Mahungu Ya Ku Tsakisa Ya Ku Tsaliwa Hi Yohani

10 “Ni mi byela ntiyiso: Munhu lweyi a kalaka a nga ngheni hi ka xipfalu lomu tinyempfu ti tshamaka kona* kambe a nghena hi kun’wani, i muyivi.+ 2 Kasi lweyi a nghenaka hi nyanghwa, hi yena murisi wa tinyempfu.+ 3 Muvoneleli wa nyanghwa wa mu pfulela,+ kutani tinyempfu ti yingisa rito la yena.+ A ti vitana hi mavito, a ti humesa handle. 4 Loko a humesile leti nga ta yena hinkwatu, a famba phambheni ka tona, se ti mu landzela hikusa ta li tiva rito la yena. 5 A ti nge mu landzeli munhu lweyi ti kalaka ti nga mu tivi; ti ta mu baleka hikusa a ti li tivi rito la yena.” 6 Hambileswi Yesu a nga va byela xifaniso lexi, a va swi twisisanga leswi a a vula swona.

7 Yesu a tlhela a ku: “Ni mi byela ntiyiso: Hi mina nyanghwa lowu tinyempfu ti nghenaka hi wona.+ 8 Hinkwavu lava tiyendlaka mina i vayivi; naswona tinyempfu a ti nge va yingisi. 9 Hi mina nyanghwa; lweyi a nghenaka hi mina a ta ponisiwa naswona a ta kota ku nghena a tlhela a huma, a kuma ni swakudla.+ 10 Loko muyivi a ta, a tela ku ta yiva ni ku dlaya.+ Kambe mina ni tile swaku tinyempfu ti ta kuma wutomi la ku kala li nga heli. 11 Hi mina murisi wamunene;+ murisi wamunene a nyikela wutomi la yena swaku a fela tinyempfu.+ 12 Munhu lweyi a ngo yo tholiwa ntsena kambe a nga li murisi kumbe n’winyi wa tinyempfu, loko a vona hlolwa* na li ta a tshika tinyempfu a baleka; kutani hlolwa li fika li ti hlasela ti hangalaka. 13 A nga na mhaka ni tinyempfu hikusa i munhu wa ku tholiwa. 14 Mina ni murisi wamunene. Tinyempfu ta mina na ti tiva, na tona ta ni tiva,+ 15 ku fana ni leswi Papayi a ni tivisaka xiswona na mina na mu tiva,+ naswona ni nyikela wutomi la mina swaku ni fela tinyempfu ta mina.+

16 “Ni ni tinyempfu tin’wani, leti kalaka ti nga li ta ntlhambi lowu;+ na tona ni fanele ni ti tisa swaku ti ta yingisa rito la mina, ti va ntlhambi wun’we ni murisi a va mun’we.+ 17 Hi leswo swi yendlaka Papayi a ni rhandza,+ hikusa ni nyikela wutomi la mina+ swaku ni tlhela ni li kuma. 18 A ku na munhu lweyi a nga ni tekelaka wutomi la mina, kambe ni li nyikela hi ku swi rhandza. Ni ni mfanelo ya ku li nyikela naswona ni ni mfanelo ya ku tlhela ni li kuma.+ Nawu lowu ni wu kume ka Papayi wa mina.”

19 Se Vayuda+ va tlhela va holova hi mhaka ya marito lawa. 20 Ku tala ka vona a va ku: “A ni dimoni naswona wa hlanya. Mi mu yingisela yini?” 21 Van’wani a va ku: “Leswi a nga swi vula a swi nge vuliwi hi munhu lweyi a nga ni dimoni. Indjhe dimoni li nga swi kota ku pfula matihlo ya lava kalaka va nga voni ke?”

22 A ku ni Fexta la Ku Khangula Tempele aYerusalema. A ku li hi wuxika, 23 naswona Yesu a a famba tempeleni ka koredori leli vitaniwaka Koredori* la Solomoni.+ 24 Kutani Vayuda va mu rhendzela va ku: “Kasi hi mhaka muni u nga hi byeli swaku hi wena mani? Loko u li Kreste, hi byeli ka!” 25 Yesu a va hlamula a ku: “Ni mi byelile kambe a mi kholwanga ka mina. Mintirho leyi ni yi yendlaka hi vito la Papayi, ya ni fakazela.+ 26 Kambe a mi kholwi ka mina hikusa a mi tinyempfu ta mina.+ 27 Tinyempfu ta mina ta li yingisa rito la mina, na ti tiva naswona ta ni landzela.+ 28 Ni ti nyika wutomi la ku kala li nga heli,+ a ti nge helisiwi naswona a nga kona lweyi a nga ta ti wutla ka voko la mina.+ 29 Tinyempfu leti Papayi wa mina a nga ni nyika tona i ta lisima swinene naswona a ku na munhu lweyi a nga ta ti wutla ka voko la Yena.+ 30 Mina na Papayi ha twanana.”+

31 Vayuda va tlhela va rholela maribye swaku va mu ba hi wona. 32 Yesu a va hlamula a ku: “Ni mi kombe mintirho ya ku tala yayinene leyi taka hi ka Papayi. Se hi wihi ntirho lowu mi lavaka ku ni ba hi maribye hi mhaka ya wona ke?” 33 Vayuda va mu hlamula va ku: “A hi ku bi hi maribye hi mhaka ya ntirho wawunene kambe hi ku ba hileswi u rhuketelaka Xikwembu+ ni ku tiyendla Xikwembu.” 34 Yesu a va hlamula a ku: A swi tsaliwanga ka Nawu wa n’wina ke? Xikwembu xi vule swa ku fana ni leswi: ‘Ni te: “N’wina mi swikwembu.”’+ 35 Se leswi Xikwembu xi nga byela vanhu lava matsalwa ma vulaka swaku a va lulamanga xi ku: ‘N’wina mi swikwembu’;+ ni leswi matsalwa ma kalaka ma nga txintxiwi, 36 hi mhaka muni mi ku: ‘Ni rhuketela Xikwembu’ hileswi ni nge te: ‘Ni N’wana wa Xikwembu,’+ kuve ni langiwile hi Papayi ni tlhela ni rhumiwa hi yena ku ta lani misaveni? 37 Loko ni nga yendli mintirho ya Papayi wa mina, mi nga kholweni ka mina. 38 Kambe loko ni yendla mintirho ya yena, hambiloko mi nga kholwi ka mina, kholwani ka leswi ni swi yendlaka+ swaku mi ta swi tiva ni ku twisisa swaku mina na Papayi ha twanana.”+ 39 Va tlhele va zama ku mu khoma kambe a va pshetemukela.

40 Se a tlhela a tsemakanya Yordani a ya lomu Yohani a a tsakamisa kona vanhu ku sunguleni,+ a fika a tshama kona. 41 Kutani vanhu va ku tala va ya ka yena na va byelana leswi: “Yohani a nga yendlanga singita ni lin’we kambe swilo hinkwaswu leswi a nga swi vula hi munhu lweyi a swi li ntiyiso.”+ 42 Kutani va ku tala va va ni lipfumelo ka yena.