Mahungu Ya Ku Tsakisa Ya Ku Tsaliwa Hi Luka
2 Ka masiku wolawo, Khezari Auguxtu a humesa nawu wa leswaku vanhu hinkwavu va ya titsalisa. 2 (Loku a ku li ku tsalisiwa ka ku sungula loku nga yendleka hi nkama lowu Kirinu a a li govhernadori wa Siriya.) 3 Vanhu hinkwavu va ye va ya titsalisa lomu va nga psaliwa kona. 4 Na yena Yosefa+ a suke aGalileya, ka doropa la Nazareta, a ya Yudiya, ka doropa la Davhida leli vitaniwaka Betlehema,+ hikusa a a li wa ndjangu wa Davhida. 5 A fambe a ya titsalisa na Mariya, lweyi a a chade na yena hilani a va tshembisane hi kona+ naswona Mariya a a li kusuhi ni ku psala.*+ 6 Na se va li koseniyani, nkama wa yena wa ku psala wu fika. 7 Kutani a psala n’wana wa yena wa djaha wa matevula,+ a mu phutsela hi tipanu a mu yetlelisa ka ndhawu leyi swiharhi a swi dlela ka yona,+ hikusa ka tiyindlo ta vayendzi a ku talile.
8 Ka ndhawu yoleyo a ku ni valusi lava a va tshama handle ka doropa na va vonelela tinyempfu ta vona niwusiku. 9 Na va nga swi nyimelanga, ntsumi ya Yehovha* yi nyima phambheni ka vona, va voningeliwa hi ku phatima ka Yehovha* kutani va sungula ku chava hintamu. 10 Kambe ntsumi yi ku: “Mi nga chaveni! Yingisani, ni tela ku ta mi byela mahungu ya ku tsakisa lama nga ta va tsakisa hintamu vanhu hinkwavu. 11 Hikusa namuntlha mi psaleliwe muponisi+ ka doropa la Davhida,+ lweyi a nga Kreste Hosi.+ 12 Mi ta mu tivisa leswi: Mi ta kuma n’wana na a phutseliwe hi tipanu, a yetlelisiwe ka ndhawu leyi swiharhi swi dlelaka ka yona.” 13 Hi ku hantlisa, ku humelela tintsumi tin’wani ta tinyingi ti nyima ni ntsumi leyin’wani,+ ti dzunisa Xikwembu ti ku: 14 “Dzunisani Xikwembu lexi nga matilweni, naswona a ku ve ni ku rhula ka lava xi va rhandzaka misaveni.”
15 Nkama tintsumi ti nga tlhela ti ya tilweni, valusi va sungule ku byelana va ku: “A hi fambeni Betlehema, hi ya vona leswi nga yendleka hi ku ya hi leswi Yehovha* a nga hi byela swona.” 16 Kutani va famba hi xihantla va ya kuma Mariya, Yosefa ni n’wana na a yetlelisiwe ka ndhawu leyi swiharhi swi dlelaka ka yona. 17 Nkama va nga swi vona, va vule leswi ntsumi yi nga va byela swona hi n’wana lweyi. 18 Hinkwavu lava nga twa leswi valusi va nga swi vula, va hlamala, 19 kambe Mariya a sungula ku vekisa marito lawa hinkwawu,+ na a pimisa hi leswi ma vulaka swona. 20 Kutani valusi va tlhelela lomu tinyempfu ta vona a ti li kona, na va khensa Xikwembu ni ku xi dzunisa hi mhaka ya leswi va nga swi twa ni ku swi vona, hi ku ya hi leswi va nga byeliwa swona.
21 Hi siku la wu 8, n’wana a tsemiwa nsuvu,*+ kutani a chuliwa vito la Yesu, ku nga vito leli nga vuliwa hi ntsumi na mamani wa yena a nge se va ni nyimba.+
22 Naswona loko ku fika nkama wa leswaku va basisiwa hi ku landza Nawu wa Moxe,+ va mu yise Yerusalema leswaku va ta mu nyikela ka Yehovha,* 23 hi ku ya hi leswi swi nga tsaliwa ka Nawu wa Yehovha* lowu nge: “N’wana mun’wani ni mun’wani wa xinuna lweyi a nga wa matevula* a fanele a nyikeliwa ka Yehovha.”*+ 24 Va humese magandzelo hi ku landza leswi nga vuliwa ka Nawu wa Yehovha:* “Matuva mambirhi kumbe swituvani swimbirhi.”+
25 A ku ni wanuna lweyi a a vitaniwa Simiyoni aYerusalema, lweyi a a lulamile naswona a a hlonipha Xikwembu; a a nyimele nkama lowu Xikwembu xi nga ta tiyisa Vayisrayele+ naswona a a ni moya wa ku kwetsima. 26 Hi ku tirhisa moya wa ku kwetsima, Xikwembu a xi mu byelile leswaku a nge fi na a nge se mu vona Kreste lweyi a nga langiwa hi Yehovha.* 27 Moya wa ku kwetsima wu mu yise tempeleni, hi nkama lowu vapsali va Yesu va nga ya va ya yendla leswi Nawu+ a wu lava swona, 28 a tlakule n’wana a gama a dzunisa Xikwembu a ku: 29 “Wena, Hosi Leyikulu, se ni mu vonile n’wana hi ku ya hi leswi u nga swi vula, se swoswi ni nga fa na ni tsakile,+ 30 hikusa se ni yi vonile ndlela leyi u nga ta ponisa hi yona+ 31 leyi u nga yi lunghiselela leswaku yi ta voniwa hi vanhu hinkwavu,+ 32 ku vonakala+ loku nga ta susa munyama matihlweni ya vamatiko,+ vanhu va wena ku nga Vayisrayele va ta dzunisiwa hi mhaka ya yena.” 33 Kutani papayi wa yena ni mamani wa yena va hlamalisiwa hi leswi a nga swi vula. 34 Se Simiyoni a va katekisa a tlhela a byela Mariya mamani wa n’wana a ku: “N’wana lweyi a langiwile leswaku a wisa+ ni ku pfuxa va ku tala aIsrayele+ ni ku va xikombiso lexi nga ta yaliwa+ 35 (kambe wena u ta tlhaviwa hi xipada xa ku leha),+ leswaku swi ta humesiwa handle leswi nga ka timbilu ta vanhu.”
36 A ku na Ana muprofeta wa xisati, n’wana wa Fanuwele, wa lixaka la Aseri. Wansati lweyi se a a gugile swinene, naswona nkama a nga chada a yo hanya 7 wa malembe ntsena ni nuna wa yena, 37 a a ni 84 wa malembe naswona a a feliwe hi nuna. A a nga kali tempeleni, a a yendla ntirho wa ku kwetsima wusiku ni nhlikanhi na a titsona swakudla, a tlhela a khongela. 38 A tile hi nkama wolowo a sungula ku dzunisa Xikwembu ni ku vulavula hi n’wana ka hinkwavu lava a va nyimele ku ponisiwa ka Yerusalema.+
39 Loko se va yendlile hinkwaswu hi ku ya hi Nawu wa Yehovha,*+ va tlhelele Galileya ka doropa la vona la Nazareta.+ 40 Kutani n’wana a kula a va ni matimba ni ku tala hi wutlharhi, naswona Xikwembu a xi mu pfuna.+
41 Lembe ni lembe, vapsali va yena a va tolovela ku ya Yerusalema ka fexta la Paxkwa.+ 42 Nkama a a ni 12 wa malembe, va ye Yerusalema hi ku ya hi leswi a va tolovele ku swi yendla.+ 43 Nkama fexta li nga hela va tlhelele kaya, kambe Yesu a sale Yerusalema na vapsali va yena va nga swi tivi. 44 Leswi a va pimisa swaku a a famba ni van’wani lava a va longoloka na vona, va fambe siku hinkwalu, se va sungula ku famba va mu lavetela xikarhi ka maxaka ni lava a va tolovelane na vona. 45 Kambe loko va nga mu kumi, va tlhelele Yerusalema va ya mu lavetela hinkwaku. 46 Na se ku hundze masiku manharhu, va mu kuma tempeleni na a tshame xikarhi ka vadjondzisi, na a va yingisela ni ku va vutisa swivutiso. 47 Hinkwavu lava a va mu yingisela a va hlamalisiwa hi ku twisisa ka yena ni tinhlamulu ta yena.+ 48 Nkama vapsali va yena va nga mu vona va hlamalile, se mamani wa yena a ku: “N’wananga, hi mhaka muni u hi yendle leswi? Mina ni papayi wa wena hi fambe hi ku lavetela na hi li ku karhatekeni swinene.” 49 Kambe a va hlamula, a ku: “A mi ni lavela yini? A mi nga swi tivi swaku ni fanele ni va ndlwini ka Papayi wa mina?”+ 50 Kambe a va swi twisisanga leswi a a va byela swona.
51 Se a muka na vona Nazareta, funtshi a a tama a va yingisa minkama hinkwayu.+ Naswona mamani wa yena a vekisa timhaka leti hinkwatu ambilwini ya yena.+ 52 Kutani Yesu a ya a kula, a va ni wutlharhi a tlhela a rhandziwa hi Xikwembu ni vanhu.