Mahungu Ya Ku Tsakisa Ya Ku Tsaliwa Hi Matewu
7 “Tshikani ku yavanyisa+ van’wani leswaku mi nga yavanyisiwi; 2 hikusa leswi mi va yavanyisisaka swona van’wani, na n’wina mi ta yavanyisiwa xiswona;+ naswona leswi mi va khomisaka swona van’wani, na n’wina mi ta khomisiwa swoleswo.*+ 3 Kutani hi mhaka muni u txuvuka xilavi lexi nga ka tihlo la makwenu, kambe u nga swi koti ku vona pulangu* leli nga ka tihlo la wena ke?+ 4 Kumbe u nga mu byelisa ku yini makwenu u ku: ‘Ni tshiki ni susa xilavi lexi nga ka tihlo la wena,’ kuve ku ni pulangu ka tihlo la wena ke? 5 Mukanganyisi ndziwena! Rhanga hi ku susa pulangu leli nga ka tihlo la wena, se hi kona u nga ta kota ku susa xilavi lexi nga ka tihlo la makwenu.
6 “Mi nga nyiki timbyana swilo swa ku kwetsima, hambi ku hoxa maperola ya n’wina ka makhumba,+ hikusa ma ta ma psanyetela ma tlhela ma mi djikela ma mi vavisa.
7 “Tamani mi kombela, mi ta nyikiwa;+ tamani mi lava, mi ta swi kuma; tamani mi gongondza, mi ta pfuleliwa.+ 8 Hikusa lweyi a kombelaka a ta nyikiwa,+ lweyi a lavaka a ta swi kuma naswona lweyi a gongondzaka a ta pfuleliwa. 9 Kunene, i mani xikarhi ka n’wina lweyi loko n’wana wa yena a kombela pawu, a nga mu nyikaka ribye ke? 10 Kumbe loko a kombela hlampfi, a nga mu nyikaka nyoka ke? 11 Se loko n’wina hambileswi mi nga vadjohi, mi swi kotaka ku nyika vana va n’wina minchumu yayinene, Papayi wa n’wina lweyi a nga matilweni a nge va nyiki hi ku tlulisa+ lava mu kombelaka ke?+
12 “Kutani hinkwaswu leswi mi lavaka swaku van’wani va mi yendlela swona, na n’wina mi fanele mi va yendlela.+ Hikusa leswi, hi swona leswi djondzisiwaka hi Nawu ni Vaprofeta.+
13 “Nghenani hi nyanghwa wawutsongo,+ hikusa nyanghwa lowu yisaka ku helisiweni i wukulu ni ndlela ya kona yi pfulekile, naswona i vanyingi lava nghenaka hi wona; 14 kasi a nyanghwa lowu yisaka wuton’wini wu lalile ni ndlela ya kona yi kamanile, naswona i vatsongo lava va yi kumaka.+
15 “Tivoneleni ka vaprofeta va mavunhwa+ lava taka ka n’wina na va yambale xikhumba xa nyempfu,+ kuve hi ndzeni i mahlolwa* lawa ma kakatlulaka.+ 16 Mi ta va tiva hi leswi va swi yendlaka.* A swi nge koteki swaku vanhu va khaya mawuvha kumbe makuwa ka mimintwa, a hi swona ke?+ 17 Hi ku fanana, nsinya wawunene wu psala mihandzu yayinene, kambe nsinya wa ku bola wu psala mihandzu ya ku bola.+ 18 Nsinya wawunene a wu nge psali mihandzu ya ku bola, hambi nsinya wa ku bola a wu nge psali mihandzu yayinene.+ 19 Nsinya lowu kalaka wu nga psali mihandzu yayinene wa tsemiwa wu txukumetiwa ka ndzilu.+ 20 Se a vanhu volavo mi ta va tiva hi leswi va swi yendlaka.+
21 “A hi vanhu hinkwavu lava ni vitanaka va ku: ‘Hosi, Hosi,’ lava nga ta nghena ka Mfumu wa matilo, kambe ku ta nghena ntsena lava yendlaka ku rhandza ka Papayi wa mina lweyi a nga matilweni.+ 22 Hi siku lolelo va ku tala va ta ku: ‘Hosi, Hosi,+ a hi profetanga hi vito la wena, hi hlongola madimoni hi vito la wena ni ku yendla masingita ya manyingi hi vito la wena ke?’+ 23 Kutani hi nkama wolowo ni ta va byela ni ku: ‘A ni zanga ni mi tiva! Sukani lani ka mina, n’wina vadjohi.’+
24 “Hi mhaka leyo, lweyi a twaka leswi ni swi vulaka a gama a swi yendla a ta fanisiwa ni wanuna wa ku tlhariha, lweyi a nga yaka yindlo ya yena henhla ka ribye.+ 25 Kutani loko ku na mpfula, ku ta tindhambi ni moya wawukulu swi ba yindlo yoleyo, yi nga wi, hikusa a yi yakiwe henhla ka ribye. 26 Kambe lweyi a twaka leswi ni swi hlayaka a gama a nga swi yendli, a ta fanisiwa ni wanuna wa xiphunta, lweyi a nga yaka yindlo ya yena ka misava.+ 27 Se loko ku na mpfula, ku ta tindhambi ni moya wawukulu swi ba yindlo yoleyo+ kutani yi wa, naswona ku wa ka yona ku va kukulu swinene.”
28 Loko Yesu a gama ku vula leswo, vanhu va hlamala madjondzisela ya yena;+ 29 hikusa a a nga djondzisi ku fana ni vatsali;+ leswi a a swi djondzisa a swi ta hi ka Xikwembu.