Mintirho Ya Vapostolo
24 Nkama ku nga hundza 5 wa masiku, muprista wamukulu Ananiya+ a te ni madoda man’wani, ni adivhogadu* lweyi a va ku i Tertulo, kutani va fika va byela govhernadori leswi va mangalelaka Pawulo hi swona.+ 2 Nkama Tertulo a nga byeliwa swaku a vulavula, a sungule ku mangalela Pawulo ka govhernadori Felikisi a ku:
“Ha ku khensa leswi hi hanyaka hi ku rhula hikusa u fuma kahle naswona tiko leli la kula hi mhaka ya wutlharhi la wena, 3 hi tshamela ku ku khumbuka hinkwaku lomu hi nga kona, Wena Muchaviseki Felikisi, naswona ha ku khensa swinene. 4 Kambe swaku hi nga ku dleli nkama, hi kombela u hi lomba tindleve swa nkamanyana swaku hi ku tlhamusela mhaka leyi hi nga na yona. 5 Hi kume swaku wanuna lweyi i ntungu,+ a pfuxa mpfilumpfilu a tlhela a hlohlotela+ Vayuda hinkwavu amisaveni hinkwayu swaku va pfukela mfumu, naswona hi yena murhangeli wa wukhongeli la ntlawa wa Vanazareta.*+ 6 A tlhela a zama ku chakisa tempele; se hi mu khomile.+ 7* —— 8 Loko wo mu thethisa u ta swi kuma hinkwaswu leswi hi mu nyikaka nandzu hi swona.”
9 Na vona Vayuda va nghenelela, va nyima ni mhaka leyi na va vula swaku leswo i ntiyiso. 10 Se govhernadori a kombeta Pawulo hi nhloko swaku a vulavula, kutani Pawulo a ku:
“Hi ku tiva swaku se u ni malembe ya ku tala na u li muyavanyisi ka tiko leli, ni tinyimisele ku tihlamulela phambheni ka wena.+ 11 Mhaka leyi u nga yi kumisisa hi wexe; a ku se hundza 12 wa masiku na ni ye Yerusalema ni ya gandzela Xikwembu;+ 12 a va ni kumanga na ni holova ni munhu atempeleni kumbe na ni hlohlotela vanhu swaku va pfuxa mpfilumpfilu ka masinagoga* kumbe adoropeni. 13 Naswona a va nge ku kombi wufakazi la leswi va ni nyikaka nandzu hi swona. 14 Kambe na pfumela ka wena swaku na xi gandzela Xikwembu xa vavhovho va mina+ naswona na kholwa hinkwaswu leswi nga vuliwa hi Nawu ni leswi nga tsaliwa hi Vaprofeta,+ ku nga leswi vanhu lava va ni nyikaka nandzu hi swona hi ku hlaya leswaku swi hume ndleleni. 15 Naswona ni ni ku tshemba ka Xikwembu, ku nga ku tshemba loku vanhu lava na vona va nga na kona, ka leswaku lava ku lulama ni lava kalaka va nga lulamanga+ va ta pfuxiwa.+ 16 Hi mhaka ya leswo, siku ni siku ni zama ku va ni lipfalu leli nga basa* ka Xikwembu ni le ka vanhu.+ 17 Na se ku hundze malembe ya manyingi, ni tile ni tisa male+ ya ku ta pfuna tiko la hina ni ku ta nyikela magandzelo. 18 Va ni kume na ni tibasisile hi ku ya hi nawu, na na ha yendla mintirho leyo atempeleni,+ a ni nga na xitshungu naswona a ni nga pfuxi mpfilumpfilu. Kambe a ku ni Vayuda van’wani lava a va ta hi Aziya; 19 loko swi ku hikakunene a va ni xa ku ni nyika nandzu hi xona a va fanele va va kona phambheni ka wena swaku va ta ni mangalela.+ 20 Hambi hi vola va nga la, loko ku ni xihoxo lexi va nga xi kuma ka mina siku leli va nga ni thethisa ka Tribunali Lalikulu* a va xi vule. 21 Lexi va nga xi vulaka i marito lawa ni nga ma vula loko ni nyimile xikarhi ka vona lama nge: ‘Namuntlha na thethisiwa phambheni ka n’wina hileswi ni kholwaka swaku vafi va ta pfuxiwa!’”+
22 Kambe leswi Felikisi a a yi tiva kahle ndlela leyi ya Hosi,+ a nyimise mhaka yoleyo a gama a ku: “Ni ta yendla xiboho ka mhaka leyi loko komandanti Liziyu a fika.” 23 Se a rhuma murhangeli wa masonchwa swaku a veka Pawulo djele kambe a nyikiwa chunsekonyana ni vanghanu va yena va pfumeleliwa ku mu pfuna.
24 Nkama ku nga hundza masikunyana, Felikisi a fikile ni nsati wa yena Drusila, lweyi a a li Muyuda. Se a vitana Pawulo a fika a mu yingisela loko a mu tlhamusela swaku swi vula yini ku pfumela ka Kreste Yesu.+ 25 Kambe loko Pawulo a ha mu tlhamusela hi ta ku lulama, ku tikhoma ni ta ku yavanyisa loku nga ta ta,+ Felikisi a sungula ku chava, se a byela Pawulo a ku: “U nga pfana u fambanyana, ni ta tlhela ni ku vitana loko ni kuma nkama.” 26 Kambe leswi a a pimisa swaku Pawulo a ta mu diza male, a a tshamela ku mu vitana swaku a bula na yena. 27 Kambe, loko ku hundze malembe mambirhi, Felikisi a pfaletiwe hi Porsiyo Fexto; naswona leswi Felikisi a a lava ku tsakeliwa hi Vayuda,+ a tshike Pawulo djele.