Karta Leli Tsaleliwaka Vakolosa
1 Mina Pawulo, mupostolo wa Kreste Yesu hi ku rhandza ka Xikwembu, na makwerhu Timotiya,+ 2 ni tsalela vakwetsimi ni vamakwerhu va ku tshembeka lava nga vadjondzisiwa va Kreste aKolosa:
Timpsalu tatikulu ni ku rhula leswi taka hi ka Xikwembu Papayi wa hina a swi ve na n’wina.
3 Hi tshamela ku khensa Xikwembu Papayi wa Hosi ya hina Yesu Kreste loko hi mi khongelela, 4 hikusa hi twe hi ta lipfumelo la n’wina ka Kreste Yesu ni leswi mi va rhandzisaka xiswona vakwetsimi hinkwavu 5 hi mhaka ya ntshembo lowu mi nga vekeliwa wona matilweni.+ Ntshembo lowu mi wu twe nkama mi nga byeliwa rito la ntiyiso, ku nga mahungu ya ku tsakisa 6 lama nga mi tela. Leswi mahungu ya ku tsakisa ma yaka ma tala ma tlhela ma fikelela vanhu hinkwavu,+ swi xitanu ni le ka n’wina ku sukela siku leli mi nga twa ni ku twisisa leswi timpsalu tatikulu ta Xikwembu ti nga tshamisa xiswona. 7 Hi leswo mi nga swi djondza ka Epafrasi+ lweyi hi tirhaka na yena naswona a rhandzekaka, lweyi a tirhelaka Kreste hi ku tshembeka swaku ku pfuneka hina. 8 A tlhele a hi byela hi ta lirhandzu la n’wina leli fambisanaka ni moya wa ku kwetsima wa Xikwembu.
9 Hi yona mhaka leyi ku sukela siku leli hi nga twa hi ta lirhandzu ni lipfumelo la n’wina, hi kalaka hi nga tshikanga ku mi khongelela+ ni ku mi kombelela leswaku mi va ni wutivi la ntiyiso+ la ku rhandza ka Xikwembu, mi tala hi wutlharhi hinkwalu ni ku twisisa loku taka hi ka matimba ya xona,+ 10 leswaku mi kota ku famba hi ndlela leyi fanelaka ka Yehovha,* mi mu tsakisa hi ku helela mi tlhela mi yendla swaswinene naswona mi tama mi va ni wutivi la ntiyiso hi Xikwembu;+ 11 naswona hi khongelela swaku Xikwembu xi tirhisa matimba ya xona yamakulu+ leswaku xi mi yengetela matimba leswaku mi ta kota ku tiyisela hi ku helela, mi nga heli mbilu naswona na mi tsakile, 12 nkama mi khensaka Papayi lweyi a nga yendla swaku mi faneleka ku kuma tshomba la vakwetsimi+ lava nga ku vonakaleni.
13 A hi kutsulile ka matimba ya munyama+ kutani a hi hundzisela ka mfumu wa N’wana wa yena lweyi a mu rhandzaka. 14 Kutani hi mhaka ya yena hi chunsiwile hi nkutsulu hi tlhela hi rivaleliwa swidjoho swa hina.+ 15 Yena i xifaniso xa Xikwembu lexi kalaka xi nga voneki,+ matevula ya hinkwaswu leswi nga tumbuluxiwa.+ 16 Hikusa Xikwembu xi tirhise yena leswaku xi tumbuluxa swilo leswin’wani hinkwaswu amatilweni ni lani misaveni; swilo leswi vonekaka ni leswi kalaka swi nga voneki,+ hambi switshamu swa wuhosi, hambi wuhosi, hambi mimfumu, hambi matimba ya ku fuma. Xikwembu xi tirhise yena swaku xi tumbuluxa swilo leswin’wani hinkwaswu+ naswona swi tumbuluxeliwe yena. 17 Naswona a ve kona na swilo leswin’wani hinkwaswu+ na swi nga se va kona, naswona swilo leswin’wani hinkwaswu swi ve kona hi mhaka ya yena, 18 i nhloko ya muzimbha, ku nga bandla.+ I masungulo ya swilo hinkwaswu, matevula ya lava nga fa,+ leswaku a va wa ku sungula ka swilo hinkwaswu; 19 hikusa Xikwembu a xi lava swaku Kreste a hetiseka* ka swilo hinkwaswu.+ 20 Hi ku tirhisa ngati+ leyi Kreste a nga yi halata ka mhandzi ya nxaniso,* Xikwembu xi yendle swaku swilo leswin’wani hinkwaswu swi tlhelela ka xona,+ ku nga swilo leswi nga misaveni ni leswi nga matilweni.
21 Vhela, n’wina lava mi nga tshama mi va valala va Xikwembu mi tlhela mi hambanisiwa na xona hi mhaka ya leswi a mi pimisa mintirho ya ku biha, 22 swoswi xi tlhele xi twanana na n’wina hi ku tirhisa lifu la lweyi a nga nyikela muzimbha wa yena leswaku xi mi yendla mi kwetsima, mi nga ha soleki naswona mi nga na nandzu phambheni ka xona,+ 23 loko ntsena mi hanya hi ku pfumelelana ni lipfumelo+ leli mi nga na lona ka Xikwembu, mi simekiwa ka masungulo*+ mi tlhela mi tiya.+ Mi nga djikisiwi ka ntshembo wa mahungu wolawo ya ku tsakisa lawa mi nga ma twa, lawa ma nga chumayeliwa ka vanhu hinkwavu la misaveni.+ Mina Pawulo, ni langiwile leswaku ni chumayela mahungu wolawo ya ku tsakisa.+
24 Swoswi na tsaka hileswi ni hluphekaka hi mhaka ya n’wina,+ naswona na hlupheka ku fana na Kreste kambe na ha fanele ni tama ni hlupheka hi mhaka ya muzimbha wa yena,+ ku nga bandla.+ 25 Ni langiwile swaku ni tirhela bandla leli, hi ku ya hi ntirho+ lowu faneleke wu yendliwa lowu Xikwembu xi nga ni nyika wona leswaku ni ta chumayela rito la xona hi mbilu hinkwayu hi mhaka ya n’wina. 26 Rito la kona li patsa xihundla xa ku kwetsima+ lexi a xi nga tiviwi misaveni+ ni hi vanhu lava nga hanya khale. Kambe swoswi xihundla xa kona xi kombiwe vakwetsimi,+ 27 lava Xikwembu xi nga tsakela ku va tivisa ku hlamalisa ka tshomba la xihundla lexi xa ku kwetsima xikarhi ka matiko; xihundla xa kona+ i Kreste lweyi a twananaka na n’wina, ntshembo wa leswaku mi ta va xikan’we na yena ka wukulukumba la yena.+ 28 Hi yena lweyi hi chumayelaka hi ta yena, hi tsundzuxa ni ku djondzisa munhu mun’wani ni mun’wani hi wutlharhi hinkwalu, leswaku hi ta nyikela munhu mun’wani ni mun’wani ka Xikwembu na a li mudjondzisiwa wa ku wupfa wa Kreste.+ 29 Hi mhaka leyo, ni tirha hi matimba ni tikarhata hi ku pfuniwa hi matimba ya yena lama tirhaka ka mina.+