Mahungu Ya Ku Tsakisa Ya Ku Tsaliwa Hi Matewu

24 Nkama Yesu a nga huma tempeleni, vadjondzisiwa va yena va mu tshinelela swaku va mu komba tempele hinkwayu. 2 A va byela a ku: “Ma swi vona swilo leswi hinkwaswu? Ni mi byela ntiyiso: Maribye hinkwawu lawa ma nga lani ma ta diliziwa naswona a li kona ni lin’we li nga ta sala henhla ka lin’wani.”+

3 Na a ha tshame ka Ntshava ya Mawolivhera, vadjondzisiwa va mu yela hi tlhelo va ku: “Hi nga hi byela, swi ta yendleka siku muni swilo leswi naswona xi ta va xihi xikombiso xa nkama wa ku vuya ka wena+ ni xa ku fika ka nkama wa wugamu?”+

4 Kutani Yesu a va hlamula a ku: “Tivoneleni swaku mi nga tshuki mi kanganyisiwa hi munhu,+ 5 hikusa va ku tala va ta ta hi vito la mina va ku: ‘Hi mina Kreste!’ naswona va ta kanganyisa va ku tala.+ 6 Mi ta twa hi ta tinyimpi ni mahungu ya tinyimpi; kambe mi nga chaveni, hikusa swilo leswi swi fanele swi yendleka; kambe magamu ma ta va ma nga se fika.+

7 “Hikusa matiko ma ta lwa hi xiwona, ni mimfumu yi ta lwa hi xiyona,+ ku ta pfumaleka swakudla+ ni misava yi ta tsekatseka ka tindhawu ta ku hambanahambana.+ 8 Swilo leswi hinkwaswu i ku sungula ka swikarhatu.*

9 “Kutani vanhu va ta mi xanisa+ va tlhela va mi dlaya,+ naswona mi ta nyenyiwa hi matiko hinkwawu hi mhaka ya vito la mina.+ 10 Va ku tala va ta heleliwa hi lipfumelo, va xavisana va tlhela va nyenyana. 11 Ku ta humelela vaprofeta va vanyingi va mavunhwa lava nga ta kanganyisa va ku tala;+ 12 naswona lirhandzu la va ku tala li ta pumbeka hi mhaka ya ku yengeteleka ka wubihi. 13 Kambe lweyi a nga ta tiyisela* anze ku fika magamu, hi yena lweyi a nga ta ponisiwa.+ 14 Naswona mahungu lawa ya ku tsakisa ya Mfumu ma ta chumayeliwa amisaveni hinkwayu leswaku ma va wumboni ka matiko hinkwawu;+ kutani hi kona magamu ma nga ta fika.

15 “Se nkama mi nga ta vona nchumu xa ku nyenyentsa lexi wonhetelaka na xi nyime xi ku dzii ka ndhawu ya ku kwetsima,+ hi ku landza leswi swi nga hlayiwa hi muprofeta Daniyele (mulerhi a a twisisi), 16 lava nga Yudiya a va baleke va ya ka tintshava.+ 17 Lweyi a nga henhla ka yindlo a nga xiki a ya humesa minchumu leyi nga ndlwini ka yena; 18 naswona lweyi a nga masin’wini a nga tshuki a tlhela kaya a ya teka mpahla ya yena. 19 Phela swi ta va karhatela ndjhani vavasati lava nga ni tinyimba ni lava yan’wisaka vana ka masiku wolawo! 20 Tamani mi khongelela swaku loko mi baleka swi nga kotlani ni wuxika kumbe ni siku la Savata; 21 hikusa ku ta va ni nhlomulu wawukulu+ lowu kalaka wu nga se tshama wu humelela wa ku fana na wona ku sukela misava yi va kona ku ta fikela swoswi, naswona a wu nga ha ta tlhela wu va kona.+ 22 Phela loko masiku wolawo a ma nga pumbiwanga, a ku na munhu lweyi a a ta pona; kambe masiku wolawo ma ta pumbiwa+ hi mhaka ya vanhu lava va nga langiwa.

23 “Hi nkama wolowo, loko munhu a mi byela a ku: ‘Vonani! Hi lweyi Kreste!’+ kumbe: ‘Hi lwiya!’ mi nga swi kholweni.+ 24 Hikusa ku ta va ni lava nga ta hemba va tivula Kreste ku tlhela ku va ni vaprofeta va mavunhwa+ naswona va ta yendla masingita yamakulu ni swilo swa ku hlamalisa leswaku va kanganyisa+ hambi ni lava va nga langiwa loko swi koteka. 25 Phela ni mi ba ndleve na ka ha li swoswi. 26 Hi mhaka leyo, loko vanhu va ku: ‘A le mananga,’ mi nga yeneni; kumbe va ku: ‘A ndlwini,’ mi nga swi kholwi.+ 27 Hikusa ku fana ni leswi ku hatima ku sukelaka awuxeni ku ya fika awupeladlambu, swi ta tshamisa swoleswo loko N’wana wa munhu a ta.+ 28 Lani ku nga ni ntsumbu, magama* ma ta hlengeletana kona.+

29 “Loko masiku ya nhlomulu wolowo ma hela, dlambu li ta txintxa li va la ntima,+ n’weti a wu nge he voningi, tinyeleti ti ta wa hi le tilweni ni matimba lama nga matilweni ma ta tsekatsekisiwa.+ 30 Loko leswo se swi hundzile, xikombiso xa N’wana wa munhu xi ta humelela tilweni, naswona matiko hinkwawu* ya misava ma ta ba nkosi,+ kutani ma ta vona N’wana wa munhu+ a ta na a li ka marhefu* hi matimba ni ku phatima kakukulu.+ 31 Hi guwa lalikulu la mhalamhala,* a ta rhuma tintsumi ta yena, kutani ti ta hlengeleta lava va nga langiwa hi yena na va ta hi ka matlhelo hinkwawu ya misava,* ku sukela ka magamu man’wani ya matilo ku ya fika ka laman’wanyani.+

32 “Djondzani ka xifaniso xa nsinya wa nkuwa: Nkama swigadjani swa wona swi sungulaka ku hluka, ma swi tiva swaku malanga* ma kusuhi.+ 33 Hi ku fana, na n’wina loko mi vona swilo leswi hinkwaswu swi yendleka, swi tiveni swaku N’wana wa munhu a le kusuhi, ka swipfalu.+ 34 Ni mi byela ntiyiso: Vanhu va nkama lowu* a va nge fi va hela na swilo leswi hinkwaswu swi nga se yendleka. 35 Tilo ni misava swi ta hundza, kambe marito ya mina ma ta tshama hi masiku ni masiku.+

36 “A siku la kona ni nkama wa kona, a swi tiviwi hi munhu,+ hambi ku li tintsumi ta le matilweni kumbe N’wana a va swi tivi, kambe swi tiviwa hi Papayi ntsena.+ 37 Hikusa ku fana ni leswi swi nga yendlekisa swona ka masiku ya Nowa,+ ni masiku ya N’wana wa munhu ma ta tshamisa swoleswo.+ 38 Hikusa ka masiku ya Nowa, na Ndhambi yi nga se fika, vanhu a va dla, va nwa, vavanuna va chada, vavasati va chadiwa, ku za ku fika siku leli Nowa a nga nghena hi lona ka ngalava;+ 39 naswona a va nga na mhaka ni nchumu anze Ndhambi yi fika yi va kukula hinkwavu.+ Swi ta tshamisa swoleswo ni hi nkama wa ku vuya ka N’wana wa munhu. 40 Kutani vavanuna vambirhi va ta va masin’wini: Ku ta tekiwa mun’we ku siyiwa lweyi mun’wani; 41 vavasati vambirhi va ta va na va sila: Ku ta tekiwa mun’we ku siyiwa lweyi mun’wani.+ 42 Hi mhaka leyo, tshamani na mi pfulile matihlo, hikusa a mi li tivi siku leli Hosi ya n’wina yi nga ta ta hi lona.+

43 “Kambe tivani leswi: Loko n’winyi wa munti a a swi tiva swaku muyivi a ta ta hi nkama* muni,+ a a nga ta yetlela naswona a a nga ta tshika munti wa yena wu tlhanyiwa.+ 44 Hi mhaka leyo, na n’wina tshamani mi lunghekile,+ hikusa N’wana wa munhu a ta fika hi nkama lowu mi kalaka mi nga wu pimisi.

45 “Kasi i mani mutirhi* wa ku tshembeka ni wa ku tlhariha, lweyi n’winyi wa yena a nga mu veka swaku a hlayisa vatirhi va yena, a va phamela swakudla hi nkama wa kona?+ 46 Wa tsaka mutirhi yelweyo loko n’winyi wa yena a fika a mu kuma na a yendla swoleswo!+ 47 Ni mi byela ntiyiso: N’winyi wa yena a ta mu langa swaku a hlayisa swilo swa yena hinkwaswu.

48 “Kambe loko mutirhi yelweyo a yendla swa ku biha naswona a tibyela mbilwini ya yena a ku: ‘N’winyi wa mina wa hlwela,’+ 49 se a sungula ku ba vatirhi lavan’wani a tlhela a dla ni ku nwa ni swidakwa, 50 n’winyi wa mutirhi yelweyo a ta ta hi siku leli a kalaka a nga li pimisi ni hi nkama lowu a kalaka a nga wu tivi,+ 51 kutani a ta mu khatisa hi ndlela ya ku vava swinene naswona a ta mu txukumetela lomu ku nga ni vakanganyisi. Hi lanu a nga ta ba nkosi a tlhela a karhateka.*+