Vagalatiya

3 Yoo! Vagalatiya, swiphunta ndzin’wina! Mi tlhamuseliwe kahle swaku Kreste a gongondzeliwe mhandzini,+ se i mani lweyi a nga mi kanganyisa?+ 2 Ni lava ku mi vutisa nchumu: Mi yamukele moya wa ku kwetsima hi mhaka ya ku landzela nawu kumbe hi mhaka ya ku va ni lipfumelo ka leswi mi nga swi twa?+ 3 Kasi mi swiphunta swa ku tshamisa xileswi? Ku sunguleni a mi famba hi ku pfumelelana ni moya wa ku kwetsima wa Xikwembu, se hi mhaka muni mi gamisa hi ku landzela ku navela ka vanhu?+ 4 Kasi mi yo hluphiwa mahala? Na swi tiva swaku a mi hluphiwanga mahala. 5 Se lweyi a mi nyikaka moya wa ku kwetsima ni lweyi a yendlaka mintirho ya matimba+ xikarhi ka n’wina, a swi yendla hi mhaka ya leswi mi landzelaka nawu kumbe hi mhaka ya leswi mi nga ni lipfumelo ka leswi mi nga swi twa? 6 Swa fana na Abrahamu: “A ve ni lipfumelo ka Yehovha,* hi mhaka leyo a vuliwe wa ku lulama.”+

7 Vhela ma swi tiva leswaku lava nga ni lipfumelo hi vona va nga vana va Abrahamu.+ 8 Matsalwa ma swi vulile na swi nge se yendleka swaku Xikwembu a xi ta vula leswaku vanhu vamatiko va lulamile hi mhaka ya lipfumelo. Xikwembu xi rhange hi ku tivisa Abrahamu mahungu wolawo ya ku tsakisa xi ku: “Matiko hinkwawu ma ta katekisiwa hi mhaka ya wena.”+ 9 Hi mhaka leyo, lava nga ni lipfumelo va katekisiwa xikan’we na Abrahamu, lweyi a a ni lipfumelo.+

10 Hinkwavu lava titshembaka hileswi va landzelaka nawu va rhukiwile hikusa ku tsaliwile: “A a rhukiwi munhu lweyi a kalaka a nga yendli minchumu hinkwayu leyi nga tsaliwa ka buku ya Nawu.”+ 11 Kutani swi yo baa swaku a ku na munhu lweyi Xikwembu xi nga vulaka swaku a lulamile hi ku yingisa nawu,+ hikusa “wa ku lulama a ta hanya hi mhaka ya lipfumelo.”+ 12 Kutani Nawu a wu tiseketelanga hi lipfumelo. Kambe “lweyi a yendlaka swilo leswi a ta hanya hi mhaka ya swona.”+ 13 Kreste a hi xavile,+ a hi chunsa+ ka xipoyilo xa Nawu, se yena a va xirhuku ka ndhawu ya hina, hikusa ku tsaliwile: “A rhukiwile munhu lweyi a hayekiwaka mhandzini.”+ 14 Leswi swi yendleliwa leswaku nkateko wa Abrahamu wu ya ka matiko hi ku tirhisa Kreste Yesu+ leswaku hi ta yamukela moya wa ku kwetsima lowu nga tshembisiwa+ hi mhaka ya lipfumelo la hina.

15 Vamakwerhu, ni vulavula hi xikombiso lexi vanhu va nga xi tolovela: Loko ntwananu wu tiyisiwile, hambi wu tiyisiwe hi munhu, a nga kona lweyi a nga yendlaka swaku wu nga ha tirhi kumbe ku yengetela nchumu ka wona. 16 Kutani switshembiso swi vuliwe ka Abrahamu ni ka n’wana* wa yena.+ Tsalwa a li vuli swaku: “Ni le ka vana* va wena,” ingaku lo vulavula hi va vanyingi. Kambe li li: “Ni le ka n’wana wa wena,” ku nga munhu mun’we ntsena, Kreste.+ 17 Ni tlhela ni yengesela ni ku: Nawu lowu nga va kona loko se ku hundze 430 wa malembe,+ a wu yendli swaku ntwananu lowu Xikwembu xi nga wu yendla khale na ku nge se va ni nawu wu nga ha tirhi, leswaku wu helisa xitshembiso. 18 Hikusa loko swi ku Xikwembu xi nyikela tshomba hi mhaka ya ku landzela nawu, swi vula swaku a la ha kumiwi hi mhaka ya xitshembiso, kambe hi timpsalu xi li nyike Abrahamu hi mhaka ya xitshembiso.+

19 Se hi mhaka muni ku ve ni Nawu? Wu ve kona leswaku swihoxo swi ta voneka kahle+ anze ku fika n’wana+ lweyi ku nga yendliwa xitshembiso hi yena; naswona Nawu wu tisiwe hi tintsumi+ hi voko la mutlhanganisi.+ 20 Kutani lani ku khumbekaka munhu mun’we ntsena a ku laveki mutlhanganisi, swa fana ni hi Xikwembu, a xi li xoxe nkama xi nga yendla xitshembiso lexo. 21 Se swi lava ku vula swaku Nawu wu lwisana ni switshembiso swa Xikwembu? Nikatsongo! Hikusa loko vanhu a va nyikiwe nawu lowu nga nyikaka wutomi, a va ta vuliwa va ku lulama hi mhaka ya nawu. 22 Kambe Tsalwa li kombise swaku vanhu va fumiwa hi xidjoho, leswaku xitshembiso lexi kumiwaka hi ku va ni lipfumelo ka Yesu Kreste xi nyikiwa lava kombisaka lipfumelo ka yena.

23 Kambe na li nge se fika lipfumelo, a hi bohiwile ka nawu hi tlhela hi mandiwa hi wona na hi nyimela lipfumelo leli a li li kusuhi ni ku va kona.+ 24 Kutani Nawu hi wona wu nga hi kongomisa* wu hi yisa ka Kreste,+ leswaku hi ta vuliwa va ku lulama hi mhaka ya lipfumelo.+ 25 Kambe leswi se lipfumelo li nga fika,+ a ha ha lavi mukongomisi.*+

26 Phela hinkwenu mi vana va Xikwembu+ hi mhaka ya leswi mi nga ni lipfumelo ka Kreste Yesu.+ 27 Hikusa hinkwenu lava mi nga tsakamisiwa ka Kreste mi yambale Kreste.+ 28 A ku na Muyuda kumbe Mugriki,+ a ku na xikarawa kumbe munhu lweyi a nga chunseka,+ a ku na wanuna kumbe wansati,+ hikusa hinkwenu mi vanhu van’we* hileswi mi nga vadjondzisiwa va Kreste Yesu.+ 29 Kutani loko mi li vadjondzisiwa va Kreste, mi vana* va Abrahamu+ hikakunene naswona hi n’wina mi dlaka tshomba+ hi mhaka ya xitshembiso.+