a nga ku veka swaku u va hosi ni muthethisi wa hina?’+ Hi yena lweyi a nga rhumiwa hi Xikwembu+ hi ku tirhisa ntsumi leyi nga humelela ka yena ka xinsinyani xa mintwa swaku a va hosi ni muponisi wa vona. 36 Wanuna lweyi a va humesile+ hi ku yendla minchumu ya ku hlamalisa ni masingita aGibita,+ ka Lwandle la Ku Pshuka+ ni le mananga ku ringana 40 wa malembe.+

37 “Hi yena Moxe lweyi a nga byela Vayisrayele a ku: ‘Xikwembu xi ta mi langela muprofeta wa ku fana na mina xikarhi ka vamakwenu.’+ 38 Hi yena lweyi a a li ni Vayisrayele amananga; hi yena lweyi a a li ni ntsumi+ leyi nga vulavula na yena+ ka Ntshava ya Sinayi ni vavhovho va hina. Hi yena a nga yamukela marito ya Xikwembu lama hanyaka swaku a ta hi nyika wona.+ 39 Vavhovho va hina va yale ku mu yingisa naswona va mu gegile+ funtshi timbilu ta vona ti tlhelele Gibita,+ 40 hi ku byela Aroni va ku: ‘Hi yendleli swikwembu leswi nga ta hi rhangela hikusa a hi swi tivi swaku ku humelele yini hi Moxe wa kona, lweyi a nga hi rhangela hi huma ka tiko la Gibita.’+ 41 Ka masiku wolawo, va yendle xifaniso xa xihon’wani va tlhela va xi yendlela magandzelo kutani va hamba fexta la ku kulungela mintirho ya vona.+ 42 Se Xikwembu xi va tshika va gandzela minchumu leyi nga matilweni,+ hi ku landza leswi nga tsaliwa ka buku la vaprofeta loko li ku: ‘N’wina vanhu va Israyele, mi li a mi yendlela mina magandzelo nkama lowu a mi li mananga ku ringana 40 wa malembe ke? 43 Ihim! A mi rhwala tende la Moloko+ ni nyeleti ya xikwembu lexi vitaniwaka Rofani, ku nga swifaniso leswi mi nga swi yendla swaku mi swi gandzela. Kutani ni ta mi teka, ni mi yisa ka ndhawu ya kule ni Babilona.’+

44 “Vavhovho va hina a va ni tende leli a li fakaza swaku Xikwembu a xi li na vona amananga, hi ku ya hi leswi xi nga swi hlaya nkama xi nga vulavula na Moxe, xi mu byela leswaku a yendla hi ku landza planu* leli a nga li vona.+ 45 Naswona vavhovho va hina va li yamukelile tende leli, va gama va li nghenisa, na va li na Yoxuwa, ka tiko la vanhu+ lava Xikwembu xi nga va hlongola phambheni ka vona.+ Li tshame kolanu anze minkameni ya Davhida, 46 lweyi a a tsakeliwa hi Xikwembu, kutani a kombele mpfumelelo wa ku yakela Xikwembu xa Yakobe yindlo.+ 47 Kambe ku ve Solomoni lweyi a nga xi yakela yindlo.+ 48 Kambe Lweyi A Nga Tlakuka Hintamu a nga tshami ka tiyindlo leti nga yakiwa hi vanhu,+ hi ku landza leswi muprofeta a nga swi hlaya nkama a nga ku: 49 ‘Tilo i xitshamu xa mina xa wuhosi,+ kasi misava hi lomu ni vekaka kona minenge ya mina.+ I yindlo muni leyi mi nga ni yakelaka yona? Ku vula Yehovha.* Kumbe, yi kwini ndhawu leyi ni nga humulaka ka yona ke? 50 Hi mina ni nga yendla minchumu leyi hinkwayu, a hi swona ke?’+

51 “N’wina vanhu va nkanu, lava va nga tlanyala timbilu ni tindleve,* mi tshamela ku lwa ni moya wa ku kwetsima; mi yendla swa ku fana ni vavhovho va n’wina.+ 52 Hi wihi muprofeta lweyi vavhovho va n’wina va kalaka va nga mu hluphanga?+ Va dlaye lava a va profeta hi ta ku ta ka lweyi wa ku lulama,+ lweyi swoswi mi nga mu xavisa mi tlhela mi mu dlaya,+ 53 hi n’wina lava nga yamukela Nawu lowu nga tisiwa hi tintsumi+ kambe a mi wu yingisanga.”

54 Kutani loko va twa leswo, va kwata hintamu va za va mu bedjela.* 55 Kambe leswi Stefano a a tale hi moya wa ku kwetsima, a txuvuka tilweni kutani a vona ku phatima ka Xikwembu a tlhela a vona Yesu na a nyimile ka tlhelo la xinene la Xikwembu,+ 56 kutani a ku: “Vonani! Ni vona tilo li pfulekile ni N’wana wa munhu+ na a nyime ka voko la xinene la Xikwembu.”+ 57 Nkama va nga twa leswo, va huwelelile hintamu, va tipfala tindleve hi mavoko, se hinkwavu va mu dumela. 58 Loko se va mu txukumetele handle, va sungula ku mu ba hi maribye.+ Se timboni+ leti nga mu lumbeta ti veka mpahla ya tona ka minenge ya djaha leli vitaniwaka Sawulo.+ 59 A nkama na va mu ba hi maribye, Stefano a kombela ka Yesu a ku: “Hosi Yesu, yamukela wutomi la mina.” 60 Kutani a khizama a huwelela swinene a ku: “Yehovha,* u nga va khatisi hi mhaka ya xidjoho lexi.”+ Loko a gama ku vula leswo, a fa.*