Tihosi Ta Ku Sungula
22 Ku hele malembe manharhu na Vasiriya ni Vayisrayele va nga lwi. 2 Hi lembe la wunharhu Yehoxafati+ hosi ya Yuda a ye ka hosi ya Israyele.+ 3 Se hosi ya Israyele yi byela vatirhi va yona yi ku: “Ma swi tiva swaku doropa la Ramoti-Jiliyadi+ i la hina. Kambe ha kanakana ku li teka ka hosi ya Siriya.” 4 Se a vutisa Yehoxafati a ku: “U ta famba na mina hi ya lwa ni doropa la Ramoti-Jiliyadi?” Yehoxafati a hlamula hosi ya Israyele a ku: “Mina na wena hi van’we. Vanhu va mina i vanhu va wena. Makavhalu ya mina i makavhalu ya wena.”+
5 Kambe Yehoxafati a byela hosi ya Israyele a ku: “Ni kombela+ u rhanga hi ku vutisa Yehovha mhaka leyi.”+ 6 Kutani hosi ya Israyele yi hlengeleta vaprofeta, kolomuyani ka 400 wa vavanuna, yi gama yi va vutisa yi ku: “Ni famba ni ya lwa ni doropa la Ramoti-Jiliyadi, kumbe ni nga fambi?” Vona va ku: “Famba wena hosi, Yehovha a ta ku pfuna swaku u hlula.”
7 Yehoxafati a vutisa a ku: “A ku na muprofeta wa Yehovha lani? A hi mu vutiseni na yena.”+ 8 Se hosi ya Israyele yi byela Yehoxafati yi ku: “Ku ni mun’we lweyi a nga hi vutiselaka ka Yehovha;+ kambe na mu nyenya+ hikusa loko a profeta a nga ni byeli swaswinene, a ni byela swa ku biha ntsena.+ Vito la yena i Mikaya n’wana wa Imilayi.” Kambe Yehoxafati a ku: “Wena hosi u nga tshuki u hlaya swa ku fana ni leswo.”
9 Hosi yi vitana mun’we ka madoda ya yona yi ku: “Hantlisa u ya vitana Mikaya n’wana wa Imilayi.”+ 10 Hosi ya Israyele na Yehoxafati hosi ya Yuda a va tshame ka switshamu swa vona swa wuhosi, na va yambale mpahla ya vona ya wuhosi, na va li ka ndhawu leyi ku phepheriwaka ka yona, akusuhi ni nyanghwa wa Samariya naswona vaprofeta hinkwavu a va li ku profeteni phambheni ka vona.+ 11 Se Zedekiya n’wana wa Kenana a yendla timhondzo ta nsimbi, a ku: “Yehovha a li: ‘U ta tlhava Vasiriya hi timhondzo leti anze u va heta.’” 12 Vaprofeta lavan’wani hinkwavu a va hlaya swa ku fana ni swoleswo, va ku: “Famba u ya lwa ni doropa la Ramoti-Jiliyadi, u ta li hlula; Yehovha a ta li nyikela ka wena hosi.”
13 Kutani lweyi a nga rhumiwa swaku a ya vitana Mikaya, a fika a mu byela a ku: “Vaprofeta hinkwavu va profete swaswinene ka hosi. Na wena ni kombela u yendla leswi fanaka, u profeta swaswinene.”+ 14 Kambe Mikaya a ku: “Na funga hi vito la Yehovha Xikwembu lexi hanyaka, swaku leswi Yehovha a nga ta ni byela swona, hi swona leswi ni nga ta swi hlaya.” 15 Se a fika ka hosi, yi gama yi mu vutisa yi ku: “Mikaya, hi famba hi ya lwa ni doropa la Ramoti-Jiliyadi kumbe hi nga yi?” Mikaya a yi hlamula a ku: “Famba, u ta hlula; Yehovha a ta li nyikela ka wena hosi.” 16 Se hosi yi mu vutisa yi ku: “Ni fanele ni ku fungisa kangaki swaku u ta ni byela ntiyiso hi vito la Yehovha?” 17 A yi hlamula a ku: “Ni vona Vayisrayele hinkwavu na va hangalakelile ka tintshava+ ku fana ni tinyempfu ta ku kala ti nga na mulusi. Yehovha a te: ‘Lava a va na murhangeli. A va tlhelele makaya ka vona hi ku rhula.’”
18 Kutani hosi ya Israyele yi byela Yehoxafati yi ku: “A ni hlayanga ni ku: ‘A nga ta profeta swilo swaswinene hi mina, a ta profeta swilo swa ku biha ntsena’?”+
19 Mikaya a tlhela a ku: “Yingisa leswi Yehovha a swi hlayaka: Ni vone Yehovha na a tshame ka xitshamu xa yena xa wuhosi+ naswona tintsumi hinkwatu a ti nyime matlhelweni ka yena, ka tlhelo la xinene ni la ximatsi.+ 20 Yehovha a vutisa a ku: ‘I mani lweyi a nga ta xenga Akabu swaku a ta ya dlayiwa aRamoti-Jiliyadi?’ Ntsumi yin’we yi hlaya leswi, ntsumi yin’wani yi hlaya leswiya. 21 Ku gama ku fika ntsumi yin’wani+ yi nyima phambheni ka Yehovha, yi ku: ‘Mina ni ta ya ni ya mu xenga.’ Yehovha a yi vutisa a ku: ‘U ta mu xengisa ku yini?’ 22 Yi mu hlamula yi ku: ‘Ni ta yendla swaku vaprofeta va yena hinkwavu+ va vulavula mavunhwa.’ Se yena a ku: ‘Impela u ta mu xenga naswona leswi u nga swi hlaya swi ta tirha. Famba u ya yendla swoleswo.’ 23 Yehovha a tirhise ntsumi swaku yi yendla vaprofeta va wena hinkwavu va ku byela mavunhwa,+ kambe Yehovha a hlaye swaku u ta humeleliwa hi khombo.”+
24 Zedekiya n’wana wa Kenana a tshinela ka Mikaya a fika a mu ba hi mpama a ku: “Moya wa ku kwetsima wa Yehovha wu hundzise ku yini ka mina wu ta vulavula na wena?”+ 25 Mikaya a ku: “U ta swi tiva swaku wu ku hundzise ku yini siku leli u nga ta ya nghena Ka Ndhawu Ya Ku Kwetsima Hintamu u ya tumbela.” 26 Se hosi ya Israyele yi ku: “Tekani Mikaya mi famba na yena ka Amoni murhangeli wa doropa ni ka Yowaxi n’wana wa hosi. 27 Mi va byela mi ku: ‘Hosi yi li: “Pfalelani wanuna lweyi adjele,+ mi mu nyika pawu lalitsongo ni mati yamatsongo, anze ni vuya hi ku rhula.”’” 28 Kambe Mikaya a ku: “Loko wo vuya hi ku rhula, Yehovha a ta va a nga vulavulanga na mina.”+ A tlhela a ku: “Hinkwenu ma swi twa.”
29 Se hosi ya Israyele na Yehoxafati hosi ya Yuda va ya Ramoti-Jiliyadi.+ 30 Hosi ya Israyele yi byela Yehoxafati yi ku: “Ni ta yendla swaku va nga ni tivi naswona ni ta ya nyimpini, kambe wena yambala mpahla ya wena ya wuhosi.” Kutani hosi ya Israyele yi yendla swaku va nga yi tivi,+ yi famba nyimpini. 31 Kambe hosi ya Siriya a yi byele 32 wa varhangeli va tinyolo* ta yona yi ku:+ “Mi nga lwi ni munhu mun’wani hambi a li wamutsongo kumbe a li wamukulu kambe lwanani ni hosi ya Israyele ntsena.” 32 Hi ku hantlisa nkama varhangeli va tinyolo va nga vona Yehoxafati, va tibyela va ku: “Leyi hi yona hosi ya Israyele.” Se va mu landza va ya lwa na yena; Yehoxafati a gama a huwelela a kombela ku pfuniwa. 33 Nkama varhangeli va tinyolo va nga vona swaku a ku nga li yona hosi ya Israyele, va vhela va mu tshika.
34 Kambe wanuna mun’wani a txopa mpaxwa* hi ligubu la yena, wu fika wu tlhava hosi ya Israyele lani muzimbha wa yena a wu nga mbhonyiwanga hi mpahla ya yena ya nyimpi ya ku yendliwa hi swinsimbani. Se hosi yi byela lweyi a a fambisa nyolo ya yona yi ku: “Djikisa nyolo u ni humesa nyimpini, hikusa ni vavisiwe hintamu.”+ 35 Siku lolelo hinkwalu nyimpi yi tama yi lwiwa, hosi ya Israyele va yi khigetelisa ka nyolo na yi txuvukane ni Vasiriya. Ngati leyi a yi humetela ka xilondza yi halakela ndzeni ka nyolo ya nyimpi, hosi yi gama yi fa madlambu wolawo.+ 36 Nkama dlambu a li ya ku peleni, ku twakala rito lani a va gwimbe kona matende, li huwelela li ku: “Mun’wani ni mun’wani a a tlhele ka doropa la yena! Mun’wani ni mun’wani a a tlhele ka tiko la yena!”+ 37 A hosi yi fisa swoleswo, va gama va yi yisa Samariya; va fika va yi lahla kona. 38 A nkama a va hlampsa nyolo ya nyimpi ka mati lawa a ma li Samariya, timbyana ti nampsela ngati ya hosi, naswona tinghwavani a ti li ku hlambeni kolanu,* hi ku ya hi leswi Yehovha a nga swi hlaya.+
39 Timhaka hinkwatu ta wutomi la Akabu ni hinkwaswu leswi a nga swi yendla ku patsa ni yindlo leyi a nga yi yaka hi matinyu ya tindlopfu+ ni madoropa lawa a nga ma yaka, swi tsaliwile ka buku leli vulavulaka hi wutomi la tihosi ta Israyele. 40 Akabu a lahliwa lani vavhovho va yena va nga lahliwa kona;+ Akaziya+ n’wana wa yena a va hosi.
41 Yehoxafati+ n’wana wa Asa a ve hosi ya Yuda hi lembe la wu 4 la ku fuma ka Akabu hosi ya Israyele. 42 Yehoxafati a a li ni 35 wa malembe nkama a nga va hosi naswona a fume 25 wa malembe aYerusalema. Vito la mamani wa yena a ku li Azuba n’wana wa Xilihi. 43 A tame a yendla hinkwaswu leswi a swi yendliwa hi papayi wa yena Asa+ naswona a nga tshikanga ku swi yendla; a yendlele Yehovha minchumu yayinene.+ Kambe tindhawu ta ku tlakuka leti a ku gandzeliwa ka tona a ti susiwanga naswona vanhu a va yendla magandzelo va tlhela va yendla swaku ximusi xa magandzelo wolawo xi ya ka swikwembu swa vona.+ 44 Yehoxafati ni hosi ya Israyele a va twanana.+ 45 Timhaka hinkwatu ta wutomi la Yehoxafati, mintirho ya yena ni tinyimpi leti a nga ti lwa, swi tsaliwile ka buku leli vulavulaka hi wutomi la tihosi ta Yuda. 46 A suse vavanuna lava a va yendla wunghwavani ka tindhawu leti a ku gandzeliwa ka tona atikweni,+ leti a ti salile hi nkama wa ku fuma ka papayi wa yena Asa.+
47 Hi nkama wolowo a ku nga na hosi aEdomu;+ a ko va ni adiminixtradori lweyi a a yendla ntirho lowu a wu yendliwa hi hosi.+
48 Se Yehoxafati a hlaye swaku maboti ya Tarxixi a ma ye Ofiri ma ya teka woru,+ kambe a ma yanga hikusa ma tshovekile aEziyoni-Yeberi.+ 49 Ku ve hi nkama wolowo Akaziya n’wana wa Akabu a nga byela Yehoxafati a ku: “Vatirhi va mina a va fambe ni vatirhi va wena hi maboti,” kambe Yehoxafati a nga pfumelanga.
50 Yehoxafati a gama a fa, a lahliwa lani vavhovho va yena+ va nga lahliwa kona ka Doropa la Davhida vhovho wa yena; se Yehorama+ n’wana wa yena a va hosi.
51 Akaziya+ n’wana wa Akabu a ve hosi ya Israyele aSamariya hi lembe la wu 17 la ku fuma ka Yehoxafati hosi ya Yuda; a fume malembe mambirhi aIsrayele. 52 A a tshamela ku yendlela Yehovha swa ku biha, ku fana ni papayi wa yena,+ mamani wa yena+ na Yerobuwamu n’wana wa Nebati, lweyi a nga yendla swaku Vayisrayele va djoha.+ 53 A tame a gandzela Bali+ a tlhela a mu khizamela, a tshamela ku kwatisa Yehovha Xikwembu xa Israyele+ ku fana ni leswi nga yendliwa hi papayi wa yena.