Mahungu Ya Ku Tsakisa Ya Ku Tsaliwa Hi Luka
20 Siku lin’wani na Yesu a ha djondzisa vanhu tempeleni ni ku chumayela mahungu ya ku tsakisa, vaprista vavakulu, vatsali ni madoda va mu tela 2 va fika va ku: “Hi byeli: Ma ta hi kwini matimba lawa u yendlaka hi wona swilo leswi? Kumbe i mani lweyi a nga ku nyika matimba ya kona?”+ 3 Se a va hlamula a ku: “Na mina ni ta mi vutisa xivutiso; ni hlamuleni: 4 Yohani a a rhumiwe hi mani ku tsakamisa vanhu? Hi Xikwembu* kumbe hi vanhu?”* 5 Kutani va sungula ku bula hi xivona va ku: “Loko hi ku: ‘A a rhumiwe hi Xikwembu,’ a ta ku: ‘Se hi mhaka muni mi nga pfumelanga ka yena?’ 6 Kambe loko hi ku: ‘A a rhumiwe hi vanhu,’ vanhu va ta hi ba hi maribye, hikusa vanhu va kholwa swaku Yohani a a li muprofeta.”+ 7 Kutani va vula swaku a va swi tivi swaku a rhumiwe hi mani. 8 Se Yesu a ku: “Na mina a ni nga ta mi byela lweyi a nga ni nyika matimba ya ku yendla swilo leswi.”
9 Kutani a sungula ku byela vanhu xifaniso a ku: “A ku ni munhu lweyi a nga byala mawuvha+ ka nsimu ya yena kutani a yendla ntwananu* ni varimi van’wani swaku va yi hlayisa, a gama a yendza a ya ka tiko la le kule hi nkama wa ku leha.+ 10 Hi nkama wa ku tshovela, a rhuma mutirhi wa yena ka varimi, leswaku va ya mu nyika mihandzu yin’wani ka nsimu ya mawuvha. Se varimi va mu ba va mu tlhelisa na a nga na nchumu.+ 11 Kambe a tlhela a rhuma mutirhi mun’wani. Na yena va mu ba, va mu danisa, va mu tlhelisa na a nga na nchumu. 12 A tlhela a rhuma mutirhi wa wunharhu; na yena va mu ba va tlhela va mu hlongola. 13 Kutani n’winyi wa nsimu ya mawuvha a ku: ‘Se ni ta ku yini? Ni ta rhuma n’wana wa mina lweyi ni mu rhandzaka.+ Devhi va ta mu hlonipha.’ 14 Nkama varimi va nga mu vona, va sungule ku byelana va ku: ‘Hi lweyi a nga ta sala ni tshomba. A hi mu dlayeni, leswaku hi ta teka nsimu.’* 15 Se va mu txukumeta handle ka nsimu ya mawuvha, kutani va mu dlaya.+ Se n’winyi wa nsimu ya mawuvha a ta va yendla yini ke? 16 A ta fika a dlaya varimi volavo, a teka nsimu a yi nyikela ka van’wani.”
Nkama va nga twa leswo va ku: “Swi nga tshuki swi yendleka leswo!” 17 Kambe a va txuvuka a ku: “Se ma vula yini marito lama nge: ‘Ribye leli vayaki va nga li yala, hi lona leli nga yendliwa ribye la lisima hintamu’?*+ 18 Lweyi a nga ta wela ka ribye lelo a ta pshandlaseka.+ Kasi lweyi li nga ta mu wela, li ta mu pshandlasa.”
19 Vatsali ni vaprista vavakulu a va swi lava ku mu khoma hi nkama wolowo, kambe a va chava vanhu, hikusa a va swi tiva swaku a a vula vona ka xifaniso lexi.+ 20 Loko se va mu kambisisile, va rhumele vanhu lava nga va thola xihundleni swaku va tiyendla ingaku va lulamile, leswaku va ya zama ku mu phasa hi leswi a a ta swi vula,+ kuva va ta mu yisa ka wuhosi ni ka govhernadori. 21 Kutani va mu vutisa va ku: “Mudjondzisi, ha swi tiva swaku u vulavula u tlhela u djondzisa swa ku lulama naswona a wu na xikheto kambe u djondzisa ntiyiso hi Xikwembu: 22 Swa pfumeleliwa ku hakela rhesa* ka Khezari kumbe a swi pfumeleliwi?” 23 Kambe hi ku tiva swaku va lava ku mu phasa, a va hlamula a ku: 24 “Ni kombeni denari.* Yi ni xifaniso ni marito ya mani ke?” Va ku: “Khezari.” 25 A va byela ku: “Kutani, tlhelisani swa Khezari ka Khezari,+ kambe swa Xikwembu ka Xikwembu.”+ 26 Va tsandzekile ku mu phasa hi marito ya yena phambheni ka vanhu, kambe nhlamulu ya yena yi va hlamalisile va za va miyela va ku whii!
27 Kutani Vasaduki van’wani lava kholwaka swaku vafi a va nga ta pfuxiwa,+ va ta ka Yesu va fika va mu vutisa va ku:+ 28 “Mudjondzisi, Moxe a hi tsalele a ku: ‘Loko wanuna a fa na a nga na vana naswona a siya nsati, makwavu wa mufi a fanele a chada ni wansati yelweyo wa ku feliwa hi nuna, leswaku a pfuxa ndjangu wa makwavu wa yena lweyi a nga fa.’+ 29 Se a mhaka hi leyi: A ku ni 7 wa vamakwavu; wa matevula a chadile a gama a fa na a nga na vana. 30 Swi yendlekisa swoleswo ni ka wa wumbirhi, 31 kutani wa wunharhu a mu chada. Swi yendlekisa swoleswo ni ka lavan’wani hinkwavu va 7; va fe na va nga na vana. 32 Hi wugamu, na yena wansati a fa. 33 Se loko vafi va ta pfuxiwa, a ta va nsati wa mani ke? Hikusa hinkwavu va 7 va mu chadile.”
34 Yesu a va hlamula a ku: “Vanhu va misava leyi va chada va tlhela va chadiwa, 35 kambe lava Xikwembu xi nga ta va pfuxa ni ku va pfumelela ku hanya ka nkama wolowo a va nge he chadi kumbe ku chadiwa.+ 36 Ntiyiso hi leswaku a va nge he fi hikusa va fana ni tintsumi, naswona i vana va Xikwembu hileswi va nga ta pfuxiwa ku feni. 37 Kambe hambi Moxe a swi kombisile ka mhaka ya xinsinyani xa mintwa swaku lava nga fa va ta pfuxiwa, loko a vula swaku Yehovha* i ‘Xikwembu xa Abrahamu, xa Izaki ni xa Yakobe.’+ 38 A hi Xikwembu xa lava nga fa, kambe i xa lava hanyaka, hikusa ka xona hinkwavu va hanya.”+ 39 Vatsali van’wani va ku: “Mudjondzisi, u vulavule kahle.” 40 A va ha vanga na wona ntamu wa ku mu vutisa xivutiso xin’wani.
41 Kutani a va vutisa a ku: “Se ina ka, hi mhaka muni va vula swaku Kreste i n’wana wa Davhida?+ 42 Hikusa Davhida a vule leswi ka buku ya Tipisalema: ‘Yehovha* a byela Hosi ya mina a ku: “Tshama ka voko la mina la xinene 43 anze ni veka valala va wena hansi ka minkondzo ya wena.”’+ 44 Loko Davhida a mu vitana Hosi, se i n’wana wa yena hi mhaka muni?”
45 Nkama vanhu hinkwavu a va mu yingisela, a byele vadjondzisiwa va yena a ku: 46 “Tivoneleni ka vatsali lava rhandzaka ku famba na va yambale timpahla ta ku leha, lava rhandzaka ku xowetiwa mabazara ni switshamu swa lisima ka masinagoga,* ni ku tshama ka tindhawu leti nga vekeliwa vanhu va ku hlonipheka lomu mafexteni,+ 47 ni lava tekaka tiyindlo* ta vavasati lava nga feliwa hi vanuna va vona naswona va rhandzaka ku yendla swikhongelo swa ku leha leswaku va ta voniwa hi vanhu. Va ta khatisiwa hi ndlela ya ku vava swinene.”