Nhlawutelo ya Yohani
14 Se ni txuvuka, kutani ni vona Xinyempfani+ na xi nyime ka Ntshava ya Siyoni;+ a xi ni 144.000+ wa vanhu lava nga tsaliwa vito la xona ni vito la Papayi wa xona+ ka swimombo swa vona. 2 Ni twe guwa leli taka hi le tilweni leli fanaka ni guwa la mati ya manyingi ni la ku dzindza kakukulu ka tilo; naswona guwa leli a ni li twa a li fana ni la vanhu lava yimbelelaka na va chaya ni tiharipa. 3 Va yimbelela lisimu leli twalaka ingaku i la nyuwani+ na va li phambheni ka xitshamu xa wuhosi, phambheni ka 4 wa makerubu+ ni le phambheni ka madoda,+ naswona a nga kona lweyi a a li tiva, a lo tiviwa ntsena hi lava 144.000+ lava nga xaviwa amisaveni. 4 Lava hi lava kalaka va nga tichakisanga hi vavasati; va basile.*+ Hi lava landzelaka Xinyempfani hinkwaku lomu xi yaka kona.+ Va xaviwe+ xikarhi ka vanhu leswaku va va mihandzu ya ku sungula+ ka Xikwembu ni ka Xinyempfani, 5 a va hembanga naswona a va na xa ku soliwa hi xona.+
6 Se ni vona ntsumi yin’wani na yi haha mpfhukeni, na yi ni mahungu ya ku tsakisa ya ku kala ma nga heli leswaku yi ma byela lava tshamaka misaveni, ku nga matiko hinkwawu, tinxaka hinkwatu, tirimi hinkwatu ni vanhu hinkwavu.+ 7 A yi huwelela yi ku: “Chavani Xikwembu mi xi dzunisa, hikusa nkama wa xona wa ku yavanyisa se wu fikile;+ kutani gandzelani Lweyi a nga yendla tilo, misava, lwandle+ ni swihlovo swa mati.”
8 Se ku landzela ntsumi yin’wani ya wumbirhi yi ku: “A wile!+ A wile Babilona Wamukulu,+ lweyi a nga phuzisa matiko hinkwawu vhinyu la wunghwavani* la yena!”+
9 Ku landzele ntsumi yin’wani ya wunharhu, yi huwelela yi ku: “Lweyi a nga ta gandzela xiharhi xa ku chavisa hintamu+ ni xifaniso xa xona ni ku pfumela ku markariwa ka ximombo kumbe ka voko la yena,+ 10 a ta phuza ni vhinyu la ku kwata ka Xikwembu leli cheliwaka ka kopo ya ku kwata ka xona na li nga timuliwanga,+ naswona a ta khatisiwa hi ndzilu lowu pfurhaka hintamu+ phambheni ka tintsumi ta ku kwetsima ni le phambheni ka Xinyempfani. 11 Kutani ximusi xa ku khatisiwa* ka hinkwavu lava gandzelaka xiharhi xa ku chavisa hintamu ni xifaniso xa xona ni lava nga ta markariwa hi vito la xona+ xi ta tuvika hi masiku ni masiku+ naswona a va nge humuli wusiku ni nhlikanhi. 12 Hi yona mhaka leyi vakwetsimi+ lava yingisaka minawu ya Xikwembu ni lava khomaka swi tiya ka lipfumelo+ la Yesu va faneleke va tiyisela.”
13 Ni tlhele ni twa rito na li ta hi tilweni li ku: “Tsala u ku: Va tsaka lava ku sukela swoswi ku ya phambheni va faka na va li vadjondzisiwa va Hosi.*+ Moya wa ku kwetsima wu vula swaku a va humule ka mintirho ya vona, hikusa Xikwembu xi ta khumbuka minchumu yayinene leyi va nga yi yendla.”
14 Se ni txuvuka, kutani ni vona rhefu la ku basa naswona lweyi a a tshame ka lona a a fana ni n’wana wa munhu;+ a a ni harhi* ya woru ka nhloko ya yena naswona a a khome sikelo* la ku lotiwa kahle.
15 Kutani ku humelela ntsumi yin’wani hi ka ndhawu leyi kwetsimaka ya le tempeleni, yi huwelela ka lweyi a nga tshama ka rhefu yi ku: “Humesa sikelo la wena u tshovela, hikusa se wu fikile nkama wa ku tshovela naswona ntshovelo wa misava wu wupfile.”+ 16 Se lweyi a nga tshama ka rhefu a humesa sikelo kutani a tshovela misava.
17 Ku humelele ntsumi yin’wani na yi huma hi ka ndhawu leyi kwetsimaka ya tempele leyi nga tilweni, na yona a yi khome sikelo la ku lotiwa kahle.
18 Naswona ku humelela ntsumi yin’wani hi ka altari leyi a yi ni matimba ya ku tirhisa ndzilu hinkwaku lomu yi ku lavaka. Yi huwelela ka lweyi a nga khoma sikelo la ku lotiwa kahle yi ku: “Humesa sikelo la wena la ku lotiwa kahle u tshovela mawuvha ya misava, hikusa se ma wupfile.”+ 19 Se ntsumi yi teka sikelo la yona yi tshovela mawuvha ya misava, kutani yi ma teka yi ma hoxa ka xikamelo* xaxikulu xa ku kwata ka Xikwembu.+ 20 Mawuvha ma psanyeteliwe handle ka doropa, lakakuva ngati leyi nga huma loko ma psanyeteliwa a yi li yinyingi hintamu yi za yi fika ni ka minomo ya makavhalu; mpfhuka wa kona a wu ringana kolomuyani ka 296 wa makilometru.*