Mahungu Ya Ku Tsakisa Ya Ku Tsaliwa Hi Matewu

26 Nkama Yesu a nga gama ku vulavula timhaka leti hinkwatu, a byele vadjondzisiwa va yena a ku: 2 “Ma swi tiva swaku ko chota masiku mambirhi leswaku ku va ni Paxkwa,+ naswona N’wana wa munhu a ta khomiwa a gama a dlayiwa ka mhandzi.”+

3 Se vaprista vavakulu ni madoda ya tiko va hlengeletana ka kintari* wa munti wa muprista wamukulu lweyi a a vitaniwa Kayafasi,+ 4 va twanana ku rhiya ntlhamu+ wa ku ya khoma Yesu leswaku va ta mu dlaya. 5 Kambe a va ku: “Hi nga mu khomeni fexteni hikusa vanhu va nga pfuxa mpfilumpfilu.”

6 Na Yesu a ha li Betaniya, kaya ka Simoni lweyi a nga tshama a va ni mavabyi ya nhlokonho,*+ 7 a tshineleliwe hi wansati lweyi a a ni xibolhelani* xa alabaxtru lexi a xi ni mafurha ya ku nun’hwela ma tlhela ma durha; se a sungula ku ma chela ka nhloko ya Yesu na a tshame mezeni. 8 Nkama vadjondzisiwa va nga vona leswi, va kwata hintamu va tlhela va ku: “Hi mhaka muni a tlanga hi mafurha? 9 Hikusa a ma ta xavisiwa hi male ya yinyingi kutani yi nyikiwa swisiwana.” 10 Hi ku tiva leswi a va vulavula hi swona, Yesu a ku: “Kasi mi mu karhatela yini wansati lweyi? A ni yendlele swaswinene. 11 Hikusa mi ta tshama na mi ni swisiwana nkama hinkwawu,+ kambe mina a mi nga ta va na mina nkama hinkwawu.+ 12 Phela loko wansati lweyi a tote muzimbha wa mina hi mafurha ya ku nun’hwela, a swi yendlele ku ni lunghiselela ku lahliwa.+ 13 Ni mi byela ntiyiso: Amisaveni hinkwayu, hinkwaku lomu mahungu ya ku tsakisa ma nga ta chumayeliwa kona, leswi wansati lweyi a nga swi yendla swi ta vuliwa, leswaku a khumbukiwa hi swona.”+

14 Se mun’wani wa lava 12, lweyi a vitaniwaka Yudasi Skariyota,+ a ya ka vaprista vavakulu+ 15 a fika a ku: “Mi ta ni nyika yini loko no mi pfuna kuva mi mu khoma?”+ Va mu tshembisa 30 wa mamoweda ya prata.+ 16 Kutani ku sukela kolanu, a sungula ku lavetela nkama wa kahle wa ku xavisa Yesu.

17 Hi siku la ku sungula la Fexta la Mapawu ya Ku Kala Fermentu,*+ vadjondzisiwa va ta ka Yesu va fika va ku: “U lava hi ya lunghiselela kwini leswaku u ya dlela kona Paxkwa?”+ 18 A ku: “Fambani doropeni ka Ximanimani mi ya ku: ‘Mudjondzisi a li: “Nkama wa mina lowu nga vekiwa wu le kusuhi; ni ta yendla Paxkwa ni vadjondzisiwa va mina kaya ka wena.”’” 19 Se vadjondzisiwa va yendla leswi Yesu a nga va byela swona, kutani va ya lunghiselela Paxkwa.

20 Nimadlambu,+ a tshame mezeni ni 12 wa vadjondzisiwa va yena.+ 21 Na va ha dla a va byela a ku: “Ni mi byela ntiyiso: Mun’we ka n’wina a ta ni xavisa.”+ 22 Nkama va nga twa leswo, va karhateka hintamu lakakuva hinkwavu va sungula ku mu vutisa va ku: “Hosi, indjhe a hi mina?” 23 A hlamula a ku: “Lweyi a petaka voko na mina ka tijela, hi yena a nga ta ni xavisa.+ 24 I ntiyiso, N’wana wa munhu wa famba, hi ku ya hi leswi Matsalwa ma nga swi hlaya hi yena,+ kambe khombo ka munhu lweyi a xavisaka N’wana wa munhu!+ A swi ta yampsa swinene loko munhu wa kona a a nga psaliwanga.”+ 25 Se Yudasi, lweyi a a li kusuhi ni ku mu xavisa, a mu vutisa a ku: “Rabi,* ku nga va swaku hi mina?” Yesu a ku: “Wa yi tiva nhlamulu.”

26 Na va ha li ku dleni, Yesu a teka pawu, a khensa a gama a li khema,+ a li nyika vadjondzisiwa a ku: “Tekani mi dla. Pawu leli li fanekisela muzimbha wa mina.”+ 27 A tlhela a teka kopo, se loko a khensile, a va nyika yona a ku: “Nwanani hi yona hinkwenu;+ 28 hikusa yi fanekisela ‘ngati ya mina+ ya ntwananu,’+ leyi nga ta halatiwa swaku vanhu va ku tala+ va rivaleliwa swidjoho.+ 29 Kambe na mi byela: A ni nge he tlheli ni nwa vhinyu leli, anze ku fika siku leli ni nga ta nwa la nyuwani na n’wina ka Mfumu wa Papayi wa mina.”+ 30 Hi wugamu, va yimbelele tinsimu ta ku dzunisa* Xikwembu va gama va huma va ya ka Ntshava ya Mawolivhera.+

31 Kutani Yesu a ku: “N’wina hinkwenu mi ta ni baleka wusiku leli,* hikusa ku tsaliwile: ‘Ni ta ba murisi, kutani tinyempfu ta ntlhambi ti ta hangalaka.’+ 32 Kambe nkama ni nga ta pfuxiwa, ni ta ya Galileya mi ta ya ni kuma kona.”+ 33 Kambe Pedru a mu hlamula a ku: “Hambiloko hinkwavu vo ku baleka, mina a ni nge tshuki ni ku balekile!”*+ 34 Yesu a ku: “Ni ku byela ntiyiso: Ka wusiku loleli, na nkuku wu nge se yimba, u ta ni yala kanharhu.”+ 35 Pedru a ku: “Hambi swo lava swaku ni fa na wena, a ni nge tshuki ni ku yalile.”+ Ni vadjondzisiwa lavan’wani hinkwavu va vula swoleswo.

36 Kutani Yesu a fika na vona ka ndhawu leyi vitaniwaka Getsemani,+ a gama a ku: “Tshamani lani, na ha ya lahaya ni ya khongela.”+ 37 Se a teka Pedru ni vana vambirhi va Zebedewu a famba na vona; kutani a sungula ku tlhaveka mbilu naswona a karhateka swinene.+ 38 Kutani a ku ka vona: “Ni tlhaveke mbilu swinene, lakakuva ni lava ni ku fa. Salani kola, mi nga yetleleni, tamani mi rindza na mina.”+ 39 A ya kulenyana, a fika a khizama, ximombo xa yena xi khumba hansi, a khongela a ku:+ “Papayi, loko swi koteka, kopo leyi+ a yi fambeli kule na mina. Kambe, ku nga yendleki ku rhandza ka mina; a ku yendleke ku rhandza ka wena.”+

40 Kutani a tlhela ka vadjondzisiwa a ya va kuma na va yetlelile, a byela Pedru a ku: “Mi tsandzekisa ku yini ku tikhoma mi nga yetleli ku ringana wora lin’we?+ 41 Mi nga yetleli,+ tamani mi khongela+ swaku mi nga weli ndzingweni.+ Mbilu ya swi lava kambe muzimbha lowu nga ni xidjoho a wu tiyanga.”+ 42 Kutani a tlhela a ya khongela ka wumbirhi a ku: “Papayi, loko swi nga koteki ku baleka kopo leyi, a ku yendleke ku rhandza ka wena.”+ 43 Loko a tlhela a vuya, a va kuma na va yetlelile, hikusa a va nga tikoti hi wurhongo. 44 Se a famba a va siya, a tlhela a ya khongela ka wunharhu, a vula marito ya ku fana. 45 Kutani a vuya ka vadjondzisiwa a ku: “Mo yetlela mi tlhela mi humula ka nkama lowu wa ku tika swinene? Phela nkama wa leswaku N’wana wa munhu a nyikeliwa* ka mavoko ya vadjohi wu le kusuhi. 46 Pfukani, a hi fambeni. Lweyi a nga ni xavisa a le kusuhi.” 47 Na a ha khuluma, ku humelela Yudasi, mun’we wa lava 12, a ta ni xitshungu xaxikulu na xi ni swipada ni tinhonga; a xi rhumiwe hi vaprista vavakulu ni madoda ya tiko.+

48 Yudasi a a va byele leswi a a ta va kombisa xiswona Yesu, a ku: “Lweyi ni nga ta mu bejara,* hi yena; mu khomeni.” 49 Se Yudasi a ya ka Yesu a fika a ku: “Xowani Rabi!”* kutani a mu bejara. 50 Kambe Yesu a ku ka yena: “He nduwe, u tele yini lani?”+ Kutani va tshinelela Yesu va mu khoma va ya mu pfalela. 51 Kambe mun’wani wa lava a va li na Yesu a humesa xipada xa yena, a hlasela xitirhi xa muprista wamukulu a xi tsema ndleve.+ 52 Kutani Yesu a ku ka yena: “Tlhelisa xipada xa wena ka ndhawu ya xona,+ hikusa hinkwavu lava khomaka xipada va ta dlayiwa hi xipada.+ 53 Kumbe u pimisa swaku a ni nge mu kombeli Papayi wa mina swaku swoswi a ni rhumela tintsumi* ta tinyingi hintamu?+ 54 Kambe loko a no yendla leswo, a ma ta hetisekisa ku yini Matsalwa lama vulaka swaku swilo a swi fanele swi yendlekisa xileswi ke?” 55 Hi nkama wolowo, Yesu a byela xitshungu a ku: “No va xigevenga ke, mi zaka mi ni tela ni swipada ni tinhonga leswaku mi ta ni khoma? Siku ni siku a ni tshama tempeleni ni djondzisa,+ kambe a mi ni khomanga.+ 56 Kambe hinkwaswu leswi swi yendlekile swaku ku hetiseka leswi nga tsaliwa* hi vaprofeta.”+ Kutani vadjondzisiwa hinkwavu va baleka va mu siya.+

57 Lava nga khoma Yesu va mu yise ka Kayafasi+ muprista wamukulu, lani vatsali ni madoda a va hlengeletane kona.+ 58 Kambe Pedru a a tama a mu landzelela na a li kulenyana, anze va fika ka kintari wa munti wa muprista wamukulu. Nkama a nga nghena, a tshame ni vatirhi lava vonelelaka munti kuva a vona leswi nga ta yendleka.+

59 Kutani vaprista vavakulu ni Tribunali Lalikulu la Vayuda* a va lavetela vanhu lava a va ta vula mavunhwa hi Yesu swaku va mu dlaya,+ 60 kambe hambileswi ku nga humelela timboni ta tinyingi ta mavunhwa, a va swi kumanga swa ku mu lumbeta hi swona.+ Hi wugamu, ku humelele timboni timbirhi 61 ti ku: “Munhu lweyi a te: ‘Ni nga swi kota ku diliza tempele ya Xikwembu ni tlhela ni yi yaka hi masiku manharhu.’”+ 62 Nkama muprista wamukulu a nga swi twa, a sekeleka a byela Yesu a ku: “U li yini hi leswi va swi vulaka? A wu swi twi leswi va ku lumbetaka hi swona?”+ 63 Kambe Yesu a miyela a ku ntse.+ Kutani muprista wamukulu a ku: “Ni ku rhuma swaku u funga ka Xikwembu lexi hanyaka, u hi byela loko u li Kreste N’wana wa Xikwembu!”+ 64 Yesu a ku: “Wena hi wexe u swi vulile. Kambe na mi byela: Ku sukela swoswi, mi ta vona N’wana wa munhu+ na a tshame ka voko la xinene la Xikwembu xa Matimba+ naswona na a ta a li ka marhefu ya tilo.”+ 65 Kutani muprista wamukulu a handzula mpahla ya yena a ku: “Wanuna lweyi a rhuketele Xikwembu! Se ha ha ti lavela yini timboni tin’wani? Mi mu twile hi n’wexe loko a rhuketela Xikwembu. 66 Mi swi vonisa ku yini?” Va hlamula va ku: “A faneliwa hi ku fa.”+ 67 Va gama va mu pshitela marhi ka nghohe,*+ va mu ba hi swibakela.+ Van’wanyani va mu ba hi timpama+ 68 va ku: “Profeta ka! Wena Kreste, i mani a nga ku ba?”

69 Pedru a a tshame handle, ka kintari wa munti, se ku ta mutirhi wa xisati a ku: “Na wena a wu li na Yesu wa Mugalileya!”+ 70 Kambe a yala na a voniwa hi hinkwavu a ku: “A ni swi tivi leswi u swi vulaka.” 71 Loko a suka a ya ka xipfalu lexi humelaka xitaratwini, mutirhi mun’wani wa xisati a mu vona, se a byela lava a va li kolanu a ku: “Wanuna lweyi a a li na Yesu wa Munazareta.”+ 72 A tlhela a yala hi ku funga a ku: “A ni mu tivi munhu lweyi!” 73 Loko ku hundze nkamanyana, lava a va nyime kolanu va ta, va byela Pedru va ku: “Vhela na wena u mun’wani wa vona; swa tikomba hi mavulavulelo ya wena.” 74 Se a sungula ku funga a tlhela a chikicha a ku: “A ni mu tivi munhu lweyi!” Hi nkama wolowo nkuku wu yimba. 75 Kutani Pedru a khumbuka marito lawa Yesu a nga ma vula lama nge: “Na nkuku wu nge se yimba, u ta ni yala kanharhu.”+ Se a huma handle, a fika a rila hi xiviti.