Timotiya Wa Ku Sungula
6 Lava nga vatirhi a va hloniphe vapatrao va vona hi mbilu hinkwayu,+ leswaku vanhu va nga vulavuli swa ku biha hi vito la Xikwembu ni djondzo ya xona.+ 2 Se vatirhi lava vapatrao va vona va nga vapfumeli va nga va deleli vapatrao va vona hileswi va nga vamakwavu. Kambe va fanele va va tirhela hi ku tinyiketela hikusa lava pfunekaka ka ntirho wawunene lowu va wu yendlaka i vapfumeli naswona va rhandzeka.
Tama u va djondzisa ni ku va tsundzuxa leswi ni nga ku byela swona. 3 Loko munhu mun’wani a djondzisa djondzo yin’wani naswona a nga pfumelelani ni nawu lowu pfunaka,+ lowu taka hi ka Hosi ya hina Yesu Kreste kumbe djondzo leyi fambisanaka ni ku tinyiketela ka Xikwembu,+ 4 wa tibyela naswona a nga twisisi nchumu.+ A rhandza ku kanetana ni ku phikizana ni van’wani hi marito.+ Swilo leswi swi vanga wukwele, tinyimpi, nhlambha, ku lumbetana, 5 ku tshamela ku holova hi swilo swa ku kala swi nga pheli ka vanhu lava nga ni mimpimiso leyi nga chaka+ ni lava kalaka va nga wu twisisi ntiyiso, va pimisa swaku ku tinyiketela ka Xikwembu i ndlela ya ku kuma xanchumu.+ 6 Vhela, ku tinyiketela ka Xikwembu+ ni ku tsaka hi leswi hi nga na swona swa pfuna swinene. 7 Hikusa a hi tanga ni nchumu lani misaveni naswona a hi nga ta famba ni nchumu.+ 8 Kutani loko hi ni swakudla* ni swa ku yambala* hi ta tsaka hi swilo leswi.+
9 Kambe lava nga tinyimisela ku ganya va wela ka ndzingo, ka ntlhamu+ ni ka ku navela hinkwaku ka wuphunta loku va vavisaka, naswona swi va vangela mahlomulu ni lifu.+ 10 Hikusa ku rhandza male i limintsu la mixaka hinkwayu ya swilo swa ku biha. Naswona hi mhaka ya ku rhandza male van’wani va djikisiwile alipfumelweni naswona va tipete ka swikarhatu swa ku tala.+
11 Kambe wena munhu wa Xikwembu, swi baleki swilo leswi. Kambe tikarhateli ku va wa ku lulama, u tinyiketela ka Xikwembu, u va ni lipfumelo, lirhandzu, ku tiyisela ni ku rhula.+ 12 Lwana nyimpi yayinene ya lipfumelo; khoma swi tiya ka wutomi la ku kala li nga heli, leli u nga vitaneliwa lona ni leli u nga nyikela wumboni lalinene phambheni ka vanhu va vanyingi.
13 Phambheni ka Xikwembu lexi hlayisaka swilo hinkwaswu swi hanya, ni le phambheni ka Kreste Yesu lweyi a nga nyikela wumboni lalinene phambheni ka Pontiyo Pilatu,+ na ku byela ni ku: 14 Yingisa nawu hi ndlela ya ku tenga, ni leyi kalaka yi nga na xisolo anze Hosi ya hina Yesu Kreste a humelela,+ 15 hikusa hi nkama wa kona, Hosi leyi nga ni Matimba, leyi nga tsaka ni leyi nga yoxe yi ta kombisa matimba ya yona. I Hosi ya lava nga tihosi ni Mufumi wa lava nga vafumi,+ 16 hi yena ntsena a kalaka a nga fi,+ lweyi a tshamaka ka ndhawu leyi phatimaka+ leyi ku kalaka ku nga na munhu lweyi a nga tshinelaka ka yona, lweyi ku kalaka ku nga na munhu a nga tshama a mu vona kumbe lweyi a nga mu vonaka.+ Ku hloniphiwa ni matimba ya ku kala ma nga heli a swi ve ka yena. Amen.
17 Byela lava nga ganya ka misava leyi ya swoswi leswaku va nga tibyeli naswona va nga tshembi male ni swilo leswi va nga na swona hikusa swa hela,+ kambe a va tshembi Xikwembu lexi hi nyikaka hinkwaswu leswi hi nga na swona.+ 18 Va byeli leswaku va yendla swilo swaswinene, va ganya hi ku yendla mintirho yayinene, va nyika, va tinyimisela ku yavelana ni van’wani leswi va nga na swona.+ 19 Loko va yendla leswo, swi ta fana ni loko va tihlengeletela tshomba leli taka hi ka Xikwembu. Va ta va na va tivekela masungulo yamanene ya nkama lowu taka,+ leswaku va ta khoma swi tiya ka wutomi la ntiyiso.+
20 Timotiya, hlayisa leswi u nga khomisiwa swona,+ u fambela kule ni mavulavulelo ya ku kala ma nga pfuni nchumu lama lwisanaka ni swilo swa ku kwetsima, u tlhela u fambela kule ni “wutivi”+ la mavunhwa leli vangaka mavulavulelo lama lwisanaka ni leswi nga ntiyiso. 21 Van’wani va djikisiwile alipfumelweni hi mhaka ya ku tibyela hi wutivi lolelo.
Timpsalu tatikulu ta Xikwembu a ti ve na n’wina.