Vakorinto Va Wumbirhi

4 Se leswi Xikwembu xi nga hi komba timpsalu hi ku hi nyika ntirho lowu, a hi karhali. 2 Kambe hi tshike minchumu ya ku danisa leyi yendliwaka xihundleni. A hi hanyi hi ku kanganyisa kumbe ku txintxa* rito la Xikwembu.+ Kambe hi komba vanhu leswi rito la Xikwembu li swi vulaka naswona hi ku yendla leswo, hi kombisa swaku hi yendla minchumu yayinene phambheni ka Xikwembu leswaku hi va xikombiso xaxinene ka lipfalu la vanhu hinkwavu.+ 3 Phela loko mahungu ya ku tsakisa lawa hi ma chumayelaka ma tumbelile, ma tumbelele ntsena lava yaka ku helisiweni, 4 ku nga lava kalaka va nga pfumeli,+ lava mimpimiso ya vona yi nga dlayiwa hi xikwembu xa misava leyi+ swaku va nga voni ku phatima+ ka mahungu ya ku tsakisa ni ya ku hlamalisa hi Kreste, lweyi a nga xifaniso xa Xikwembu.+ 5 Hikusa a hi chumayeli hi hina, kambe hi chumayela swaku Yesu Kreste i Hosi ni leswaku hina hi vatirheli va n’wina hi mhaka ya Yesu. 6 Hikusa i Xikwembu xi nga te: “Ku vonakala a ku voninge ka munyama”.+ Naswona hi xona xi nga tirhisa nghohe* ya Kreste swaku xi voningela+ timbilu ta hina hi wutivi la ku hlamalisa la Xikwembu.

7 Kambe hi ni tshomba+ leli ka swibya swa vumba;+ leswi swi kombisa swaku matimba yamakulu lama tlulaka hinkwaswu a ma ti hi ka hina kambe ma ta hi ka Xikwembu.+ 8 Ha manyiwa matlhelo hinkwawu kambe a hi manyiwi lakakuva hi nga swi koti ni ku timexa; ha karhateka hintamu kambe a hi karhateki lakakuva hi pfumala ni xa ku xi yendla;*+ 9 ha hluphiwa kambe a hi txukumetiwanga;+ ha tlatlalatiwa hansi kambe a hi helisiwi.+ 10 Ku fana na Yesu hi tshamela ku tiyisela nghozi ya ku dlayiwa,+ leswaku hi va ni wutomi la ku fana ni la Yesu.* 11 Hikusa hina hi hanyaka hi tshamela ku langutana ni lifu+ hi mhaka ya Yesu, leswaku hi va ni wutomi la ku fana ni la Yesu.* 12 Kutani lifu la tirha ka hina kambe ka n’wina ku tirha wutomi.

13 Se leswi swoswi hi nga ni lipfumelo* la ku fana ni leli ku nga tsaliwa leswi hi lona: “Ni ni lipfumelo, hi mhaka leyo ni vulavulile,”+ na hina hi ni lipfumelo, hi mhaka leyo ha vulavula 14 na hi swi tiva swaku Lweyi a nga pfuxa Yesu, na hina a ta hi pfuxa xikan’we na Yesu naswona a ta hi tisa phambheni ka yena.+ 15 Hikusa hinkwaswu leswi swi yendleliwe n’wina, leswaku timpsalu tatikulu ta Xikwembu ti yengeteleka swinene ni leswaku Xikwembu xi dzunisiwa hi mhaka ya swikhongelo swa ku khensa leswi yendliwaka hi va ku tala.+

16 Kutani a hi heli ntamu hambiloko muzimbha wa hina wu hlakala; timbilu ni mimpimiso ya hina swi nyikiwa ntamu siku ni siku. 17 Hikusa hambileswi nhlomulu* wu nga wa nkamanyana naswona wu kalaka wu nga tiki hintamu, wu hi tisela minkateko ya yinyingi swinene ni leyi nga ta kala yi nga heli;+ 18 kutani a hi tshameli ku pimisa hi swilo leswi voniwaka kambe hi pimisa hi swilo leswi kalaka swi nga voniwi.+ Hikusa swilo leswi voniwaka i swa nkamanyana kambe swilo leswi kalaka swi nga voniwi i swa hi masiku ni masiku.