Mahungu Ya Ku Tsakisa Ya Ku Tsaliwa Hi Marka

10 Nkama a nga suka kolanu a ye lomu tiko la Yudiya li gamelaka kona, ka tlhelo lelin’wani la Yordani; se xitshungu xi tlhela xi hlengeletana phambheni ka yena. Kutani a sungula ku xi djondzisa, ku nga leswi a a tolovele ku swi yendla.+ 2 Se Vafarisi va ta ka yena na va lava ku mu ringa. Va mu vutisa swaku swa pfumeleliwa swaku wanuna a tshika* nsati wa yena ke.+ 3 A va hlamula a ku: “Moxe a mi djondzise yini?” 4 Va hlamula va ku: “Moxe a vule swaku wansati a nga tsaleliwa papela la ku tima muchadu* a gama a hlongoliwa.”+ 5 Kambe Yesu a ku: “Moxe a mi tsalele nawu lowu+ hi mhaka ya leswi mi nga tlanyala timbilu.+ 6 Kambe ku sukela ku sunguleni, ‘Xikwembu xi yendle wanuna ni wansati.+ 7 Hi mhaka leyo, wanuna a ta siya papayi wa yena ni mamani wa yena+ 8 se havambirhi va ta va nyama yin’we’,+ leswo swi vula swaku a va ha li vambirhi, kambe se i nyama yin’we. 9 Hi mhaka leyo, leswi Xikwembu xi nga swi patsa xikan’we* swi nga tshuki swi hambanisiwa hi munhu.”+ 10 Naswona na va li ndlwini, vadjondzisiwa va yena va sungula ku mu vutisa hi mhaka leyi. 11 Yesu a va hlamula a ku: “Lweyi a tshikaka nsati wa yena a gama a chada mun’wani, o mbuyeta+ naswona a djohela nsati wa yena, 12 naswona loko wansati a tshika nuna wa yena a chada ni wanuna mun’wani, o mbuyeta.”+

13 Se vanhu va sungula ku mu tisela swivanani leswaku a swi tlhateka mavoko a tlhela a swi katekisa, kambe vadjondzisiwa va kawuka vapsali va swona.+ 14 Nkama Yesu a nga swi vona, a swi mu tsakisanga, kutani a ku: “Swi tshikeni swivanani leswo swi ta ka mina; mi nga swi siveli hikusa Mfumu wa Xikwembu i wa lava fanaka na swona.+ 15 Ni mi byela ntiyiso: Lweyi a kalaka a nga wu yamukeli Mfumu wa Xikwembu ku fana ni xin’wanani a nge ngheni ka wona.”+ 16 Kutani a tlakula swivanani a swi katekisa hi ku swi tlhateka mavoko.+

17 Nkama na a famba, ku ta wanuna mun’wani hi ku tsutsuma a fika a khizama phambheni ka yena a mu vutisa a ku: “Mudjondzisi Wamunene, ni fanele ni yendla yini swaku ni kuma wutomi la ku kala li nga heli?”+ 18 Yesu a mu hlamula a ku: “Hi mhaka muni u ni vitana wamunene? A ku na munhu wamunene loko ku nga li Xikwembu.+ 19 Wa yi tiva minawu leyi nge: ‘U nga tshuki u dlaya,+ u nga tshuki u mbuyeta,+ u nga tshuki u yiva,+ u nga tshuki u fakaza swa mavunhwa,+ u nga tshuki u kanganyisa van’wani,+ hlonipha papayi wa wena ni mamani wa wena.’”+ 20 Wanuna lweyi a ku ka yena: “Mudjondzisi, minawu leyi hinkwayu na yi yingisa ku sukela wutsongwanini.” 21 Yesu a mu txuvuka kutani a mu rhandza, se a ku: “Ku sale nchumu xin’we: Famba u ya xavisa minchumu leyi u nga na yona, u teka male ya kona u yi nyika swisiwana, kutani u ta va ni tshomba tilweni, u gama u ta, u ta ni landzela.”+ 22 Kambe nkama djaha leli li nga twa leswo, li boha ximombo, li suka li famba na li karhatekile hikusa a li ni minchumu ya yinyingi hintamu.+

23 Yesu a txuvuka matlhelweni, a gama a byela vadjondzisiwa va yena a ku: “Swi ta va karhatela ndjhani lava nga ni male ku nghena ka Mfumu wa Xikwembu!”+ 24 Kambe vadjondzisiwa va hlamalisiwa hi marito ya yena. Yesu a tlhela a ku: “Vananga, swa karhata ku nghena ka Mfumu wa Xikwembu! 25 Swi vevuka hintamu swaku kamela yi hundza hi ka mbhovo wa nayethi ku tlula ku va munhu wa ku ganya a nghena ka Mfumu wa Xikwembu.”+ 26 Kutani va hlamala hintamu, se va mu vutisa* va ku: “Indjhe a kona lweyi a nga ta ponisiwa?”+ 27 Yesu a va txuvukisisa a ku: “Ka vanhu a swi nge koteki, kambe a swi tshamisanga leswo ka Xikwembu, hikusa ka Xikwembu minchumu hinkwayu ya koteka.”+ 28 Pedru a ku: “Phela hi tshike minchumu hinkwayu hi ku landzela.”+ 29 Yesu a ku: “Ni mi byela ntiyiso: A nga kona lweyi a nga tshika yindlo kumbe vamakwavu va xinuna kumbe vamakwavu va xisati kumbe mamani kumbe papayi kumbe vana kumbe masimu hi mhaka ya mina ni hi mhaka ya mahungu ya ku tsakisa+ 30 lweyi swoswi a nga ta kala a nga kumi leswi nga phindhiwa ka 100, tiyindlo, vamakwavu va xinuna, vamakwavu va xisati, vamamani, vana, masimu xikan’we ni ku xanisiwa,+ se ka nkama lowu taka a kuma wutomi la ku kala li nga heli. 31 Kambe vanyingi lava nga va ku sungula va ta va va wugamu kasi lava nga va wugamu va ta va va ku sungula.”+

32 Na va li ndleleni ya ku ya Yerusalema, Yesu a rhanga phambheni ka vona, se vadjondzisiwa va hlamala, kambe lava a va mu landzela va sungula ku chava. Se a tlhela a teka lava 12 a ya na vona tlhelweni, a sungula ku va byela leswi nga ta mu humelela a ku:+ 33 “Phela hi ya Yerusalema, naswona N’wana wa munhu a ta nyikeliwa ka vaprista vavakulu ni le ka vatsali, kutani va ta mu yavanyisela lifu naswona va ta mu nyikela ka vanhu vamatiko 34 leswaku va tlanga hi yena, va mu pshitela marhi, va mu ba va tlhela va mu dlaya, kambe a ta pfuxiwa hi siku la wunharhu.”+

35 Yakobe na Yohani, vana va Zebedewu,+ va tshinelela Yesu va fika va ku: “Mudjondzisi, hi navela swaku u hi yendlela xin’wani ni xin’wani lexi hi nga ta ku kombela xona.”+ 36 Kutani Yesu a ku: “Mi lava yini?” 37 Va mu hlamula va ku: “Hi tiyisekisi swaku ka Mfumu* wa wena+ mun’we ka hina a ta tshama ka voko la wena la xinene kasi mun’wani ka la ximatsi.” 38 Kambe Yesu a ku: “A mi xi tivi lexi mi xi kombelaka. Indjhe mi nga swi kota ku nwa ka kopo leyi ni nga ta nwa ka yona kumbe ku tsakamisiwa hi ntsakamiso lowu ni tsakamisiwaka hi wona?”+ 39 Va ku: “Hi nga swi kota.” Se Yesu a ku: “Kopo leyi ni nwaka ka yona mi ta nwa ka yona ni ntsakamiso lowu ni tsakamisiwaka hi wona mi ta tsakamisiwa hi wona.+ 40 Kambe loko ku li mhaka ya ku tshama ka voko la mina la xinene kumbe la ximatsi a hi mina ni nga mi nyikaka swona, kambe i swa lava nga lunghiseleliwa swona.”

41 Nkama lavan’wani va 10 va nga twa mhaka leyi, va kwatele Yakobe na Yohani.+ 42 Kambe Yesu a va vitana a ku: “Ma swi tiva swaku tihosi ta matiko ta va tikisela vanhu naswona vafumi va wona va fuma hi voko la nsimbi.+ 43 Swi nga tshuki swi tshamisa xileswo xikarhi ka n’wina; kambe lweyi a navelaka ku va wamukulu xikarhi ka n’wina a fanele a va mutirhi wa n’wina+ 44 naswona lweyi a lavaka ku va wa ku sungula xikarhi ka n’wina, a fanele a va xikarawa xa n’wina hinkwenu. 45 Hikusa hambi N’wana wa munhu a nga telanga ku ta tirheliwa, kambe a tele ku ta tirhela van’wani+ ni ku nyikela wutomi la yena swaku li kutsula vanhu va vanyingi.”+

46 Se va nghena Yeriko. Kambe loko Yesu a huma Yeriko xikan’we ni vadjondzisiwa va yena ni xitshungu xaxikulu, Bartimewu (n’wana wa Timewu), lweyi a a fe matihlo, a a tshame kusuhi ni ndlela a kombela zimola.+ 47 Nkama a nga twa swaku i Yesu wa le Nazareta lweyi a hundzaka, a sungula ku huwelela a ku: “Yesu N’wana wa Davhida,+ ni tweli wusiwana!”+ 48 Kutani va ku tala va sungula ku mu kawuka va mu byela swaku a miyela, kambe a tama a huwelela hintamu swinene a ku: “N’wana wa Davhida, ni tweli wusiwana!” 49 Se Yesu a nyima a ku: “Mu vitaneni.” Kutani va mu vitana va ku: “U nga chavi! Sekeleka, wa ku vitana Yesu.” 50 Kutani a txukumeta nguvu ya yena, a sekeleka hi xihantla a ya ka Yesu. 51 Se Yesu a ku: “U lava ni ku yendlela yini?” Wanuna lweyi a nga fa matihlo a mu hlamula a ku: “Raboni,* yendla swaku ni tlhela ni vona.” 52 Yesu a ku: “Famba. Lipfumelo la wena li ku hanyisile.”+ Kutani hi xihantla a sungula ku vona,+ se a sungula ku mu landzela.