Ezekiyele

14 Kutani madoda man’wani ya Vayisrayele ma ta ka mina ma fika ma tshama hansi phambheni ka mina.+ 2 Se Yehovha a vulavula na mina a ku: 3 “N’wana wa munhu, vavanuna lava va tinyimisele ku gandzela swifaniso swa vona swa ku nyenyentsa* naswona va veke ntlhamu lowu yendlaka swaku vanhu va djoha. Ni fanele ni va yingisa loko va ni lavetela?+ 4 Swoswi va byele u ku: ‘Yehovha Hosi Leyikulu a li: “Loko Muyisrayele a tinyimisela ku gandzela swifaniso swa yena swa ku nyenyentsa naswona a veka ntlhamu lowu yendlaka swaku vanhu va djoha, a gama a ya vutisa ka muprofeta, mina Yehovha ni ta mu hlamula hi ku ya hi ku tala ka swifaniso swa yena swa ku nyenyentsa. 5 Ni ta yendla swaku timbilu ta Vayisrayele hinkwavu ti chava, hikusa va ni tshikile funtshi va gandzela swifaniso swa vona swa ku nyenyentsa.”’+

6 “Kutani byela Vayisrayele u ku: ‘Yehovha Hosi Leyikulu a li: “Vuyani, mi tshika swikwembu swa n’wina swa ku nyenyentsa naswona mi tshika mintirho ya n’wina hinkwayu ya ku nyenyentsa.+ 7 Hikusa loko Muyisrayele kumbe munhu lweyi a taka hi ka tiko lin’wani a ni tshika kutani a tinyimisela ku gandzela swifaniso swa yena swa ku nyenyentsa naswona a veka ntlhamu lowu yendlaka leswaku vanhu va djoha a gama a ya vutisa muprofeta wa mina,+ mina Yehovha ni ta mu hlamula. 8 Ni ta lwa na yena munhu yelweyo, ni yendla swaku a va xikombiso ni xipoyilo funtshi ni ta mu susa xikarhi ka vanhu va mina;+ kutani mi ta swi tiva swaku hi mina Yehovha.”’

9 “‘Kambe loko muprofeta yelweyo o xengiwa a za a hlamula, ku ta va ku li mina Yehovha ni nga mu xenga.+ Ni ta lwa na yena ni mu helisa xikarhi ka vanhu va mina ku nga Vayisrayele. 10 Va ta boheka ku tshovela leswi va nga swi byala hi mhaka ya xidjoho xa vona; xidjoho xa lweyi a vutisaka xi ta fana ni xa muprofeta, 11 leswaku Vayisrayele va nga ha djiki ka tindlela ta mina naswona va tshika ku tichakisa hi swidjoho swa vona hinkwaswu. Va ta va vanhu va mina se mina ni ta va Xikwembu xa vona,’+ ku vula Yehovha Hosi Leyikulu.”

12 Yehovha a tlhela a vulavula na mina a ku: 13 “N’wana wa munhu, loko tiko lo ni djohela hi ku kala li nga tshembeki, ni ta lwa na lona funtshi ni ta yendla swaku li nga ha vi ni swakudla,+ ni ta rhumela ndlala ka tiko lolelo+ ni tlhela ni dlaya vanhu ni swifuyu leswi nga ka lona.”+ 14 “‘Hambiloko vavanuna lavanharhu ku nga Nowa,+ Daniyele+ na Yobo,+ a va li kona xikarhi ka lona, a ku to pona vona ntsena hi mhaka ya leswi va nga lulama,’+ ku vula Yehovha Hosi Leyikulu.”

15 “‘Kumbe a hi nge, ni rhumela swiharhi swa khwati leswi dlayaka swi hundza hi le tikweni swi dlaya vanhu* va kona se li va ndhawu leyi nga hohlokela ku nga ha hundzi munhu ka lona hi mhaka ya swiharhi swoleswo,+ 16 leswi ni hanyaka,’ ku vula Yehovha Hosi Leyikulu: ‘Hambiloko vavanuna lavanharhu a va li ka tiko lolelo, a va nga ta va ponisa vana va vona va madjaha kumbe va tintombhi; a ku to pona vona ntsena funtshi tiko hinkwalu a li ta va ndhawu ya ku hohlokela.’”*

17 “‘Kumbe a hi nge, ni tisa xipada ka tiko lolelo,+ ni gama ni ku: “Xipada a xi hundze hi le tikweni,” xi dlaya vanhu ni swifuyu,+ 18 hambiloko vavanuna lavanharhu a va li kona ka tiko lolelo, leswi ni hanyaka,’ ku vula Yehovha Hosi Leyikulu: ‘A va nga ta va ponisa vana va vona va madjaha kumbe va tintombhi; a ku to pona vona ntsena.’”

19 “‘Kumbe a hi nge ni rhumela ntungu ka tiko lolelo+ naswona ni chulula ku kwata ka mina henhla ka lona hi ku dlaya vanhu ni swifuyu, 20 hambiloko Nowa,+ Daniyele+ na Yobo+ a va li kona ka tiko lolelo, leswi ni hanyaka,’ ku vula Yehovha Hosi Leyikulu: ‘A va nga ta va ponisa vana va vona va madjaha kumbe va tintombhi; a ku to pona vona ntsena hi mhaka ya ku lulama ka vona.’”+

21 “Yehovha Hosi Leyikulu a li: ‘Swi ta yendlekisa swoleswo nkama ni nga ta rhumela 4 wa makhombo ya ku va khatisa* hi wona,+ ku nga xipada, ndlala, swiharhi swa khwati leswi dlayaka, khombo ni ntungu+ leswaku ni dlaya vanhu ni swifuyu ka doropa la Yerusalema.+ 22 Kambe vana va madjaha ni va tintombhi lava nga ta sala va ta pona va tlhela va humesiwa ka lona.+ Va mi tela naswona nkama mi nga ta vona tindlela ta vona ni mintirho ya vona, mi ta tiyisiwa ka khombo leli ni nga li tisa ka doropa la Yerusalema, ka hinkwaswu leswi ni nga swi yendla ka lona.’”

23 “‘Va ta mi tiyisa nkama mi nga ta vona tindlela ta vona ni mintirho ya vona naswona mi ta swi tiva swaku a ni ni xivangelo nkama ni nga yendla leswi a ni fanele ni swi yendla ka lona,’+ ku vula Yehovha Hosi Leyikulu.”