Yobo
40 Yehovha a tama a hlamula Yobo a ku:
2 “Lweyi a lavetelaka swihoxo a nga phikizana ni Lweyi Wa Matimba Hinkwawu?+
Lweyi a solaka Xikwembu a a hlamuli.”+
3 Yobo a hlamula Yehovha a ku:
4 “Phela a ni wa nchumu.+
Ni nga ku hlamula ni ku yini?
Ni veka voko la mina ka nomo wa mina.+
5 Ni vulavule kan’we kambe a ni nge he hlamuli;
Ni vulavule kambirhi, kambe a ni nge he hlayi nchumu.”
6 Kutani Yehovha a hlamula Yobo na a li ka xidzedze a ku:+
7 “Ni kombela u lungheka ku fana ni wanuna;
Ni ta ku vutisa, wena u ni hlamula.+
8 Indjhe u nga solasola ku lulama ka mina?
Kumbe u nga hlaya swaku ni munhu lweyi a yendlaka swa ku biha swaku wena u ta va wa ku lulama?+
9 U ni voko la matimba la ku fana ni la mina Xikwembu xa ntiyiso,+
Kumbe, rito la wena li nga dzindza ku fana ni la mina?+
10 Ni kombela u kombisa swaku u ni matimba ni ntamu;
Kombisa swaku u mukulu funtshi u faneliwa hi ku hloniphiwa.
11 Chulula ku kwata ka wena;
Txuvuka hinkwavu lava tibyelaka, u gama u va veka hansi.
12 Txuvuka hinkwavu lava tibyelaka, u va danisa,
Psanyetela lava yendlaka swa ku biha lani va nga kona.
13 Hinkwavu va tumbeti hansi ka misava;
Va pfaleli ka ndhawu leyi nga fihleka,
14 Kutani ni ta pfumela
Swaku voko la wena la xinene li nga ku ponisa.
15 Hi leyi Mpfuvu* leyi ni nga yi yendla ku fana na wena.
Yi dla byanyi ku fana ni homu.
16 Vona matimba lama nga ka minenge* ya yona,
Ni matimba ya tinyama leti nga ka khwirhi la yona.
17 Yi tiyisa ntxila wa yona ku fana ni nsinya wa mukedari;
Minsiha ya minenge* ya yona yi bohelelanile.
18 Marhambu ya yona i matubu ya kobre;
Mavoko ni minenge ya yona ma fana ni tinsimbi.
19 Ka mintirho ya Xikwembu hi yona yi rhangaka phambheni;
Lweyi a nga yi yendla hi yena ntsena a nga yi yelaka na a khome xipada.
20 Hikusa tintshava ti yi milisela swakudla,
Lani swiharhi hinkwaswu swi tlangaka kona.
21 Yi yetlela hansi ka nsinya wa lotasi,
Ka ndzhuti wa nhlanga lowu nga ka mati.
22 Minsinya ya lotasi yi yi yendlela ndzhuti,
Ku ni minsinya ya maxupu* amatlhelweni ka yona.
23 A yi chavi hambiloko nambu wu kwatile.
A yi chavi hambiloko nambu wa Yordani+ wu talile hintamu.
24 A kona lweyi a nga yi khomaka na yi mu txuvukile?
Kumbe a yi boxa nhompfu hi ndzovo?*