Varoma

8 Kutani lava twananaka na Kreste Yesu a va na nandzu. 2 Hikusa a nawu wa moya wa ku kwetsima lowu mi nyikaka wutomi hi ku tirhisa Kreste Yesu wu mi chunsile+ ka nawu wa xidjoho ni wa lifu. 3 Nawu a wu nga na matimba ya ku chunsa vanhu+ hikusa a va hetisekanga.+ Se Xikwembu xi mi chunsile hi ku rhumela N’wana wa xona+ na a ni muzimbha wa ku fana ni wa n’wina lowu nga ni xidjoho+ leswaku a ta kota ku hlula xidjoho. Kutani Xikwembu xi yavanyise xidjoho ka vanhu 4 leswaku hi ta hetisisa swilo swa ku lulama leswi laviwaka hi Nawu+ hi ku yingisa moya wa ku kwetsima ku nga li ku navela ka nyama ya hina leyi nga ni xidjoho.+ 5 Hikusa lava hanyaka hi ku landza ku navela ka nyama va pimisa swilo swa nyama,+ kambe lava yingisaka moya wa ku kwetsima* va pimisa swilo swa Xikwembu.+ 6 Ku pimisa swilo swa nyama swi tisa lifu,+ kambe ku pimisa swilo swa moya wa ku kwetsima swi tisa wutomi ni ku rhula.+ 7 Lava pimisaka swilo swa nyama i valala va Xikwembu+ hikusa a va yingisi nawu wa Xikwembu. Vhela nyama a yi nge swi koti ku yingisa nawu. 8 Kutani lava mandiwaka hi ku navela ka nyama a va nge xi tsakisi Xikwembu.

9 Kasi loko mi li n’wina, mi ta va mi nga mandiwi hi ku navela ka nyama ya n’wina leyi nga ni xidjoho, kambe mi mandiwa hi moya wa ku kwetsima,+ loko hikakunene matimba ya Xikwembu ma li ka n’wina. Kambe loko munhu a nga na mimpimiso* ya Kreste, a hi wa Kreste. 10 Loko Kreste a twanana na n’wina,+ hambi muzimbha wa n’wina wo fa hi mhaka ya xidjoho, matimba ya Xikwembu ma nyika wutomi hileswi mi nga vuliwa va ku lulama. 11 Kutani loko matimba ya lweyi a nga pfuxa Yesu ka lava nga fa ma li ka n’wina, lweyi a nga pfuxa Kreste Yesu ka lava nga fa+ a ta tlhela a hanyisa muzimbha wa n’wina+ lowu faka hi ku tirhisa matimba ya yena lama tshamaka ka n’wina.

12 Se vamakwerhu, a hi boheki ku yingisa ku navela ka nyama ya hina ni ku yendla mintirho ya yona.+ 13 Loko mi yingisa ku navela ka nyama ya n’wina mi ta fa. Kambe loko mi pfumelela matimba ya Xikwembu ma mi pfuna ku dlaya mintirho ya nyama,+ mi ta hanya.+ 14 Hikusa hinkwavu lava kongomisiwaka hi matimba ya Xikwembu i vana va Xikwembu hikakunene.+ 15 Matimba lawa mi nga nyikiwa wona a ma mi yendli swikarawa ni ku mi yendla mi chava kambe ma mi yendla vana* va Xikwembu naswona matimba wolawo ma yendla hi huwelela hi ku: “Abba,* Papayi!”+ 16 Matimba ya Xikwembu ma hi tiyisekisa+ swaku hi vana va Xikwembu.+ 17 Loko hi li vana va Xikwembu, swi vula swaku hi ta dla tshomba la Xikwembu ni tshomba+ leli xi nga li nyika Kreste. Kambe hi fanele hi rhanga hi xaniseka ku fana na Kreste leswaku hi ta tlhela hi tlakusiwa xikan’we.+

18 Hikusa ni pimisa swaku ku hlupheka loku hi kumanaka na kona swoswi a hi ka nchumu loko ku pimanisiwa ni hakelo leyi Xikwembu xi nga ta hi komba yona ka nkama lowu taka.+ 19 Hikusa leswi nga tumbuluxiwa swi wu nyimele hi ku navela kakukulu nkama wa leswaku Xikwembu xi swi komba vana va xona.+ 20 Hikusa hinkwaswu swi vekiwe ka xiyimu xa ku kala xi nga pfuni nchumu,+ ku nga li hi ku rhandza ka swona, kambe hi ku rhandza ka Xikwembu hikusa xi hi nyike ntshembo 21 wa leswaku hinkwaswu swi ta chunsiwa+ ka wukarawa la xidjoho ni lifu* kutani swi va ni nchunseko wa ku hlamalisa wa vana va Xikwembu. 22 Hikusa ha swi tiva swaku hinkwaswu leswi Xikwembu xi nga swi yendla* swa ha tama swi konya swi tlhela swi vaviseka ku ta fikela swoswi. 23 A hi leswo ntsena, kambe hambi hina hi nga yamukela xiyenge xa ku sungula xa hakelo, ku nga moya wa ku kwetsima, hina hi hoxe ha konya ndzeni ka hina,+ na ha ha swi nyimela hi mbilu hinkwayu ku yendliwa vana va Xikwembu,+ hi chunsiwa ka muzimbha wa hina hi nkutsulu. 24 Hikusa hi ponisiwile hi mhaka ya ntshembo lowu; kambe ntshembo lowu voniwaka a hi ntshembo, hikusa munhu a nga xi nyimelisa ku yini nchumu lexi a xi vonaka? 25 Kambe loko hi tshemba+ leswi hi kalaka hi nga swi voni,+ hi tama hi swi nyimela hi ku langutela kakukulu hi ku tiyisela.+

26 Hi ku fana, matimba ya Xikwembu ma hi pfuna loko hi hele ntamu;+ hikusa minkama yin’wani a hi swi tivi swaku hi ta kombela yini nkama hi khongelaka, kambe moya wa ku kwetsima hi woxe wa hi kombelela loko hi konya hambi hi nga humesi marito. 27 Kambe lweyi a kambisisaka timbilu+ wa swi tiva leswi moya wa ku kwetsima wu vulaka swona, hikusa wu kombelela vakwetsimi hi ku pfumelelana ni ku rhandza ka Xikwembu.

28 Ha swi tiva swaku Xikwembu xi yendla leswaku mintirho ya xona hinkwayu yi tirhisana leswaku ku pfuneka lava rhandzaka Xikwembu, ku nga vona va nga vitaniwa hi ku ya hi maplanu* ya xona;+ 29 hikusa ku sukela ku sunguleni a xi swi tiva swaku xi ta langa vanhu xi tlhela xi tiyisekisa swaku va ta fana* ni N’wana wa xona+ lweyi a nga matevula+ xikarhi ka vamakwavu va yena va vanyingi.+ 30 Naswona lava a xi swi tiva swaku xi ta va langa,+ hi vona lava xi nga tlhela xi va vitana;+ naswona lava xi nga va vitana hi vona lava xi nga tlhela xi va vula va ku lulama.+ Hi wugamu, lava xi nga va vula va ku lulama hi vona lava xi nga tlhela xi va tlakusa.+

31 Se hi ta ku yini hi timhaka leti? Loko Xikwembu xi na hina, i mani lweyi a nga lwaka na hina?+ 32 Leswi xi kalaka xi nga yalanga ni N’wana wa xona, kambe xi nga mu nyikela hi mhaka ya hina hinkwerhu,+ hi timpsalu a xi nga ta hi nyika swilo leswin’wani ku patsa ni N’wana wa xona ke? 33 I mani lweyi a nga ta mangalela lava nga langiwa hi Xikwembu?+ Xikwembu hi xona xi vulaka swaku va lulamile.+ 34 I mani lweyi a nga ta va nyika nandzu? A nga kona, hikusa Kreste Yesu lweyi a nga fa a tlhela a pfuxiwa ka lava nga fa, a tshame ka voko la xinene la Xikwembu+ naswona wa hi kombelela ka xona.+

35 I mani lweyi a nga hi hambanisaka ni lirhandzu leli Kreste a nga na lona hi hina?+ Ku nga va mahlomulu kumbe swikarhatu kumbe ku hluphiwa kumbe ndlala kumbe ku pfumala mpahla kumbe nghozi kumbe xipada?+ 36 Hilaha swi nga tsaliwa: “Minkama hinkwayu va lava ku hi dlaya hi mhaka ya wena; hi fana ni tinyempfu leti yaka ku dlayiweni.”+ 37 Kambe ka swilo leswi hinkwaswu, hi hlula hi tlhela hi hlulisisa+ hi mhaka ya lweyi a nga hi rhandza. 38 Hikusa na kholwa swaku hambi lifu kumbe wutomi kumbe tintsumi kumbe mimfumu kumbe swilo leswi nga kona swoswi kumbe swilo leswi taka kumbe matimba+ 39 kumbe ku tlakuka kumbe ku yenta kumbe yini na yini lexi nga yendliwa, a swi nge swi koti ku hi hambanisa ni lirhandzu leli Xikwembu xi nga na lona hi hina, leli xi nga li kombisa hi ku tirhisa Hosi ya hina Kreste Yesu.