Yoxuwa

1 Loko Moxe mutirheli wa Yehovha a file, Yehovha a byele Yoxuwa*+ n’wana wa Nuni, lweyi a a li mupfunisi+ wa Moxe a ku: 2 “Moxe mutirheli wa mina se a file.+ Swoswi tilunghiseleli swaku u tsemakanya Yordani, wena ni vanhu lava hinkwavu, mi nghena ka tiko leli ni nga ta li nyika Vayisrayele.+ 3 Ni ta mi nyika ndhawu yin’wani ni yin’wani leyi mi nga ta hundza hi ka yona, hilani ni nga tshembisa Moxe.+ 4 Tiko leli ni nga ta mi nyika lona li ta sukela mananga li ya fika Lebanoni ni ku ya fika ka nambu wawukulu wa Ewufrata, tiko hinkwalu la Vaheti+ ni ku ya fika awupeladlambu ka Lwandle Lalikulu.*+ 5 U ta hlula vanhu hinkwavu lava va nga ta lwa na wena, ni ta va na wena+ ku fana ni leswi ni nga va na Moxe, a ni nge tshuki ni ku tshika+ kumbe ni ku tsukula.+ 6 U nga chavi, tiya nhlana,+ hikusa hi wena u nga ta yendla swaku vanhu lava va kuma tshomba la tiko leli ni nga funga ku li nyika vavhovho va vona.+

7 “Phela u nga chavi, tiya nhlana, u yingisa Nawu hinkwawu lowu Moxe mutirheli wa mina a nga ku nyika wona. U nga djiki u ya ka xinene kumbe ka ximatsi,+ leswaku u ta yendla swilo hi wutlharhi hinkwaku lomu u yaka kona.+ 8 Buku leli la Nawu li nga suki ka nomo wa wena+ naswona li lerhi hi rito la le hansi* wusiku ni nhlikanhi, leswaku u ta yendla hinkwaswu leswi nga tsaliwa ka lona;+ se loko u yendla leswo swi ta ku fambela kahle naswona u ta tlhariha.+ 9 Kasi a ni ku byelanga swaku u nga chavi, tiya nhlana? U nga rhurhumeli kumbe u chava, hikusa mina Yehovha Xikwembu xa wena ni ta va na wena hinkwaku lomu u yaka kona.”+

10 Se Yoxuwa a rhuma varhangeli a ku: 11 “Fambani ka matende hinkwawu mi byela vanhu mi ku: ‘Lulamiselani swakudla hikusa ku yo sala masiku manharhu swaku mi tsemakanya Yordani, swaku mi teka tiko leli Yehovha Xikwembu xa n’wina a mi nyikaka lona swaku li va la n’wina.’”+

12 Kutani Yoxuwa a byela va ka Rubeni, va ka Gadi ni hafu ya va ka Manasi a ku: 13 “Khumbukani leswi Moxe mutirheli wa Yehovha a nga mi byela swona a ku:+ ‘Yehovha Xikwembu xa n’wina a mi nyika tiko leli leswaku mi ta tshama ka lona hi ku rhula. 14 Vasati va n’wina, vana va n’wina ni swifuyu swa n’wina, mi ta swi siya ka tiko leli Moxe a nga mi nyika lona ka tlhelo* leli la Nambu wa Yordani,+ kambe n’wina hinkwenu mi nga masonchwa,+ tsemakanyani nambu mi famba ni vamakwenu va n’wina+ na mi tilulamisele ku lwa nyimpi; va pfuneni 15 anze Yehovha a yendla swaku vamakwenu va n’wina va hanya hi ku rhula ku fana na n’wina, kutani na vona va teka tiko leli Yehovha Xikwembu xa n’wina a nga ta va nyika lona. Se mi ta gama mi tlhela ka tiko leli mi nga nyikiwa swaku mi tshama ka lona ku nga tiko leli Moxe mutirheli wa Yehovha a nga mi nyika lona ka tlhelo la le wuxeni la Yordani.’”+

16 Va hlamula Yoxuwa va ku: “Hinkwaswu leswi u nga hi byela hi ta swi yendla naswona hi ta ya hinkwaku lomu u nga ta hi rhuma kona.+ 17 Hi ta ku yingisa ku fana ni leswi hi nga yingisa hinkwaswu leswi Moxe a nga hi byela. Hi navela swaku Yehovha Xikwembu xa wena a va na wena ku fana ni leswi a a na Moxe.+ 18 Vanhu hinkwavu lava terekelaka minawu ya wena va tlhela va nga swi yingisi leswi u va byelaka swona, va ta dlayiwa.+ Phela u nga chavi, tiya nhlana.”+