Tikronika Ta Ku Sungula

22 Davhida a gama a ku: “Leyi i yindlo ya Yehovha Xikwembu xa ntiyiso, naswona leyi i altari leyi Vayisrayele va nyikelaka magandzelo ya ku hisiwa ka yona.”+

2 Davhida a rhumisa swaku va hlengeleta vanhu va ku ta hi ka matiko man’wani+ lava a va tshama ka tiko la Israyele, a gama a va nyika ntirho wa ku tsemelela ni ku lulamisela maribye lawa a ma ta tirhisiwa swaku ku yakiwa yindlo ya Xikwembu xa ntiyiso.+ 3 Davhida a tlhela a hlengeleta tinsimbi ta tinyingi swaku a ta yendla swipikirhi ni minchumu ya ku manya hi yona, a tlhela a hlengeleta ni kobre la linyingi leli a li nga pimeki hi ku tala ka lona,+ 4 ni timhandzi ta minsinya ya mikedari+ leti a ti nga konteki, hikusa Vasidoni+ ni Vatiru+ va yise timhandzi ta tinyingi ta minsinya ya mikedari ka Davhida. 5 Kutani Davhida a ku: “Solomoni n’wana wa mina wa ha li mutsongo funtshi a nga na xiperiyensa,*+ yindlo leyi nga ta yakeliwa Yehovha yi fanele yi va yikulu hintamu+ yi tlhela yi saseka+ swaku yi ta tiviwa ka matiko hinkwawu.+ Kutani ni ta mu hlengeletelela minchumu leyi a nga ta yi tirhisa.” Kutani Davhida a hlengeleta minchumu ya yinyingi ya ku yaka hi yona na a nge se fa.

6 A gama a vitana n’wana wa yena Solomoni a mu byela swaku a yakela Yehovha Xikwembu xa Israyele yindlo. 7 Davhida a byela n’wana wa yena Solomoni a ku: “A ni swi lava hi mbilu hinkwayu ku yaka yindlo leyi a ku ta dzunisiwa vito la Yehovha Xikwembu xa mina ka yona.+ 8 Kambe Yehovha a ni byele a ku: ‘U dlaye vanhu va vanyingi u tlhela u lwa tinyimpi tatikulu. A hi wena u nga ta yaka yindlo leyi nga ta dzunisa vito la mina+ hikusa u dlaye vanhu va vanyingi amisaveni. 9 Kambe u ta va ni n’wana+ lweyi a nga ta va munhu wa ku rhula funtshi ni ta mu vhikela ka valala va yena hinkwavu lava va tshamaka kusuhi na yena.+ Vito la yena ku ta va Solomoni,*+ funtshi hi nkama wa ku fuma ka yena ni ta yendla swaku ku va ni ku rhula ni tlhela ni yendla swaku Vayisrayele va tshamiseka.+ 10 Hi yena lweyi a nga ta ni yakela yindlo leyi ku nga ta dzunisiwa vito la mina ka yona.+ A ta va n’wana wa mina, mina ni ta va papayi wa yena.+ Ni ta tiyisa mfumu wa yena aIsrayele swaku wu tshama wu li kona nkama hinkwawu.’+

11 “N’wananga, Yehovha a a ve na wena, a swi ku fambeli kahle, yaka yindlo ya Yehovha Xikwembu xa wena, hi ku ya hi leswi a nga swi hlaya swaku u ta swi yendla.+ 12 Yehovha a a ku nyiki wutlharhi ni ku twisisa+ nkama a nga ta ku nyika mfumu wa Israyele swaku u ta yingisa nawu wa Yehovha Xikwembu xa wena.+ 13 Swi ta ku fambela kahle loko u yingisa minawu ni swiboho swa ku yavanyisa+ leswi Yehovha a nga rhuma Moxe swaku a byela Vayisrayele.+ U nga chavi, tiya nhlana funtshi u nga rhurhumeli.+ 14 Ni tirhe hi matimba swaku ni hlengeleta minchumu ya ku yaka hi yona yindlo ya Yehovha, ni hlengelete 3.420.000* wa makilu* ya woru, ni 34.200.000* wa makilu* ya prata ku patsa ni kobre ni tinsimbi ta tinyingi+ ta ku a swi tiveki swaku ti peza makilu mangaki, ni tlhele ni hlengeleta ni timhandzi ni maribye+ kambe leswo swi ta lava u swi yengetela. 15 U ni vatirhi va vanyingi, lava va tsemaka maribye, va lulamiselaka maribye,+ vakarpinteru ni lava va kotaka ku yendla mintirho ya ku hambanahambana.+ 16 A woru, prata, kobre ni tinsimbi i swinyingi hintamu.+ Sekeleka u sungula ntirho, Yehovha a a vi na wena.”+

17 Se Davhida a byela varhangeli hinkwavu va Israyele swaku va pfuna n’wana wa yena Solomoni a ku: 18 “Yehovha Xikwembu xa n’wina wa mi seketela, a yendle swaku mi humula ka valala va n’wina. Hikusa a ni pfunile swaku ni hlula vanhu va tiko leli funtshi swoswi li fumiwa hi Yehovha ni vanhu va yena. 19 Tinyimiseleni ku gandzela Yehovha Xikwembu xa n’wina+ hi mbilu ya n’wina hinkwayu ni hi wutomi la n’wina hinkwalu. Sungulani ku yakela Yehovha Xikwembu xa ntiyiso+ ndhawu leyi kwetsimaka, swaku mi ta veka areka ya ntwananu wa Yehovha ni swibya swa ku kwetsima swa Xikwembu xa ntiyiso+ ka yindlo leyi nga ta yakiwa swaku ku dzunisiwa vito la Yehovha ka yona.”+