Vaheberu

12 Se leswi hi nga rhendzeliwa hi rhefu lalikulu la timboni, na hina a hi txukumeteni hinkwaswu leswi hi tikelaka ni xidjoho lexi hi phasaka hi ku vevuka+ naswona a hi tsutsumeni hi ku tiyisela ka mpalisanu lowu nga vekiwa phambheni ka hina,+ 2 na hi txuvuka kahle ka Murhangeli Wamukulu ni Muhetisisi wa lipfumelo la hina, ku nga Yesu.+ Hi mhaka ya ku tsaka loku a ku vekiwe phambheni ka yena a tiyisele mhandzi ya nxaniso,* a nga vanga ni mhaka loko a danisiwa, kutani a tshame ka voko la xinene la xitshamu xa wuhosi xa Xikwembu.+ 3 Pimisani kahle hi lweyi a nga tiyisela ku rhuketeliwa hi vadjohi+ lava a va tiyavanyisa hi voxe hi ku yendla leswo, leswaku mi nga karhali mi tlhela mi nga heli matimba.+

4 Ka nyimpi leyi mi yi lwaka ni xidjoho lexo, a mi se tshama mi lwa mi za mi huma ngati. 5 Mi xi khohlwile hi ku helela xitsundzuxu lexi Xikwembu xi nga mi nyika xona ku fana ni vana, lexi nge: “N’wananga, u nga ku voneli hansi ku layiwa hi Yehovha* naswona u nga heli ntamu loko a ku lulamisa; 6 hikusa lava Yehovha* a va rhandzaka wa va laya; phela a ba* mun’wani ni mun’wani lweyi a mu vonaka a li n’wana.”+

7 Mi fanele mi tiyisela naswona mi swi vona na ku li ndlela ya ku layiwa.* Xikwembu xi mi khoma ku fana ni vana va xona.+ Hikusa i n’wana muni lweyi papayi wa yena a kalaka a nga mu layi?+ 8 Kambe loko hinkwenu mi nga layiwi ku fana ni leswi van’wani va nga layisiwa xiswona, a mi vana va xona va ntiyiso kambe mi vana va mun’wani. 9 Phela vapapayi va hina a va hi laya naswona a hi va hlonipha. Se a hi fanelanga hi tiveka hansi swinene ka Papayi lweyi a kongomisaka wutomi la hina hi moya wa yena wa ku kwetsima kutani hi hanya ke?+ 10 Hikusa vapapayi va hina va hi laye swa nkamayana hi ku ya hi leswi a swi tikomba na swi li swinene ka vona, kambe Xikwembu xi yendla leswo leswaku hi ta pfuneka ni leswaku hi ta kwetsima ku fana na xona.+ 11 Vhela, ku layiwa a swi tsakisi, swa vava. Kambe swa va pfuna lava lavaka ku djondza, naswona swi gama swi va yendla va hanya hi ndlela yayinene ni hi ku rhula.

12 Hi mhaka leyo, tiyisani mavoko lama nga hela ntamu ni matsolo lama rhurhumelaka.+ 13 Tamani mi lulamisela minenge ya n’wina+ tindlela ti ku nthwii leswaku lweyi a khwitaka a nga yengeseli ku vavisiwa,* kambe a hanyisiwa. 14 Lwelani ku hanya hi ku rhula ni vanhu hinkwavu+ mi tlhela mi kwetsima+ hikusa loko munhu a nga kwetsimi a nge yi voni Hosi. 15 Tivoneleni leswaku ku nga vi ni munhu lweyi a tsandzekaka ku kuma timpsalu tatikulu ta Xikwembu ni leswaku ku nga mili limintsu la vhenenu leli vangaka swikarhatu kutani vanhu va vanyingi va chakisiwa hi lona;+ 16 naswona tivoneleni swaku ku nga vi ni lweyi a yendlaka wuntunga la swa masangu* xikarhi ka n’wina kumbe munhu lweyi a kalaka a nga hloniphi swilo swa ku kwetsima, ku fana na Esawu lweyi a nga xavisa mfanelo ya ku va matevula hi ku fela swakudla.+ 17 Hikusa ma swi tiva swaku loko se a lava ku katekisiwa a nga kumanga nchumu; hikusa hambileswi a nga zama hi mbilu hinkwayu ku txintxa mimpimiso ya papayi wa yena hi ku rila,+ a swi pfunanga nchumu.

18 Hikusa a mi fikanga kusuhi ni ntshava leyi mi nga yi khumbaka,+ leyi pfurhaka ndzilu,+ ni ka rhefu la ntima, ni ka munyama wawukulu, ni ka xidzedze,+ 19 ni ka guwa la mhalamhala*+ ni ka rito leli vulavulaka,+ leli nkama vanhu va nga li twa va nga kombela swaku va nga ha byeliwi swin’wani.+ 20 Hikusa a va nga swi koti ku tiyisela nawu lowu nge: “Hambi xiharhi, loko xo khumba ntshava, xi fanele xi biwa hi maribye.”+ 21 Naswona leswi va nga swi vona a swi chavisa hintamu a za Moxe a ku: “Na chava naswona na rhurhumela.”+ 22 Kambe n’wina mi fike kusuhi ni Ntshava ya Siyoni+ ni doropa la Xikwembu lexi hanyaka, ku nga Yerusalema wa le tilweni,+ ni ka tintsumi ta tinyingi swinene* 23 leti nga hlengeletana,+ ni ka bandla la matevula leli nga tsaliwa matilweni, ni ka Xikwembu Muyavanyisi wa hinkwavu,+ ni ka va ku lulama lava hanyaka hi ndlela leyi fambisanaka ni moya wa ku kwetsima+ naswona va nga yendliwa va ku hetiseka,*+ 24 ni ka Yesu mutlhanganisi+ wa ntwananu wa nyuwani,+ ni ka ngati leyi nga n’wan’waseliwa leyi vulavulaka swa ku yampsa ku tlula ngati ya Abele.+

25 Tivoneleni swaku mi nga yali ku yingisa lweyi a vulavulaka. Hikusa leswi va kalaka va nga ponanga lava nga yala ku yingisa lweyi a nyikelaka xitsundzuxu lexi taka hi ka Xikwembu lani misaveni, na hina a hi nga ta pona loko hi nga yingisi lweyi a vulavulaka na a li matilweni!+ 26 Hi nkama wolowo rito la yena li tsekatsekise misava,+ kambe swoswi a tshembisile a ku: “Hi nkamanyana, a ni nga ta tsekatsekisa misava ntsena kambe ni ta tlhela ni tsekatsekisa ni tilo.”+ 27 Kutani marito lama nge: “Ni ta tlhela,” ma kombisa ku susiwa ka swilo leswi tsekatsekisiwaka, ku nga swilo leswi kalaka swi nga yendliwanga hi Xikwembu, leswaku ku sala swilo leswi kalaka swi nga tsekatsekisiwi. 28 Se leswi hi nga ta yamukela Mfumu lowu nga ta kala wu nga tsekatsekisiwi, a hi tameni hi yamukela timpsalu tatikulu leti hi yendlaka hi kota ku yendlela Xikwembu ntirho wa ku kwetsima hi ndlela ya ku yamukeleka ni hi xihlonipho. 29 Hikusa Xikwembu xa hina i ndzilu lowu helisaka.+