Vaefeza

1 Mina Pawulo, mupostolo wa Kreste Yesu hi ku rhandza ka Xikwembu, ni tsalela vakwetsimi lava nga Efeza,+ lava tshembekaka, lava nga vadjondzisiwa va Kreste Yesu:

2 Timpsalu tatikulu ni ku rhula loku taka hi ka Xikwembu Papayi wa hina ni le ka Hosi Yesu Kreste a swi ve na n’wina.

3 A ku dzunisiwe Xikwembu, Papayi wa Hosi ya hina Yesu Kreste, hikusa na xi li kole matilweni, xi hi nyike minkateko ya yinyingi hi ku tirhisa moya wa ku kwetsima, hikusa hi vadjondzisiwa va Kreste.+ 4 Xi hi langile leswaku hi va ni wunghanu la le kusuhi na yena ka Mfumu wa le tilweni na misava yi nge se va kona, leswaku hi xi rhandza hi tlhela hi basa naswona hi nga soleki ka xona.+ 5 Hikusa xi hi langile khale+ leswaku hi va vana va xona+ hi ku tirhisa Yesu Kreste, hi ku ya hi leswi swi xi tsakisaka ni hi ku rhandza ka xona,+ 6 leswaku vanhu va ta xi dzunisa. Xi tirhise N’wana wa xona lweyi xi mu rhandzaka+ leswaku xi hi komba timpsalu ta xona tatikulu.+ 7 Ha chunsiwa hi nkutsulu hi mhaka ya N’wana wa xona naswona swidjoho swa hina swa rivaleliwa+ hi ngati ya yena.+ Vhela timpsalu leti ta ku hlamalisa ta Xikwembu i tikulu hintamu.

8 Xi hi chululele timpsalu ta xona tatikulu ku patsa ni wutlharhi hinkwalu ni ku twisisa* 9 hi ku hi tivisa xihundla xa ku kwetsima+ xa ku rhandza ka xona. Xihundla xolexo xi fambisana ni leswi xi swi tsakelaka naswona xi lava 10 ku tirhisa Kreste leswaku ku hlengeletiwa swilo hinkwaswu, swa le tilweni ni swa la misaveni,+ loko ku ta hela nkama lowu nga vekiwa. Hinkwaswu swi ta hlengeletiwa hi ku tirhisa Kreste, 11 lweyi hi twananaka na yena naswona hi nga vekiwa swaku hi dla tshomba na yena;+ hi langiwile khale hi ku ya hi leswi Xikwembu a xi swi lava; xona xi yendla minchumu hinkwayu hilaha xi swi lavisaka xiswona ni hi ku ya hi ku rhandza ka xona, 12 leswaku xi dzunisiwa xi tlhela xi twalisiwa hi ku tirhisa hina, hi nga va ku sungula ku tshemba Kreste. 13 Kambe na n’wina mi mu tshembile nkama mi nga twa rito la ntiyiso, ku nga mahungu ya ku tsakisa ya ku ponisiwa ka n’wina. Loko se mi kholwile, Xikwembu xi tirhise moya wa xona wa ku kwetsima lowu nga tshembisiwa leswaku xi mi markara.+ 14 Moya lowu i xitiyisekisu xa leswaku hi ta swi kuma leswi xi nga hi tshembisa swona.+ Xi yendle leswo kuva xi chunsa vanhu va xona+ hi nkutsulu+ leswaku xi dzunisiwa hintamu.

15 Hileswi nga yendla leswaku ku sukela loko ni twile hi ta lipfumelo la n’wina ka Hosi Yesu ni lirhandzu la n’wina ka vakwetsimi hinkwavu, 16 ni nga tshikanga ku khensa hi mhaka ya n’wina. Ni tshamela ku vulavula hi n’wina ka swikhongelo swa mina, 17 leswaku Xikwembu xa Hosi ya hina Yesu Kreste, Papayi lweyi a dzunekaka, xi mi nyika matimba leswaku mi tlhariha mi tlhela mi twisisa minchumu leyi xi mi kombaka yona, leswaku mi xi tiva kahle.+ 18 Xikwembu xi pfule timbilu ta n’wina, leswaku mi vona ni ku tiva ntshembo lowu xi mi nyikaka wona ni minchumu yayinene leyi kalaka yi nga fanisiwi ni nchumu, leyi xi nga yi tshembisa vakwetsimi,+ 19 ni leswaku mi ta tiva matimba ya xona yamakulu lawa xi nga ma kombisa ka hina vapfumeli.+ Ma kombisiwile hi mintirho leyi xi nga yi yendla hi matimba ya xona yamakulu, 20 lawa xi nga ma tirhisa loko xi pfuxa Kreste ka lava nga fa, kutani xi mu veka ka voko la xona la xinene+ ka tindhawu ta le tilweni, 21 ahenhla ka mimfumu hinkwayu, ni wuhosi, ni tihosi ni mavito hinkwawu;+ a hi swoswi ntsena kambe ni ka nkama lowu taka. 22 Xi tlhele xi veka swilo hinkwaswu hansi ka minkondzo ya yena,+ kutani xi mu yendla nhloko ya swilo hinkwaswu swa bandla,+ 23 leli nga muzimbha wa yena,+ lowu nga tala hi swilo hinkwaswu. Kreste hi yena lweyi a hetisisaka swilo hinkwaswu.