Samuwele Wa Ku Sungula

20 Kutani Davhida a baleka aNayoti aRama, a gama a ya tlhangana na Yonatani, se a mu vutisa a ku: “Kasi ni yendle yini?+ Ni yo wonha yini a za papayi wa wena a lava ku ni dlaya?” 2 Kutani loko Yonatani a twa leswo a ku: “Swoleswo a swi nge yendleki!+ A wu nga ta fa. A ku na nchumu hambi xi li xaxikulu kumbe xaxitsongo lexi papayi a xi yendlaka na a nga rhanganga hi ku ni byela. Se papayi a a ta ni fihlela mhaka leyi hi mhaka muni? A swi nge yendleki leswo.” 3 Kambe Davhida a tlhela a funga a ku: “Papayi wa wena wa swi tiva swaku hi vanghanu,+ kutani swi nga yendleka a te: ‘Mi nga mu byeli nchumu Yonatani, hikusa mhaka leyi yi nga mu kwatisa.’ Kambe na funga phambheni ka wena ni ka Yehovha swaku ni kusuhi ni ku dlayiwa!”+

4 Se Yonatani a byela Davhida a ku: “Ni ta yendla hinkwaswu leswi u nga ta ni byela swona.” 5 Davhida a byela Yonatani a ku: “Mundzuku i fexta la ku huma ka n’weti+ naswona na swi tiva swaku a hosi yi nyimele swaku ni dla na yona; kambe ni tshiki ni famba ni ya tumbela nhoveni anze mundlwani nimadlambu. 6 Loko papayi wa wena a ni lava, u ta mu byela u ku: ‘Davhida a kombele swaku ni mu tshika a muka aBetlehema,+ hikusa ku ni gandzelo la lembe ni lembe leli faneleke li yendliwa hi ndjangu hinkwawu.’+ 7 Loko a ku: ‘Hi swona,’ swi vula swaku a nga ta ni yendla nchumu. Kambe loko a kwata, u ta swi vona swaku a lava ku ni vavisa. 8 Ni kombe swaku wa ni rhandza,+ hikusa u yendle ntwananu na mina phambheni ka Yehovha.+ Kambe loko ni ni nandzu+ u nga ni nyikeli ka papayi wa wena, wo vhela u ni dlaya hi wexe.”

9 Se Yonatani a ku: “A ni nge tshuki ni ku yendla leswo! Loko no tshuka ni twa swaku papayi wa mina a lava ku ku dlaya, a ni nge tshiki ku ku byela.”+ 10 Kutani Davhida a vutisa Yonatani a ku: “Se mina ni ta byeliwa hi mani loko papayi wa wena o ku hlamula na a kwatile?” 11 Yonatani a byela Davhida a ku: “A hi fambe hi ya nhoveni.” Kutani va famba. 12 Yonatani a byela Davhida a ku: “Yehovha Xikwembu xa Israyele a a ve mboni, swaku ni ta zama ku tsumbula leswi papayi a lavaka ku swi yendla mundzuku kumbe mundlwani hi nkama wa ku fana ni lowu. Loko papayi a nga ku kwatelanga, ni ta rhuma munhu a ta ku byela. 13 Kambe loko papayi a lava ku ku vavisa, Yehovha a a ni khatisi hintamu swinene loko ni nga ku byeli ni loko ni nga ku tshiki u baleka. Yehovha a a ve na wena+ ku fana ni leswi a nga va na papayi.+ 14 Naswona ni kombe lirhandzu la ku fana ni la Yehovha swoswi ni hanyaka ni loko se ni file.+ 15 U nga tshiki ku rhandza ndjangu wa mina,+ hambiloko Yehovha o helisa valala va wena hinkwavu amisaveni.” 16 Kutani Yonatani a yendla ntwananu ni ndjangu wa Davhida a ku: “Yehovha a ta lava swaku valala va Davhida va khatisiwa.” 17 Yonatani a tlhela a kombela kuva Davhida a funga swaku wa mu rhandza, hikusa Yonatani a a mu rhandza ku fana ni leswi a tirhandzisaka swona.+

18 Yonatani a mu byela a ku: “Mundzuku i fexta la ku huma ka n’weti;+ swi ta voneka swaku a wu kona hikusa xitulu xa wena xi ta va xi nga na munhu. 19 Mundlwani swi ta tikomba hintamu swaku a wu kona; se u fanele u ya hala a wu tumbele kona siku leliyani, u tshama kusuhi ni ribye leli nga ka ndhawu liyani. 20 Ni ta txopa kanharhu hi ligubu, ingi hiloko no txopa xan’wanchumu. 21 Kutani ni ta rhuma mutirhi wa mina, ni ku: ‘Famba u ya teka mimpaxwa* liyani.’ Loko ni mu byela ni ku: ‘A mimpaxwa yi le tlhelweni ka wena, yi teki,’ se u nga vuya hikusa leswo swi ta kombisa swaku hinkwaswu swi ta ku fambela kahle naswona a ku na nchumu xa ku biha xi nga ta ku yendlekela; na funga hi vito la Yehovha Xikwembu lexi hanyaka. 22 Kambe loko ni byela mutirhi wa mina ni ku: ‘Txuvuka! Mimpaxwa yi le phambheninyana ka wena,’ famba, hikusa Yehovha a lava swaku u baleka. 23 Kasi ka xitshembiso lexi hi nga xi yendla,+ Yehovha a a ve mboni xikarhi ka mina na wena hi nkama wa ku kala wu nga heli.”+

24 Kutani Davhida a ya tumbela nhoveni. Hi siku la fexta la ku huma ka n’weti, hosi yi tshama lani a va veke kona swakudla.+ 25 Hosi a yi tshame ka xitulu xa yona akusuhi ni khumbi. Yonatani a a tshame a txuvukana na yona, kasi Abineri+ a a tshame tlhelweni ka Sawulo, kambe xitulu xa Davhida a xi nga na munhu. 26 Sawulo a nga hlayanga nchumu hi siku lelo, hikusa a tibyele leswi: ‘Swi nga yendleka ku ni nchumu xi nga mu yendla a nga tengi.*+ Swi nga yendleka a nga tenganga.’ 27 Se hi siku la wumbirhi la fexta la ku huma ka n’weti, ka xitulu xa Davhida a ku nga tshamanga munhu. Kutani Sawulo a vutisa n’wana wa yena Yonatani a ku: “Hi mhaka muni n’wana wa Yese+ a nga tanga a ta dla swakudla tolo ni namuntlha?” 28 Se Yonatani a hlamula Sawulo a ku: “Davhida a ni kombele swaku ni mu tshika a ya Betlehema.+ 29 A te: ‘Ni kombela u ni tshika ni muka, hikusa ndjangu wa ka hina wu fanele wu yendla gandzelo, naswona makwerhu a ni vitanile. Kutani ni kombela u ni komba swaku wa ni rhandza hi ku ni tshika ni famba ni ya vona vamakwerhu.’ Hi leswo swi nga mu yendla a nga ti a ta dla ni hosi.” 30 Se Sawulo a mu kwatela hintamu Yonatani, a gama a mu byela a ku: “Wena n’wana wa wansati wa ku kala a nga yingisi, u pimisa swaku no kala ni nga swi tivi swaku u langa ku nyima ni n’wana wa Yese? A wu swi tivi swaku leswo swi ta ku danisa wena ni mamani wa wena? 31 Loko n’wana wa Yese a ha hanya misaveni, wena a wu nga ta va hosi; naswona wuhosi la wena a li nge tiyi.+ Kutani swoswi rhuma vanhu swaku va mu landza hikusa a fanele a fa.”+

32 Yonatani a hlamula papayi wa yena Sawulo a ku: “A dlawela yini ke?+ Kasi a yo wonha yini?” 33 Se Sawulo a djikidjela Yonatani hi tlharhi a lava ku mu dlaya.+ Yonatani a swi vona swaku papayi wa yena a lava ku dlaya Davhida.+ 34 Yonatani a tekela ku suka mezeni na a kwatile swinene; a nga dlanga nchumu hi siku lelo, hikusa mbilu ya yena a yi vaviseka hi mhaka ya leswi papayi wa yena a a lava ku swi yendlela Davhida+ ni hi mhaka ya leswi a nga mu rhuketela.

35 Nimixo Yonatani a huma a ya nhoveni swaku a ya tlhangana na Davhida. A fambe ni mufana lweyi a a li mutirhi wa yena.+ 36 Kutani a mu byela a ku: “Ni kombela u tsutsuma u landza mimpaxwa leyi ni nga ta yi txopa.” Se mutirhi a tsutsuma, a gama Yonatani a txopa mpaxwa wun’we wu mu hundza. 37 Kutani mutirhi a fika lani mpaxwa lowu Yonatani a a wu txopile wu nga wela kona. Se Yonatani a mu byela a ku: “A mpaxwa wu le phambheninyana ka wena.” 38 A tlhela a vitana mutirhi a ku: “Hantlisa! U nga ha hlweli! Rholela mimpaxwa hi ku hantlisa!” Kutani mutirhi wa Yonatani a rholela mimpaxwa a gama a tlhela na yona ka Yonatani. 39 Mutirhi wa Yonatani a a nga swi twisisi swaku ku yendleka yini; i Yonatani na Davhida ntsena lava a va swi twisisa leswi a swi yendleka. 40 Yonatani a gama a nyika mutirhi wa yena matlharhi ya yena, a ku: “Famba, muka na wona.”

41 A nkama mutirhi wa Yonatani a nga famba, Davhida a sala a humelela hi ka tlhelo la sul.* Se a khizama a khumba hansi hi ximombo, a tlhela a korhama kanharhu, se va bejarana marhama, va sungula ku rila, kambe Davhida hi yena a nga rila hintamu. 42 Yonatani a byela Davhida a ku: “Famba hi ku rhula hikusa hina vambirhi hi fungile+ hi vito la Yehovha hi ku: ‘Yehovha a a ve mboni xikarhi ka mina na wena, ni xikarhi ka vana va mina ni vana va wena hi nkama wa ku kala wu nga heli.’”+

Kutani Davhida a suka a famba, na yena Yonatani a muka kaya.